An ka waajuli baara be koo jumanw dafa?
1 Ala ka Kuma b’a yira ko kerecɛnw be Jehova ka baara dafa ni kunkɔrɔta ye i ko see sɔrɔbagaw (2 Kɔr. 2:14-16). An kɛtɔ ka mɔgɔw dɛmɛ ka Ala ka lɔnniya sɔrɔ, an ka waajuli baara be komi wusulan suman duman Jehova fɛ. Kibaro duman diya be mɔgɔ dɔw sama. Nka dɔ wɛrɛw be ban a la. O bɛɛ n’a ta, hali ni mɔgɔ caamanba be ban a la, o kɔrɔ tɛ ko an ka baara ye fuu ye. An k’a filɛ o baara be koo minw dafa.
2 A be Jehova tando: Sitanɛ b’a fɔ ko hadamadenw be baara kɛ Jehova ye u yɛrɛw nafa kama (Job 1:9-11). Kerecɛnya baara be sababu di an ma an k’a yira ko an masirilen be Jehova la ni kɔnɔgwɛ ye. Cikan dira weleweledalaw ma u ka waajuli kɛ ani ka mɔgɔw kɛ Kirista ka kalandenw ye. U caaman be timinandiya k’o cikan bato hali ni gwɛlɛyaw b’u kan wala ni mɔgɔ caaman t’u lamɛn. An mana muɲuli kɛ ni kantigiya ye o cogo la, o be Jehova dusu ninsɔndiya dɛ!—Ntal. 27:11.
3 Ka fara o kan, an ka waajuli baara ye fɛɛrɛ dɔ ye min be Ala ka sagonata dafa. Sitanɛ ka duniɲa halakituma ka surun. O kama, Jehova b’a fɔ ko: ‘Siyaw n’a dɔn ko ne ye Matigi de ye.’ (Ezek. 39:7). Walisa siyaw k’o lɔn, fɔɔ Ala sagokɛlaw ka to ka Jehova tɔgɔ n’a sagonata weleweleda “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” ye.—Jira. 14:6, 7.
4 Kiti bena basigi o de kan: Kiti bena basigi kibaro duman waajuli kan. Ciden Pol y’a fɔ ko Yesu Kirista bena “hakɛ bɔ Ala dɔnbaliw ni an Matigi Yesu Kibaru Duman kan minɛbaliw la.” (2 Tes. 1:8, 9). Mɔgɔw be kibaro duman jaabi cogo min na, kiti bena tigɛ u kan ka kɛɲɛ n’o ye. Nin ye baara gwiliman ye Ala sagokɛlaw kun na dɛ! Walisa joli hakɛ kana kɛ an kun, an man kan ka sigasiga ka Masaya cira fɔ, sabu a be mɔgɔw niin kisi.—Kew. 20:26, 27.
5 N’an be timinandiya k’an sigiɲɔgɔnw dɛmɛ ka Ala diyanye sɔrɔ, o b’a yira ko Jehova be hinɛ u la (1 Tim. 2:3, 4). Koow be yɛlɛma mɔgɔw ka ɲɛnamaya kɔnɔ tuma bɛɛ. O kama, an be taga bɔ u fɛ, ani an be segi ka taga tugun walisa k’u jija u ka Jehova ɲini sanni wagati ka tɛmɛ. O cogo la, an be “an ka Ala ka makari” ladegi: ale “t’a fɛ mɔgɔ si ka halaki, a b’a fɛ bɛɛ ka nimisa u ka jurumuw la.”—Luka 1:78; 2 Piɛre 3:9.
6 A be an yɛrɛw nafa: N’an bolo degunnen be Jehova ka baara la, o bena an tanga koo ma. O b’an dɛmɛ an ka “Ala ka don ɲɛnafilɛ kosɛbɛ.” O la, duniɲa juguman nin tɛna an jogo tiɲɛ (2 Piɛre 3:11-14; Tite 2:11, 12). O de kosɔn, an ka ‘sabati ka kɛ sigasigabaliw ye. An ka taa ɲɛ Matigi ka baara la tuma bɛɛ.’ An k’a lɔn ko an ka jijaliw kɛli tɛ fuu ye kerecɛnya baara la.—1 Kɔr. 15:58.
[Study Questions]
1. Jehova be an ka waajuli baara jati cogo di? Nka mɔgɔw b’an jaabi cogo di?
2. An ka waajuli baara be sababu di an ma ka mun yira?
3. Mun na a kɔrɔtalen be kosɔbɛ an ka to ka mɔgɔw dɛmɛ ka Ala tɔgɔ n’a sagonata lɔn?
4. Cogo juman na kiti bena basigi waajuli baara kan?
5. Cogo juman na an ka waajuli baara b’a yira ko Ala be hinɛ mɔgɔw la?
6. N’an bolo degunnen be Jehova ka baara la, cogo juman na o b’an nafa?