A’ y’a to aw hakili la ko kɔrɔtɔ be wagati la!
1 Tuma min na a tun be dugukolo kan, Yesu tun y’a lɔn ko wagati min b’a fɛ k’a Faa ka baara kɛ, daan b’o wagati la ( Yuh. 9:4). O kama, a y’a ka cidenyabaara dafa ni kɔrɔtɔ miiriya ye. A fana y’a ka kalandenw kalan u k’a kɛ o cogo kelen na (Luka 4:42-44; 8:1; 10:2-4). Nɛɛma min be sɔrɔ bololafɛnw fɛ, o tun t’a ka ɲɛnako fɔlɔ ye (Mat. 8:20). O cogo la, Jehova tun ye baara kɛta min d’a ma, a sera k’o dafa k’a ban.—Yuh. 17:4.
2 Wagati dantigɛra: Wagati min latigɛra ka waajuli kɛ “diɲɛ yɔrɔw bɛɛ la”, daan b’o wagati fana la (Mat. 24:14). Bibulu ka ciraya kumaw b’a yira ko laban wagati surunyana kosɔbɛ. Yanni dɔɔni cɛ, “Ala dɔnbaliw ni an Matigi Yesu Kibaru Duman kan minɛbaliw . . . ka tɔɔrɔ na kɛ halakili banbali ye.” (2 Tes. 1:6-9). O kiti bena bari ka cun u kan cogo kabakoman na (Luka 21:34, 35; 1 Tes. 5:2, 3). Mɔgɔw ka kan ka bɔ a kalama ko farati b’u sen kɔrɔ. An ka kunkanbaara lo k’u dɛmɛ u ka Jehova ka nɛɛma ɲini sanni wagati ka tɛmɛ.—Sofoni 2:2, 3.
3 An k’an seko bɛɛ kɛ: Komi Ala sagokɛlaw y’a lɔn ko “waati surunyara”, u be waajuli baara kɛ u ka ɲɛnako fɔlɔ ye (1 Kɔr. 7:29-31; Mat. 6:33). Sababu tun be dɔw bolo ka wari sɔrɔ wala u bolo tun be baara dɔ la. Nka, u y’u yɛrɛw seen bɔ o la walisa ka se ka dɔ fara u ka waajulibaara kan (Marka 10:29, 30). Kɔrɔbɔliw bɛɛ n’a ta, dɔ wɛrɛw be timinandiyara ka “taa ɲɛ Matigi ka baara la” (1 Kɔr. 15:58). Caaman cɛsirinen be ka kibaro duman fɔ kabini saan caaman (Heb. 10:23). O jijaliba minw bɛɛ be kɛra Masayakow nafa kosɔn, u bɛɛ be Jehova ninsɔndiya kosɔbɛ.—Heb. 6:10.
4 Ni Jehova ka batoli kɛra an ka ɲɛnako fɔlɔ ye an ka ɲɛnamaya kɔnɔ, o lo bena an dɛmɛ an ka Jehova ka loon to an hakili la. O batoli faan dɔ ye waajulibaara ye. A b’an tanga walisa Sitanɛ ka duniɲa kana an bila ɲɛmalɔbaliya la. A fana be barika don an na walisa an k’an cɛsiri ka tagamacogo senuman mara (2 Piɛre 3:11-14). Tiɲɛn na, n’an b’an ka waajulibaara dafa ni kɔrɔtɔ miiriya ye, o be se k’an yɛrɛw niin kisi, ani ka mɔgɔ wɛrɛ fana ta kisi.—1 Tim. 4:16.