An be se ka dɛmɛ kɛ cogo di?

¹ “An be se ka dɛmɛ kɛ cogo di?” Jehova Seerew b’o ɲiningali kɛ tuma caaman na n’u y’a mɛn ko balawo dɔ kɛra duniɲa yɔrɔ dɔ la. I ko Kɛw 11:27-30 b’a yira cogo min na, kerecɛn fɔlɔw ye dɛmɛ lase u balimaw ma Jude mara la, sabu kɔngɔba dɔ tun benna u kan.

² Bi tile la, Jehova Seerew ka tɔn sariyaw be sira di u ma ka wari bɔ ka dɛsɛbagatɔw dɛmɛ, ani ka dɛmɛ kɛ ni balawo dɔ cunna mɔgɔw kan: o balawo be se ka na a yɛrɛ ma, wala a be se ka kɛ hadamaden nɔɔ ye. An be se ka dɛmɛ kɛ fana koo wɛrɛ sen fɛ.

³ Ɲɛyirali fɛ, salon, dugukoloyɛrɛyɛrɛ dɔ kɛra kɔgɔji kɔnɔ, ani a ye tiɲɛniba kɛ Azi worodugu mara la: a weelela ko tsunami. Balima caaman y’a bɔ u yɛrɛw la ka wari di an ka tɔn ma walisa a ka dɛmɛ kɛ. An b’u waleɲuman lɔn kosɔbɛ. Nka, niliw mana kɛ balawo tigitigi dɔ kama, jamana dɔw ka sariyaw b’an waajibiya ka baara kɛ n’o wari ye o balawo dɔrɔn kama ani wagati latigɛnen dɔ kɔnɔ. An balimaw ye dɛmɛ sɔrɔ ka ban wo, u m’a sɔrɔ wo, sariya t’o jati tugun.

⁴ O kama, ni dɔ b’a fɛ ka wari di dɛsɛbagatɔw kama ani balawo koow kama, a ka fisa o tigi k’a di duniɲa kuru bɛɛ baara kama. O wari be ta ka dɛmɛ kɛ ani ka balimaw bɛɛ ka hakilimaya yiriwa duniɲa bɛɛ kɔnɔ. Nka, ni koo dɔ kosɔn, mɔgɔ dɔ b’a fɛ ka nili kɛ balawo koow kama dan na, an be sɔn a tigi ka nili la. A ka wari bena ta ka dɛmɛ kɛ ni balawo dɔ cunna yɔrɔ o yɔrɔ. Nka a ka fisa n’o niliw ma ɲɛsin balawo tigitigi dɔ ma, yɔrɔ wala koo tigitigi dɔ ma.

⁵ N’an ka niliw ɲɛsinna duniɲa kuru bɛɛ baara ma fɔlɔ, wari caaman bena sɔrɔ ka Masayakow faanw bɛɛ ɲɛnabɔ. O la, niliw tɛna mara ka bila balawo nata dɔ dɔrɔn kama. O kɛcogo be bɛn Efesekaw 4:16 ka miiriya ma sabu an be baara kɛ ɲɔgɔn fɛ ka farikolo mako ɲɛ walisa a ka “jiidi ka dɔ fara a yɛrɛ barika kan kanuya la.”