An k’an mako don mɔgɔw la: An kɛtɔ k’an yɛrɛ labɛn koɲuman
1 N’an b’an yɛrɛ labɛn koɲuman waajuli baara kama, o b’an dɛmɛ k’an mako don mɔgɔw la. Cogo juman na do? N’an labɛnnen be koɲuman, gafe yiracogo tɛ kɛ an ka ɲɛnako fɔlɔ ye tugun. O la, an be se k’an janto kosɔbɛ an lamɛnbaga la. O fana b’a to an be kuma ni hakilisigi ni kɔnɔgwɛ ye. Nka, an be se ka gafe yiracogo bɛrɛbɛrɛ labɛn cogo di?
2 An ka baara kɛ ni yiracogo ye min be bɛn mɔgɔw ma: I k’a filɛ sɛbɛ nin ɲɛɛ 5-8nan kɔnɔ, ka ladili dɔ sugandi min be bɛn aw ka kiinw cogoya ma. Ani, i k’a ɲini k’o yiracogo yɛlɛma ka fɔ i yɛrɛ ka kumacogo la. Ɲɛyirali fɛ, n’a sɔrɔ i bena na siya wɛrɛ, wala diinan wɛrɛ mɔgɔ dɔw kunbɛn. I ka miiri k’a filɛ baro min bena diya u ye. N’i be kibaro duman fɔcogo yɛlɛma ka kɛɲɛ n’i lamɛnbagaw ka makow ye, o b’a yira ko i b’i mako don u la tiɲɛn na.—1 Kɔr. 9:22.
3 I kɛtɔ ka gafe dɔ kofɔ mɔgɔw ye, i ka to k’a yiracogo fisaya ka taga. Komi daminɛ kumaw kɔrɔtalen be kosɔbɛ, i k’a kɔrɔsi k’a filɛ mɔgɔw b’i jaabi cogo min na. I be baro kɛra koo min kan, yala o barokun ka di u ye wa? Yala u b’i ka ɲiningaliw jaabi wa? N’o tɛ, i ka yɛlɛmani dɔw kɛ walisa i ka daminɛ kumaw ka barika sɔrɔ.
4 Fɛɛrɛ minw b’an dɛmɛ k’an hakili jigi: Balimaw mana kɛ mɔgɔw ka daa la, a ka gwɛlɛ u caaman fɛ k’u hakili jigi gafe yiracogo la. N’o koo delila k’i sɔrɔ, yala i y’a ɲini ka gafe yiracogo degi ani k’a kɛ ka filɛ mɔgɔ dɔ ɲɛɛ na wa? O la, i ka miiriyaw bena gwɛ i hakili la. Ani, i bena se k’u fɔ cogo tilennen na, ani cogo nɔgɔman na. O fana be se k’i dɛmɛ k’i yɛrɛ labɛn ka mɔgɔw ka sɔsɔli kumaw jaabi.
5 Fɛɛrɛ wɛrɛ be se k’i dɛmɛ k’i hakili jigi gafe yiracogo la: I k’i ka yiracogo kumaw sɛbɛ ka surunya papiye dennin dɔ kan. Ani, i k’u lajɛ sanni i ka don luu nata kɔnɔ. Dɔw y’a ye k’o kɛcogo b’u dɛmɛ k’u hakili sigi ani ka baro kɛ ni mɔgɔw ye cogo nɔgɔman na. O cogo la, n’an b’an yɛrɛ labɛn koɲuman, o b’an dɛmɛ an k’an mako don mɔgɔw la. Ani, an ka kibaro duman fɔcogo be fisaya.