An ka ɲi ka baara kɛ ni gafew yiracogo modɛliw ye cogo min na
1 Gafew ni zurunaliw yiracogo modɛliw be to ka bɔ An ka Masaya Cidenyabaara kɔnɔ tuma o tuma. Waajuli kɛtɔ, waajibi tɛ an k’o yiracogow fɔ tigitigi i n’a fɔ u sɛbɛnenw be cogo min na. U sɛbɛra walisa ka hakilinata dɔw di an ma gafe yiracogo kan. Tuma caaman na, an bena sanga sɔrɔ ka tɛmɛ, n’an b’o yiracogo modɛliw fɔ an yɛrɛ ka kumacogo la. O b’a to an lamɛnbaga be magaya. O fana b’a yira ko an kɔnɔ gwɛnen be, ani an be min fɔra, an lanen b’o la sɔbɛ la.—2 Kɔr. 2:17; 1 Tes. 1:5.
2 I k’i ka yiracogo makɛɲɛ: Kiin kɔnɔ mɔgɔw ka delinankow kosɔn, an ka yiracogo be se ka yɛlɛma kosɔbɛ. Yala i ka ɲi ka foli kɛ mɔgɔw ye ka sɔrɔ k’i ka gafe yiracogo daminɛ, wala yala kiin kɔnɔ mɔgɔw b’a ɲini i fɛ i ka sin k’i nakun fɔ wa? O kɛcogo tɛ kelen ye yɔrɔ bɛɛ la ani a yɛrɛ tɛ kelen ye mɔgɔ bɛɛ fɛ tuma dɔw la. An fana ka ɲi ka hakili sɔrɔ ɲiningaliw bilacogo la. Ɲiningali dɔw be se ka bɛn mɔgɔw ma yɔrɔ dɔw la. Nka yɔrɔ wɛrɛ la, u be se ka mɔgɔw sɛgɛ. O kama, an ka kan ka hakili sɔrɔ ani ka gafew yiracogo makɛɲɛ ka bɛn ni mɔgɔw ka delinankow ye.
3 Ka fara o kan, n’an b’an labɛnna waajuli kama, an ka kan k’an janto mɔgɔw ka bɔyɔrɔw n’u ka miiriyaw la. Ɲɛyirali fɛ, an be baro kɛ Matiyu 6:9, 10 kan ni katoliki yɛrɛ yɛrɛ ye cogo min na, an tɛn’a kɛ o cogo kelen na ni mɔgɔ wɛrɛ ye n’o tigi tɛ “Matigi ka delili” lɔn. N’an be kɔn ka miiri a la, an be se ka gafew yiracogow makɛɲɛ walisa u ka diya an lamɛnbagaw ye waajuli kɛtɔ.—1 Kɔr. 9:20-23.
4 Hali n’an b’a fɛ ka baara kɛ ni yiracogo modɛli sɛbɛnen dɔ ye, a tɛna ɲɛ kosɔbɛ n’an m’an yɛrɛ labɛn koɲuman. N’an b’a fɛ ka barokun wala sapitiri dɔ yira mɔgɔw la, an ka kan k’a kalan koɲuman ani ka hakilinata dɔw ɲini a kɔnɔ minw bena mɔgɔw dusu sɔrɔ. O kɔ an be se k’o hakilinataw fara an ka yiracogo kɔnɔ. Kunnafoni nafaman minw be sɔrɔ an ka gafew kɔnɔ, an bena se k’u lase mɔgɔw ma ni dusudiya ye fɔɔ n’an yɛrɛw b’u faamu.
5 Yiracogo wɛrɛw: Yiracogo modɛli minw dira an ma, yala waajibi lo an ka dan olu ma wa? Ayi. Ni yiracogo dɔ wɛrɛ wala vɛrise wɛrɛ ka nɔgɔ i fɛ, i ka baara kɛ n’o ye. Zurunaliw kɔni yiratɔ, i ka kɔrɔsili kɛ ka cogoyaw ɲini k’o zurunaliw ka barokun wɛrɛw yira mɔgɔw la. U be se ka diya mɔgɔ sifa tigitigi dɔw ye kiin kɔnɔ. Ni ɲɛyirali dɔw ka kan ka kɛ waajuliko lajɛn na, a’ ye labɛn kɛ walisa u ka kɛ yiracogow ye minw be sanga sɔrɔ kiinw kɔnɔ. O cogo la, bɛɛ be se ka dɛmɛ sɔrɔ ka kibaro duman kofɔ bɛrɛbɛrɛ.
[Study Questions]
1. Gafew yiracogo modɛli minw dira an ma, an ka kan k’u jate cogo di?
2. Mun na an ka ɲi k’an janto mɔgɔw ka delinankow la n’an be gafew yiracogo labɛnna?
3. Mun na an ka ɲi k’an janto an lamɛnbagaw bɔyɔrɔ n’u ka miiriyaw la?
4. Mun na a kɔrɔtalen be an k’an yɛrɛ labɛn koɲuman?
5. Mun na an be se ka yiracogo wɛrɛ labɛn, ani an be se k’o kɛ cogo di?