An k’an ka waleɲumanlɔn yira Krista saya hakilijigi lajɛn bena kɛ awirili tile 17nan na
1. Zaburuw sɛbɛbaga ye mun lo fɔ min bɛnnen lo kosɔbɛ Hakilijigi lajɛn wagati la?
1 Jehova ka hinɛ n’a ka kisili wale caaman ye Zaburuw sɛbɛbaga lasun ka ɲiningali kɛ ko: “Ne na mun kɔsegin Matigi ma a ka ko ɲuman kɛlenw bɛɛ kosɔn ne ye?” (Zab. 116:12) Bi, sababu min be Ala sagokɛlaw fɛ k’a waleɲuman lɔn, o ka bon ka tɛmɛ Zaburuw sɛbɛbaga ta kan. Saan kɛmɛ kɛmɛ caaman o kuma senumanw sɛbɛnen kɔ, Jehova ye kunmabɔsara di hadamadenw ma, o min ye nilifɛnw bɛɛ la nafamanba ye. Krista saya Hakilijigi lajɛn bena kɛ awirili tile 17nan na. K’an to o labɛnni na, joo b’an fɛ k’an ka waleɲumanlɔn yira.—Kol. 3:15.
2. Mun lo b’a to an be kunmabɔsara jati fɛɛnba ye?
2 Duga minw be sɔrɔ kunmabɔsara sababu fɛ: Kunmabɔsara sababu fɛ, an be se k’an ka “jurumuw yafa” sɔrɔ (Kol. 1:13, 14). O b’a to an be se ka Jehova bato ni dusukun gwɛnin ye (Heb. 9:13, 14). An be se k’an magwɛrɛ Jehova la k’an sagona kumaw fɔ a ye delili la (Heb. 4:14-16). Minw limaniyalen lo kunmabɔsara la, olu be ni ɲɛnamaya banbali jigiya ɲuman ye!—Yuh. 3:16.
3. An be se k’a yira cogo di ko an be Jehova waleɲuman lɔn kunmabɔsara kosɔn?
3 Waleɲumanlɔn yiracogo: An ka waleɲumanlɔnba yiracogo dɔ ye nin ye: Bibulu kalangwɛ min labɛnna Hakilijigiko kama, an k’o kalan loon o loon ani ka miiri a kan. Saan 2011, feburu tile fɔlɔ ka La Tour de Garde barokun dɔ labɛnna walisa k’an dɛmɛ k’o kɛ. A kuun ko: “Êtes-vous prêt pour le jour le plus important de l’année ?” Jehova delitɔ n’an dusukun bɛɛ ye, an be se fana k’a fɔ a ye ko an be kunmabɔsara jati fɛɛnba ye (1 Tes. 5:17, 18). An b’an ka waleɲumanlɔn yira an kɛtɔ ka Yesu ka cikan labato ani ka na Hakilijigi lajɛn na (1 Kɔr. 11:24, 25). Ka fara o kan, an be se k’a yira ko an be ni Jehova ka kanuyaba ɲɔgɔn ye an kɛtɔ ka mɔgɔ caamanba weele u ka na Hakilijigi lajɛn kɛ n’an ye.—Es. 55:1-3.
4. An ka kan k’an cɛsiri mun lo la?
4 Jehova sagokɛla minw b’a waleɲuman lɔn, u tɛna Hakilijigi lajɛn jati i ko lajɛn wɛrɛ lo dɔrɔn. A kɔrɔtalen lo ka tɛmɛ saan kɔnɔ lajɛn tɔɔw bɛɛ kan! Komi Hakilijigi lajɛn be surunyana, an k’an cɛsiri i ko Zaburuw sɛbɛbaga min ko: “Ne dusu, i ka barika da Matigi ye, i kana ɲinɛ a ka ko ɲuman kɛlen si kɔ.”—Zab. 103:2.