An ka mɔgɔ majigilenw kalan u ka Ala sira tagama
1 A tun fɔra Krista ka kalanden fɔlɔw koo la k’u ye “Matigi ka sira” tagamabagaw ye (Kɛw. 9;2). Kerecɛnya lakika ɲɛsinna mɔgɔ ka ɲɛnamaya kɛcogo faanw bɛɛ lo ma (Ntal. 3:5, 6). O kama, bibulukalan kɛtɔ ni mɔgɔw ye, a daan tɛ an k’u dɛmɛ ka Bibulu ka lɔnniya tigitigi sɔrɔ dɔrɔn. An ka kan k’u dɛmɛ ka Jehova ka sira tagama fana.—Zab. 25:8, 9.
2 An k’u dɛmɛ ka Jehova ni Yesu kanu: Tiɲɛn na, a ka gwɛlɛ hadamaden dafabaliw fɛ k’u miiriyaw, n’u kɛcogow, n’u kumacogo, n’u jogow yɛlɛma ka kɛɲɛ ni Ala sago ye (Rom. 7:21-23; Efes. 4:22-24). Nka n’u be Ala n’a Dencɛ kanu, o kanuya lo bena mɔgɔ majigilenw lasun u ka see sɔrɔ o gwɛlɛya kan (Yuh. 14:15; 1 Yuh. 5:3). Cogo juman na an be se ka Bibulu kalandenw dɛmɛ u k’a degi k’o kanuya sɔrɔ?
3 I ka kalanden dɛmɛ a k’a ɲini k’a lɔn Jehova ye mɔgɔ sifa min ye. Balimacɛ dɔ y’a ɲɛfɔ ko: “Mɔgɔw tɛ se ka mɔgɔ dɔ kanu n’u t’a tigi lɔn. O kama, kabini kalan fɔlɔ kɛtɔ, ne be Ala tɔgɔ yira u la Bibulu kɔnɔ. Ani, ne be n’ jija ka kuma ka sinsin Jehova ka jogow kan.” O kɛcogo bɛrɛbɛrɛ dɔ ye ka ɲɛyirali ta Yesu kan ani k’o ɲɛfɔ ka gwɛ (Yuh. 1:14; 14:9). Ka fara o kan, an ka baara kɛ ni gafe Qu’enseigne la Bible ? ka koorilenw ye. U be sɔrɔ sapitiri kelen-kelen laban na. An ka tɛmɛ o koorilenw fɛ ka kalanden dɛmɛ a ka miiri Ala n’a Dencɛ ka jogo cɛɲumanbaw kan.
4 An k’u kalan an yɛrɛ ka ɲɛyirali fɛ: I ko karamɔgɔw ani ɲɛminɛbagaw, an be Ala sira tagama cogo yira mɔgɔw la an ka kɛwalew fɛ (1 Kɔr. 11:1). Ɲɛyirali fɛ, Bibulu kalanden caaman ma deli a la ka magwɛrɛ lonanw na ani k’u ka lannakow ɲɛfɔ u ye. O kama, u mako b’a la an ka muɲu ani an ka hakili sɔrɔ k’u dɛmɛ ka kanuya ni lanaya ni jagwɛlɛya degi walisa u ka se ka waajuli kɛ ani ka mɔgɔw kɛ kalandenw ye (2 Kɔr. 4:13; 1 Tes. 2:2). N’a nege b’an na k’an ka kalandenw ɲɛminɛ, o bena an lasun an ka kɛ u gɛrɛ fɛ tuma min na u b’a daminɛna k’u sen don kerecɛnya baara la.
5 I ka ɲɛyirali be se ka kalandenw dɛmɛ kerecɛnya sira fanba wɛrɛw la. N’i be taga banabagatɔw filɛ, wala n’i be mɔgɔw bisimila ni dusudiya ye kafo ka lajɛnw na, u be kanuya yiracogo ye i fɛ (Yuh. 15:12). N’i b’i sen don Masaya Boon saniya koo la, wala n’i be mɔgɔw dɛmɛ cogoya wɛrɛ la, i b’u kalanna mɔgɔw mako ɲɛ cogo la (Yuh. 13:12-15). N’u ɲɛɛ b’a la ko i tɛ boli-boli fɛɛn caaman nɔfɛ, u b’a faamu a kɔrɔ ye min ye ka “Ala ka masaya ni a ka tilennenya ɲini fɔlɔ.”—Mat. 6:33.
6 An mako b’a la ka jijaliba kɛ walisa ka mɔgɔw kalan Ala ka Kuma la ani k’u kɛ Krista ka kalandenw ye. Nka an mana mɔgɔ majigilenw ye u be “taama tiɲɛ sira kan”, o be kɛ ninsɔndiya ye an fɛ dɛ!—3 Yuh. 4.
[Study Questions]
1. Ka mɔgɔw kɛ Krista ka kalandenw ye, o kɔrɔ ye mun ye?
2. Mun lo be se ka Bibulu kalanden lasun a ka Ala ka cikanw bato?
3. Cogo juman na an be se ka kalandenw dɛmɛ u k’a degi ka Jehova ni Yesu kanu?
4. (a) Mun na waajuli kɛli ka gwɛlɛ kalanden caaman fɛ? (b) Cogo juman na an be se k’an ka kalandenw dɛmɛ u k’a daminɛ k’u sen don kerecɛnya baara la?
5. Cogo juman na an ka ɲɛyirali ɲuman be kalandenw dɛmɛ u ka Ala ka cikanw bato cogo faamu?
6. Tɔnɔ juman b’a la ka mɔgɔ majigilenw dɛmɛ u ka baara kɛ Jehova ye?