An ka mɔgɔw kalan u ka Jehova kanu
1 Yala i hakili b’a la tuma min na i ye Jehova koo mɛn siɲɛ fɔlɔ la wa? Mun lo y’i sama k’i magwɛrɛ a la? Mɔgɔ kɔnɔgwɛ caaman bena a fɔ i ye k’u magwɛrɛla an Danbaga la tuma min na u y’a ka jogow lɔn minw ɲɔgɔn tɛ yen: a ka hinɛ n’a ka kanuya lo diyara u ye kosɔbɛ.—1 Yuh. 4:8.
2 “An ka Ala filɛ”: Gafe Qu’en-seigne la Bible ? be sinsin Jehova ka kanuya kan ani a b’a fɔ ka gwɛlɛya ko a kɔrɔtalen lo an ka jɛnɲɔgɔnya teriman kɛ n’a ye. An be se ka baara kɛ n’o gafe ye cogo di walisa ka mɔgɔw kalan u k’u ka kanuya bonya Ala ta fan fɛ? N’an b’a fɛ ka sinsin miiriya kura dɔ kan, an be se ka ɲiningali dɔw kɛ minw be kalanden lasun ka miiri, i n’a fɔ: “Tiɲɛn kuma nin be mun lo yira ka ɲɛsin Jehova ma?” wala “Cogo juman na nin miiriya b’a yira ka gwɛ ko Jehova ye Faa fisaman ye bɛɛ be min ɲɔgɔn fɛ?” Ka mɔgɔ kalan ten, o be se ka kalanden dɛmɛ a k’a daminɛ ka jɛnɲɔgɔnya sigi ni Jehova ye kudayi kama.
3 An ka Bibulu kalandenw dɛmɛ u k’a faamu ko nɛɛma lo ka Jehova lɔn ale min ye tiɲɛn Ala ɲɛnama kelenpe ye. N’an b’o kɛ, u bena sɔn a ma i ko Esayi y’a fɔ cogo min na ko: “An ka Ala filɛ.” (Es. 25:9). N’an be Ala ka Kuma ɲɛfɔra, an ka kan k’a yira ka gwɛ hadamadenw bena duga minw sɔrɔ tuma min na Jehova sago bena dafa a ka Masaya sababu fɛ, Krista Yesu b’o min kun na.—Es. 9:5, 6.
4 Fɛɛn min b’a yira ko an be Jehova kanu: An b’a lɔn ko ka Jehova kanu n’an dusukun bɛɛ, an niin bɛɛ ani an hakili bɛɛ ye, o tɛ dan ka kɛ ni dusukun na miirili barikamanw dɔrɔn ye Ala ta fan fɛ. An ka kan ka sɔn a ka koow filɛcogo ma ani k’a ladegi o la (Zab. 97:10). An b’a yira ko an be Jehova kanu n’an b’a ka cikanw bɛɛ sira tagama ka ɲɛ ani n’an be to ka kɛ ni “taama senuma ni Ala ɲɛsiran” ye, hali ni kɔrɔbɔli ni bali b’an kan (2 Piɛrɛ 3:11; 2 Yuh. 6).
5 Ka Ala sago kɛ sabu an b’a kanu, o ye ninsɔndiya ye an fɛ (Zab. 40:9). Bibulu kalanden ka kan k’a faamu ko Ala ka cikanw bɛɛ latigɛra a sagokɛlaw ka ɲɛ banbali lo kama (Dut. 10:12, 13). Mɔgɔ min be sɔn Jehova k’a ɲɛminɛ, o tigi b’a yira ko Jehova ka kɛwale kabakomanw bɛɛ koo ka di a ye hali. An ka Bibulu kalanden dɛmɛ a k’a faamu ko ka tagama Jehova ka tilennenya siraw kan o be mɔgɔ tanga tɔɔrɔ ni dusukasi caaman ma.
6 Jehova kanubagaw be duga minw sɔrɔ: Jehova b’a janto kosɔbɛ mɔgɔ majigilenw na ani a be “Ala ka ko dunbaw” yira u la (1 Kɔr. 2:9, 10). U mana Jehova sago lɔn o cogo la, u be sini koow faamu ka ɲɛ ani u be kɛ ni jigiya sɔbɛ ye (Jer. 29:11). Minw be Jehova kanu olu be a ka ɲumanya kabakoman nafa sɔrɔ (Ekis. 20:6). Ɲɛnamaya banbali jigiya ka di u ye sabu Ala y’u kanu hali.—Yuh. 3:16.
7 Dɔ mana to ka fara an ka lɔnniya kan an sankolola Faa koo la, an bena min fɔ mɔgɔw ye dɔ bena to ka fara o fana kan (Mat. 13:52). Ka mɔgɔ wɛrɛw kalan, sanko an deenw, u ka Jehova kanu, o ye nɛɛmaba ye dɛ! (Dut. 6:5-7). An kɛtɔ ka Jehova ka “ko ɲuman kɛlenw” diya bɔ, an ni an ka Bibulu kalandenw ka to ka Jehova tando n’an dusukun bɛɛ ye.—Zab. 145:7.
[Study Questions]
1. Mun lo ye mɔgɔ dɔw sama ka gwɛrɛ Jehova la?
2, 3. An be se ka baara kɛ ni gafe Qu’enseigne la Bible ? ye cogo di walisa ka Bibulu kalandenw dɛmɛ u k’u ka kanuya bonya Jehova ta fan fɛ?
4, 5. Ka Jehova kanu, o kɔrɔ ye mun ye?
6. An bena duga jumanw lo sɔrɔ n’an be Jehova kanu?
7. Ka mɔgɔ wɛrɛw kalan u ka Jehova kanu, i be mun miiri o la?