Gwamɔgɔw ka jɛn ka Jehova bato ɲɔgɔn fɛ
1 Bibulu sɛbɛwagati la, gwamɔgɔw tun be koo caaman kɛ ɲɔgɔn fɛ. U tun be soo kɔnɔ baaraw kɛ loon o loon. Nka u ɲɛnako fɔlɔ tun ye ka jɛn ka Jehova bato ɲɔgɔn fɛ (Lev. 10:12-14; Dut. 31:12). Yɔrɔ caaman na bi, gwamɔgɔw be jɛn ka koo minw kɛ ɲɔgɔn fɛ o tɛ bɛrɛ ye. Nka kerecɛnw b’a lɔn ko nafa b’a la ni gwamɔgɔw be jɛn ka koow kɛ ɲɔgɔn fɛ sanko ni batoli koow lo. Denbaya jusigibaga mana a ye ko gwamɔgɔw be jɛn k’ale bato ɲɔgɔn fɛ, o ka di a ye dɛ!
2 A’ ye waajuli kɛ ɲɔgɔn fɛ: Gwamɔgɔw kɛtɔ ka kibaro duman waaju ɲɔgɔn fɛ, o be u ka jɛnɲɔgɔnya sabati. O kama, ni diinan mɔgɔkɔrɔ ka kan ka kafodenw bila sira waajuli la, a fana ka kan ka to ka waajuli kɛ n’a muso n’a denmisɛnw fana ye (1 Tim. 3:4, 5). Hali n’u ka porogramu falen be, kɔrɔsibaga tagamakɛlaw be wagati latigɛ ka waajuli kɛ n’u yɛrɛw musow ye.
3 Bangebagaw kɛtɔ ka waajuli kɛ n’u deenw ye, u bena se k’u dɛmɛ ka ɲɛtaga sɔrɔ ka kɛ kibaro duman waajulikɛlaw ye. Denmisɛnw tɛna a kɔrɔsi dɔrɔn ko cidenya baara b’u bangebagaw ɲagali k’u wasa dɛ. Nka u fana bena a ye k’u bangebagaw b’u ka kanuya yira Jehova ani u mɔgɔ ɲɔgɔnw ta fan fɛ (Dut. 6:5-7). Hali n’u kɔrɔbayara ani u be gwa kɔnɔ, a kɔrɔtalen lo u bangebagaw ka to ka waajuli kɛ n’u ye hali bi. Cɛɛ dɔ n’a muso be ni dencɛ saba ye: u be saan 15 ni saan 21 cɛ. Hali bi u b’u bila sira waajuli baara la tuma o tuma. Facɛman b’a fɔ ko: “An b’u kalan koo dɔ la tuma o tuma. Ani an b’an janto o ka kɛ wagati diiman ye min b’u jagwɛlɛya.”
4 A’ ye aw labɛn ɲɔgɔn fɛ: Denbayaw y’a ye ko nafa b’a la k’u yɛrɛ labɛn ɲɔgɔn fɛ waajuli kama. Tuma caaman na a ka di denmisɛnw ye ka gafew yiracogo degi gwa kɔnɔ: u be gafe yiracogo kɛ, wala u b’u yɛrɛ kɛ lamɛnnikɛla ye. Dɔw be miniti damanin ta k’o kɛ gwakalan banni kɔ.
5 Dɔ be fara an ka ninsɔndiya kan n’an be jɛn n’an diyanye mɔgɔw ye baaraba dɔw la minw be mɔgɔ wasa. Ka jɛn ka waajuli kɛ soo ni soo ani ka viziti kuraw ni bibulukalanw kɛ ɲɔgɔn fɛ ni gwamɔgɔw ye, o ye ɲagaliko ye dɛ! I kɛtɔ ka jɛn n’i ka denbaya ye ka Jehova bato o cogo la, i be se ka ɲagali k’a fɔ ko: “Ne kɔni, ne ni ne ka so mɔgɔw na baara kɛ Matigi ye.”—Josue 24:15.