An k’a ɲini ka dɔ fara an ka cidenya baara kan
1 Ciden Pol ye kerecɛnw ladi ko u ka Ala sira tagama ani u “ka jiidi o la ka taa ɲɛ” (1 Tes. 4:1). O kɔrɔ ko di an fɛ? O kɔrɔ dɔ ye ko an ka kan ka to ka cogoyaw ɲini tuma bɛɛ ka dɔ fara an ka baara kan Alako ta fan fɛ. Ani an ka kan k’an jija tuma bɛɛ k’an ka cidenya “baara bɛɛ kɛ ka dafa.”—2 Tim. 4:5.
2 An ka ŋaniyaw: An b’a ɲini ka dɔ fara an ka cidenya baara kan sabu a nege b’an na ka baara kɛ an Danbaga ye bɛrɛbɛrɛ. An b’a fɛ ka yiriwa Alako ta fan fɛ ani ka cogoyaw ɲini k’an ka cidenya baara kɛcogo fisaya. Porogramu ɲuman ni ŋaniya ɲuman bena an dɛmɛ k’an ka laɲinitaw dafa Alako ta fan fɛ.—Zab. 1:1, 2; Fil. 4:6; Heb. 10:24, 25.
3 N’an b’a fɛ ka dɔ fara an ka cidenya baara kan fɔɔ an ka kɛ ni yɛrɛ-saraka hakili ye ani an k’an tɛgɛ labila ka nili kɛ. An be se k’o hakili ɲɔgɔn sɔrɔ an kɛtɔ ka miiri Yesu ka ɲɛyirali ɲuman kan delili la (Mat. 20:28). Yesu ye ninsɔndiyaba sɔrɔ a kɛtɔ ka baara kɛ mɔgɔw ye a ka cidenya baara kuru bɛɛ la (Kɛw. 20:35). An be se ka Yesu ladegi an kɛtɔ k’an mako don mɔgɔw la ani ka cogoyaw ɲini ka dɔ fara an ka cidenya baara kan.—Es. 6:8.
4 Bangebagaw lɔyɔrɔ: Ka baara kɛ mɔgɔw ye ani ka dɔ fara an ka cidenya baara kan, an be se k’o nege don deenw kɔnɔ kabini u denmisɛnman. Denmisɛnw bena a kɔrɔsi ko gwamɔgɔw be timinandiya ani u be kisɛya ka dɔ fara u ka cidenya baara kan. Tuma min na a tun ye cɛdennin ye, balimacɛ dɔ ye baara kɛ n’a mamacɛ ye kafo ka baaraw la. O y’a jija ka nɛɛma baaraw laɲini. A kɛtɔ k’a mamacɛ ka ninsɔndiya n’a ka timinandiya ye, o y’a lasun ka cogoyaw ɲini ka baara kɛ a balimaw ye. A kɛra kɔrɔsigi ciden ye sisan.
5 Makoya be yen balimacɛ setigigw la: “Ni mɔgɔ dɔ bɛ [nɛɛma baara] ɲini, o tigi bɛ baara ɲuman fɛ.” (1 Tim. 3:1). O kumaw be balimacɛw jija u k’a ɲini ka saratiw dafa walisa ka nɛɛma baara wɛrɛw sɔrɔ Jehova ka ɔriganisasiyɔn kɔnɔ. Waajibi tɛ u ka kɛ ni hakilidiya kabakoman dɔw ye. Nka balimacɛ min be nɛɛma baara laɲini, a ka kan ka Masayakow ɲini fɔlɔ ani ka kisɛya cidenya baara la (Mat. 6:33; 2 Tim. 4:5). A fana ka kan k’a jija ka kɛ ɲɛyirali ɲuman ye tɔɔw fɛ.
6 Duniɲa kuru bɛɛ kɔnɔ: Jehova be suman tigɛ teliyara (Es. 60:22). Minw bɛɛ be tugu Yesu ka ɲɛyirali kɔ, kɔrɔtɔ b’a la u k’u ka cidenya baara kɛ k’a dafa bɛrɛbɛrɛ. Waajuli baara saan 2006 ka rapɔɔri b’a yira ko duniɲa kuru bɛɛ kɔnɔ mɔgɔ 248 327 batisera. O kɔrɔ ko mɔgɔ kura 680 ni kɔ ɲɔgɔn batisera loon o loon! An bɛɛ ka to ka cogoyaw ɲini k’an ka cidenya baara kɛ bɛrɛbɛrɛ.