Yala i b’a fɛ ka dɔ fara i ka baara kan wa?
1 Yesu ye Masaya suma ni nafoloba dɔ ye, min sɔngɔ ka bon hali (Mat. 13:44-46). Ka Masaya kibaro jɛnsɛn, o fana ye nafolo sɔngɔba ye. O cidenyabaara ka kan ka sigiyɔrɔ fɔlɔ sɔrɔ an ka ɲɛnamaya kɔnɔ, hali n’an ka kan ka an yɛrɛ ka nafaw saraka walisa k’o baara kɛ a ɲɛ ma (Mat. 6:19-21). Yala i b’a fɛ ka dɔ fara i ka Masaya baara kan wa?
2 Miiri nin koow kan: Walisa ka dɔ fara an ka waajulibaara kan, koo dɔw ye waajibi ye: (1) An k’an cɛsiri ka Masaya ka tɔnɔw bila yɔrɔ fɔlɔ la an ka ɲɛnamaya kɔnɔ (Mat. 6:33). (2) Ka lanaya kɛ, ani ka sinsin Jehova kan (2 Kɔr. 4:1, 7). (3) Ka dɛmɛ ɲini Jehova fɛ delili kɔnɔ, kɔnɔgwɛ ni timinandiya ye (Luka 11:8-10). (4) Ka timinandiya, ani ka koow kɛ ka kɛɲɛ n’an ka deliliw ye. — Yaku. 2:14, 17.
3 An be se ka dɔ fara an ka cidenyabaara kan cogo minw na: An bɛɛ be se ka laɲinita nɔgɔmanw latigɛ an yɛrɛ ye: ka wagati dɔ kɛ waajuli baara la kalo o kalo. Nka yala i y’a ɲini ka nin fana kɛ wa: Ka tɛmɛ cogoyaw bɛɛ fɛ ka seereya di, hali n’i ma lawili a kama? Ka dɔ fara i ka kuma yiracogo diya kan? K’i ka viziti kuraw kɛcogo fisaya? Ka Bibulu kalandenw dɛmɛ u ka ɲɛtaga sɔrɔ koɲuman? Yala i tɛ se ka piyɔniyew kɔrɔsigi, wala kudayi piyɔniye baara kɛ wa? Walima, i tɛ se ka taga baara kɛ yɔrɔ min na makoyaba be yen wa? N’i ye balimacɛ batiselen ye, yala i be se k’a laɲini ka koow dafa walisa ka kɔrɔsigi cidenw, wala diinan mɔgɔkɔrɔw baara kɛ wa? (1 Tim. 3:1, 10). See b’i ye k’i tɔgɔ di Betɛli, wala Masaya Boon lɔ baara, wala cidenyabaara degeli lakɔli (École de formation ministérielle) kama wa? —Luka 10:2.
4 Balimacɛ dɔ tun be baara kɛ wagati bɛɛ. Ani a tun be wagati caaman ta farikoloɲanagɛ kama. U y’a jija ka kɛ kudayi piyɔniye ye. A y’a daminɛ ni piyɔniyew kɔrɔsigi baara ye. Ani, a y’a yɛrɛ labɛn k’a sendon kudayi cidenyabaara la. Kɔfɛ, a ye cidenyabaara degeli lakɔli kɛ. O dɛmɛ sababu fɛ, a labɛnna ka baara kɛ bi i ko sirikɔnsikiripsiyɔn kɔrɔsibaga. A be ɲagali kosɔbɛ k’a ye ko a sɔnna jagwɛlɛya kumaw la. A lanen b’a la ko komi a y’a latigɛ ka dɔ fara a ka Masaya baara kan, o lo y’a to a ka hɛɛrɛ ka bon bi ka tɛmɛ fɔlɔ ta kan.
5 Minw b’u yɛrɛw di ka baara kɛ Jehova ye, a b’u duga (Esayi 6:8). I kana a to foyi k’i bali ka dɔ fara i ka cidenyabaara kan, ani ka wasaliba ni hɛɛrɛba sɔrɔ.