An ka mɔgɔ jigitigɛlenw dusu saalo
1 Hadamaden mako gwɛlɛn be dususalo la bi ka tɛmɛ wagati bɛɛ kan. I ko an ka Masacɛ Yesu Krista, an fana be “mɔgɔ jigitigɛlɛnw jigi tugu.”—Es. 61:1.
2 A kɛcogo: Walisa an ka cidenya baara ka se ka mɔgɔw dusu saalo, an ka kan ka duniɲa ka gwɛlɛyaw kofɔ ka dama kɛɲɛ ani ka kuma diiman fɔ Ala ka Masaya koo la. Baro kɛtɔ an kana kuma sama duniɲa ka kɛwale juguw ni ngalon diinanw ka kalan kan. O la, an bena se ka sinsin Bibulu ka tiɲɛn kuma kan ani Ala ka layidu ɲumanw kan, minw be mɔgɔ dusu saalo. O kɔrɔ tɛ ko an man kan ka kuma Harmagedɔn koo la. Cii min dira an ma, o ye ko “Matigi na a ka ɲumaya jira a ka mɔgɔw la san min na, ka o welewele da. Matigi na a mɔnɛbɔ a juguw la don min na, ka o fana welewele da” ani ka ‘mɔgɔ jugu lasɔmi . . . a ka kɔsegi k’a ka sira juguw bila.’ Nka ka mɔgɔw lasɔmi Harmagedɔn n’a ka halakilikow la, o kɔrɔ tɛ k’o kɛ an ka barokun ye ani ka Ala ka Masaya “Kibaru Duman” barokun to yen.—Es. 61:2; Ezek. 3:18; Mat. 24:14.
3 Soo ni soo: An ka teli ka mɔgɔw kunbɛn minw jigi tigɛra bana, mɔgɔ kanulen dɔ ka saya, tilenbaliyaw wala fantanya kosɔn. An minw ye Krista ladegibagaw ye, an be “hinɛ” u la. An fana be minw kunbɛn an ka cidenya baara la an b’a yira ko an be makari u la (Luka 7:13; Rom. 12:15). Hali n’an ye vɛrise kelen wala fila kalan minw ɲɛsinna mɔgɔ dɔ ka gwɛlɛya ma, an ka kan “ka lamɛnni kɛ joona.” O kama an k’a to a tigi k’a ka miiriya fɔ (Yak. 1:19). Lamɛnni kɛnen kɔ, an be se k’o tigi dusu saalo cogo fisaman na.
4 Baro kɛtɔ, an ka wagati bɛnnen dɔ yala k’a fɔ ko: “Ne b’a fɛ ka Bibulu ka jijali kuma dɔ tilan n’i ye.” An ka kan ka hakili sɔrɔ, an kana a tigi ka ngalon miiriyaw kelen-kelen bɛɛ sɔsɔ. Nka an ka kan ka sinsin min kan, o ye ka mɔgɔw jija ani k’u dusu saalo an kɛtɔ ka baara kɛ ni Bibulu ye walisa k’u sabati. Ka ɲɛsin o ma, an be se k’a filɛ gafe Comment raisonner à partir des Écritures ɲɛɛ 119-122 kɔnɔ, barokun “Encouragement” jukɔrɔ. Wala sɛbɛnin min kuun ko: De l’aide pour les déprimés, an fana be se k’o dɔ di a tigi ma ani ka baro kɛ jijali kumaw kan a kɔnɔ.
5 Sababuw ɲini ka mɔgɔw dusu saalo: Yala i b’i sigiɲɔgɔn, baarakɛɲɔgɔn, lakɔli filankuru wala i ka somɔgɔ dɔ lɔn min mako be dususalo la wa? Mun b’i bali, i k’i jija ka taga bɔ o ɲɔgɔnna mɔgɔw ye u ka soo, k’a laɲini ka Bibulu ka dususalo kumaw tilan n’u ye. N’i y’a lɔn fɛɛn tigitigi min kama u mako be dususalo la, i k’i yɛrɛ labɛn o kan. Ka se ka mɔgɔw dusu saalo, dɔw ye lɛtɛrɛ wala telefɔni ci. N’an b’an mɔgɔɲɔgɔn kanu sɔbɛ la, o bena an lasun ka hinɛ u la ani ka tɛmɛ Bibulu fɛ k’u dusu saalo ka kɛɲɛ n’u ka makoya ye.—Luka 10:25-37.
6 Tiɲɛn lo, mɔgɔ minw be sukasi la, cii dira an ma k’u dusu saalo, ka mɔgɔ haminenw dusu diya ani ka siniɲasigi ɲuman jigiya di mɔgɔw ma. Nin ye dususalo ye mɔgɔw mako be min na duniɲa kuru bɛɛ kɔnɔ. Ala ye fɛɛn ɲuman caaman minw layidu ta, n’an be kuma u kan ni ninsɔndiya ye, o lo bena mɔgɔ sɔbɛw dusu saalo ani ka jigiya di u ma. An k’a to an hakili la tuma o tuma ko an ka kan ka “mɔgɔ jigitigɛlɛnw jigi tugu.”—Es. 61:1.