U benna mɔgɔ minw kan ka cɛnimusoko kɛ n’u ye u denmisɛn tuma, an k’olu dusu saalo (Barokun 4 nunu yɔrɔ 4nan)

1-2. a) Mun lo b’a yira ko adamadenw mako be dususalo la ani ko setigiya b’u fɛ ka ɲɔgɔn dusu saalo? b) Dɔw be mun lo kɛ min be denmisɛnw mandimi fɔɔ ka juguya?

ADAMADENW mako be dususalo la ani setigiya kabakoman b’u fɛ ka ɲɔgɔn dusu saalo. Ɲɛyirali fɛ, ni deen benna k’a kunbiri mandimi, a kasitɔ be boli ka taga maman wala papa fɛ. Bangebagaw tɛ se k’a kɛ a joli be nɔgɔya yɔrɔnin kelen. Nka, u be se k’a dusu saalo. U be se k’a ɲininga min kɛra, k’a ɲɛji jɔsi ani ka dususalo kumaw fɔ a ye. U yɛrɛ be se k’a joli furakɛ ani ka bandi siri a la. O kɔ, deen b’a daa je ani a b’a daminɛ ka tulon kɛ. Kɔfɛ, deen ka joli bena nɔgɔya.

² Tuma dɔw la, denmisɛn dɔw be mandimi fɔɔ ka juguya sabu u be ben u kan ka cɛnimusoko kɛ n’u ye. U be se k’o kɛ siɲɛ kelen wala saan caaman yɛrɛ kɔnɔ. A mana kɛ min o min ye, o koo be se ka deen tɔɔrɔ kosɔbɛ a sii tɔɔ bɛɛ la. Tuma dɔw la, mɔgɔ min y’o kojuguba kɛ, u be se k’a minɛ k’a don kaso la. Nka, a be se ka kɛ k’u t’a tigi sɔrɔ k’a ɲangi. Hali ni faamanw sinna k’a tigi minɛ k’a don kaso la, o deen bele be se ka tɔɔrɔ a baliku tuma na.

3. Ka kɛɲɛ ni 2 Korɛntikaw 1:3, 4 ye, Jehova be mun lo fɛ? An bena ɲiningali jumanw lo lajɛ?

³ Ni balima dɔ be tɔɔrɔla sabu u benna a kan ka cɛnimusoko kɛ n’a ye a denmisɛn tuma, mun lo be se k’a dɛmɛ do? (2 Korɛntikaw 1:3, 4 kalan). Jehova sagokɛlaw mako be dususalo ni kanuya min na, Jehova b’a fɛ u k’o sɔrɔ. O la, an ka ɲiningali saba lajɛ: 1) U benna mɔgɔ minw kan ka cɛnimusoko kɛ n’u ye u denmisɛn tuma, mun na olu mako be dususalo la? 2) Jɔn lo be se k’u dusu saalo? 3) An be se k’o kɛ koɲuman cogo di?

MUN NA U MAKO BE DUSUSALO LA?

4-5. a) Mun na a kɔrɔtanin lo an k’a lɔn ko denmisɛnw ni mɔgɔkɔrɔbaw tɛ kelen ye hali dɔɔni? b) N’u benna denmisɛn kan ka cɛnimusoko kɛ n’a ye, o be se ka nɔɔ juman lo to deen kan?

⁴ U benna minw kan ka cɛnimusoko kɛ n’u ye u denmisɛn tuma, olu bele mako be se ka kɛ dususalo la saan caaman o kɔ. Walisa k’o faamu, an k’a lɔn ko denmisɛnw ni mɔgɔkɔrɔbaw tɛ kelen ye hali dɔɔni. Ni kojuguba kɛra deen na, o be nɔɔ to a kan cogo min na, o ni mɔgɔkɔrɔba ta tɛ kelen ye. An ka ɲɛyirali dɔw lajɛ.

⁵ Minw be denmisɛnw lamɔ ani k’u janto u la, denmisɛnw mako b’a la k’u magwɛrɛ olu la ani ka la u la. O b’a to denmisɛnw b’a ye k’u latanganin lo ani o b’u lasun ka la mɔgɔ wɛrɛw la minw b’u kanu (Zab. 22:10). U ka teli ka ben denmisɛnw kan ka cɛnimusoko kɛ n’u ye u ka soo le. A fɔ man di nka, minw b’o kɛ, u fanba ye deen somɔgɔ wala a somɔgɔ dɔ teri lo ye a lanin be min na. O yɛrɛ lo b’a to a be se ka gwɛlɛya deen ma ka la mɔgɔw la hali saan caaman o kɔ.

6. Ka ben denmisɛn kan ka cɛnimusoko kɛ n’a ye, mun na o ye kojuguba lo ye ani o be deen tɔɔrɔ kosɔbɛ?

⁶ Denmisɛn tɛ se k’a yɛrɛ latanga. O kama ka cɛnimusoko kɛ n’a ye, o ye kojuguba lo ye ani o b’a tɔɔrɔ kosɔbɛ. K’o kɛ deen na k’a sɔrɔ a ma kɔrɔbaya fɔlɔ, o ye kojuguba yɛrɛ lo ye! O be se k’a to a be cɛnimusoko jati cogo bɛnbali la. O be se k’a to fana a tɛ la mɔgɔ la ani a b’a miiri ko nafa foyi t’ale la.

7. a) Minw be ben denmisɛnw kan ka cɛnimusoko kɛ n’u ye, mun na a ka nɔgɔ olu fɛ ka denmisɛnw lafili? U b’o kɛ cogo di? b) O ngalon kumaw nɔfɛkow be se ka kɛ mun lo ye?

⁷ Denmisɛnw tɛ se ka jatiminɛ kɛ ka ɲɛ, ka desizɔnw ta ani k’u yɛrɛ latanga (1 Kor. 13:11). O kama, minw be ben u kan ka cɛnimusoko kɛ n’u ye, a ka nɔgɔ olu fɛ k’u lafili. U be ngalonfin tigɛ denmisɛnw ye. Ɲɛyirali fɛ, u b’a fɔ ko deen nɔɔ lo, ko a man ɲi k’o fɔ ani ko hali n’a y’o fɔ, mɔgɔ si tɛna la a la. Wala u b’a fɔ u ye ko ni mɔgɔkɔrɔba ni denmisɛn be cɛnimusoko kɛ, o b’a yira k’u be ɲɔgɔn kanu sɔbɛ la. Saan caaman o kɔ le deen be sɔrɔ k’a faamu k’o kumaw bɛɛ ye ngalon lo ye. O deen kɔrɔbayatɔ, a be se k’a miiri ko ale ta tiɲɛna, a nɔgɔnin lo ani ko a man kan mɔgɔ k’a kanu ani k’a dusu saalo.

8. U ye kojuguba kɛ minw na, mun na an be se ka la a la ko Jehova be se k’u dusu saalo?

⁸ Min fɔra ka tɛmɛ, o b’an dɛmɛ k’a faamu fɛɛn min kama u benna denmisɛn minw kan ka cɛnimusoko kɛ n’u ye, olu be se ka tɔɔrɔ saan caaman kɔnɔ. Bi duniɲa kɔnɔ, mɔgɔ caaman be ben denmisɛnw kan ka cɛnimusoko kɛ n’u ye. O ye kojuguba yɛrɛ lo ye! O b’a yira ka gwɛ ko an be laban loonw lo la. A tun fɔra k’o wagati la, denbayamɔgɔw tɛna ɲɔgɔn kanu ani ko “mɔgɔ minw ka jugu ani namaramɔgɔw, olu bena juguya ka taga ɲa.” (2 Tim. 3:1-5, 13). Sutana ka kokɛtaw ka jugu yɛrɛ le! K’a ye ko mɔgɔ dɔw b’a sago kɛra, o b’an dusu kasi. Nka, Jehova fanga ka bon ka tɛmɛ Sutana n’a kɔmɔgɔw ta kan fɔɔ ka taga ka na. Jehova be Sutana ka kokɛtaw kala ma. An be se ka la a la ko a b’a lɔn tɔɔrɔ min b’an kan ani an mako be dususalo min na, a b’o di an ma. Nɛɛma lo an fɛ ka dususalo bɛɛ tigi Ala bato sabu “ale lo be mɔgɔ bɛɛ jigi tugu. Ale lo b’an jigi tugu an ka tɔɔrɔ bɛɛ la, waasa an fana ka se k’an tɔɲɔgɔnw jigi tugu an y’o min sɔrɔ Ala fɛ.” (2 Kor. 1:3, 4). Jehova be tɛmɛ jɔn lo fɛ k’an dusu saalo?

JƆN LO BE SE K’U DUSU SAALO?

9. Ka kɛɲɛ ni Zaburuw 27:10 ye, minw somɔgɔw banna u la, Jehova bena mun lo kɛ olu ye?

⁹ Dɔw somɔgɔ dɔ benna u kan ka cɛnimusoko kɛ n’u ye u denmisɛn tuma, wala u bangebagaw m’u latanga o koo ma. Olu mako be dususalo la yɛrɛ le! Zaburu sɛbɛbaga Dawuda tun b’a lɔn ko mɔgɔ si tɛ se k’an dusu saalo ka se Jehova ma (Zaburuw 27:10 kalan). A tun lanin b’a la ko minw somɔgɔw banna u la, Jehova bena olu ladon. Jehova be tɛmɛ a sagokɛla kantigiw lo fɛ k’o kɛ. An kerecɛnɲɔgɔnw y’an somɔgɔw ye Alako ta fan fɛ. Ɲɛyirali fɛ, Yezu y’a fɔ ko minw be Jehova bato n’ale ye, olu lo y’a balimacɛw, a balimamusow n’a bamuso ye.—Mat. 12:48-50.

10. Ciden Pol tun be balimaw minɛ cogo di?

¹⁰ Kafodenw y’an somɔgɔw ye Alako ta fan fɛ cogo di? Ciden Pol tun ye diinan mɔgɔkɔrɔ kantigi ye min be baaraba kɛ kafo kɔnɔ. A tun be balimaw minɛ cogo min na, an k’a filɛ a ye min fɔ o koo la. A ko: “An ka koo tun ka di k’an to aw cɛma yen, i n’a fɔ muso b’a deen mara cogo min na.” (1 Tes. 2:7). Pol kɛra ɲɛyirali ɲuman ye an fɛ ani hakili senu y’a lasun k’a fɔ ko an k’ale ladegi i ko ale ye Krista ladegi cogo min na (1 Kor. 11:1). Bi, minw mako be dususalo la, diinan mɔgɔkɔrɔ kantigiw be basigi Bibulu kan ka dususalo kumaw fɔ olu ye.

11. Mun lo b’a yira ko diinan mɔgɔkɔrɔw dɔrɔn lo man ɲi ka mɔgɔ dusu saalo?

¹¹ U benna minw kan ka cɛnimusoko kɛ n’u ye u denmisɛn tuma, yala diinan mɔgɔkɔrɔw dɔrɔn lo ka ɲi k’olu dusu saalo wa? Ayi. An kelen kelen bɛɛ ka ɲi ka “to ka ɲɔgɔn jigi tugu.” (1 Tes. 4:18). Balimamuso minw mako be dususalo la, balimamuso kolɔnbagaw yɛrɛ lo be se k’olu jija. O kama, Jehova ko ale be komi bamuso min b’a deen dusu saalo (Ezayi 66:13). Bibulu be kuma muso dɔw koo la minw ye dusukasibagatɔw dusu saalo (Zɔbu 42:11). Bi, balimamuso minw b’u balimamuso ɲɔgɔnw dusu saalo, Jehova dusu ka di u kɔrɔ! Tuma dɔw la, diinan mɔgɔkɔrɔw be se k’a ɲini balimamuso kolɔnbaga dɔ fɛ u dan na, a ka balimamuso dɔ dusu saalo.b

AN BE SE KA TƆƆW DUSU SAALO COGO DI?

12. An man ɲi ka mun lo kɛ?

¹² N’an b’a fɛ ka balima dɔ dɛmɛ, a t’a fɛ ka min fɔ, an kana a ɲininga o la (1 Tes. 4:11). Minw mako be dususalo ni dɛmɛ na, an be se ka mun lo kɛ olu ye? An ka cogo duuru lajɛ Bibulu kɔnɔ.

13. Ka kɛɲɛ ni 1 Masacɛw 19:5-8 ye, mɛlɛkɛ dɔ ye mun lo kɛ Eli ye? An be se k’a ladegi cogo di?

¹³ An ka koo tigitigi dɔw kɛ k’a tigi dɛmɛ. Wagati dɔ la, kira Eli bolila sabu u tun b’a fɛ k’a faga. A fari tun faganin lo fɔɔ a tun b’a fɛ ka sa. Jehova ye mɛlɛkɛ barikaman dɔ ci ka n’a jija. Eli mako tun be min na, mɛlɛkɛ y’o lo di a ma. A ye dumuni gwanniman di a ma ani a y’a jija a k’a dumu (1 Masacɛw 19:5-8 kalan). O b’an dɛmɛ ka tiɲɛnko nafaman dɔ faamu: Tuma dɔw la, n’an ye koo dennin dɔ kɛ, o be se ka mɔgɔ nafa kosɔbɛ. N’a sɔrɔ a man nɔgɔ an ma ka kuma ni dɔ ye a dusukunnakow la. N’o lo, an be se ka koo den-dennin nunu dɔ kɛ k’a yira ko an b’an janto a la: ka dumuni tobi a ye, ka kado dennin dɔ di a ma, ka taga bɔ a ye wala ka lɛtɛrɛ ci a ma. O be se ka dusukasibagatɔ hakili sigi ko an b’a kanu ani ko an b’an janto a la.

14. An be kalan juman lo sɔrɔ Eli ka koo la?

¹⁴ A to dusukasibagatɔw hakili ka sigi ani u k’a ye k’u latanganin lo. An be se ka kalan wɛrɛ sɔrɔ Eli ka koo la. Jehova ye kabako kɛ k’a dɛmɛ a tagamana ka taga fɔɔ Orɛbu kulu kan, yɔrɔ min na Jehova tun ye layidu ta n’a ka jama ye. N’a sɔrɔ Eli y’a ye ko ale latanganin lo o yɔrɔjanba lo la. N’a sɔrɔ a tun b’a jati ko sisan kɔni, ale yɔrɔ ka jan a juguw la. An be kalan juman lo sɔrɔ o la? U benna minw kan ka cɛnimusoko kɛ n’u ye u denmisɛn tuma, n’an b’a fɛ k’u dusu saalo, an ka ɲi k’u dɛmɛ fɔlɔ u k’a ye k’u latanganin lo. Diinan mɔgɔkɔrɔw ka ɲi k’a to u hakili la ko dɔw hakili siginin lo ka kuma o koo la u ka soo le. Dɔ wɛrɛw fɛ, Masaya Boon lo ka fisa.

15-16. Ka lamɛnni kɛ koɲuman, o kɔrɔ ko di?

¹⁵ Lamɛnni kɛ koɲuman. Bibulu b’an ladi ko: “Mɔgɔ kelen kelen bɛɛ ka kan ka lamɛnni kɛ ka ɲa, nga a kana teliya ka kuma.” (Zaki 1:19). Yala an be lamɛnni kɛ koɲuman wa? N’a sɔrɔ an b’a miiri k’o kɔrɔ ko, min be kumana, an ka ɲi ka to k’o tigi filɛ ani an kana kuma tigɛ a daa. Nka o dɔrɔn tɛ. Ɲɛyirali fɛ, kira Eli labanna k’a ka haminankow fɔ Jehova ye ani ale y’a lamɛn koɲuman. Jehova y’a faamu ko Eli tun sirannin lo, a tun b’a miiri ko a b’a kelen na ani ko a ka baara bɛɛ kɛra fuu ye. Jehova y’a dɛmɛ ni kanuya ye a y’a ka miiriya kelen kelen bɛɛ latilen. O cogo la, a y’a yira ko a ye Eli lamɛn tiɲɛn na.—1 Mas. 19:9-11, 15-18.

¹⁶ N’an b’an balimaw lamɛnna, an be se k’a yira cogo di ko an b’u kanu ani ko an be makari u la? Tuma dɔw la, kuma diiman damanin be se k’a yira an b’u jati cogo min na. Ɲɛyirali fɛ, i be se k’a fɔ ko: “I fo! Mɔgɔ man ɲi k’o kɛ denmisɛn na!” N’a sɔrɔ i be se ka ɲiningali kelen wala fila kɛ walisa ka la a la ko a tigi ye min fɔ, i y’o faamu. I be se k’a ɲininga ko: “I b’a fɛ ka mun lo fɔ do?” wala “I ye min fɔ, yala o kɔrɔ ko . . . ?” O kumaw b’a to a tigi b’a lɔn ko i b’a lamɛnna tiɲɛn na ani ko i b’a fɛ k’a ka kuma faamu ka ɲɛ.—1 Kor. 13:4, 7.

17. Mun na an man ɲi ka “teliya ka kuma” ani an ka ɲi ka muɲu?

¹⁷ “Kana teliya ka kuma.” Kana kuma tigɛ a tigi daa walisa k’a ladi wala k’a ka miiriyaw latilen. Muɲu a kɔrɔ! Tuma min na Eli y’a dusukunnakow fɔ Jehova ye, a hakili tun ɲagaminin lo ani a kumacogo tun b’a yira ko a dusu kasinin lo kosɔbɛ. Jehova y’a ka limaniya sabati. O kɔ, Eli y’a dusukunnakow fɔ tugun ani a tun ye min fɔ, a segira o lo kan (1 Mas. 19:9, 10, 13, 14). O b’a yira ko tuma dɔw la, dusukasibagatɔw mako b’a la k’u dusukunnakow fɔ siɲɛ caaman. I ko Jehova, an ka muɲu k’u lamɛn. Sanni an k’a ɲini k’a fɔ u ye u be se k’o koo ɲɛnabɔ cogo min na, an k’a yira ko an b’u kanu ani ko an be makari u la.—1 Piyɛri 3:8.

18. N’an be delili kɛ ni dusukasibagatɔ ye, mun na o be se k’a dusu saalo?

¹⁸ I kɔnɔ gwɛ ka delili kɛ n’a tigi ye. Tuma dɔw la, o tigi dusu kasinin lo fɔɔ a tɛ se ka delili kɛ. A be se k’a miiri ko k’a magwɛrɛ Jehova la, ale man kan n’o ye. N’an b’a fɛ k’o tigi dusu saalo, an be se ka delili kɛ n’a ye ani k’a tɔgɔ weele delili la. O delili la, an be se k’a fɔ Jehova ye k’o tigi koo ka gwɛlɛ kosɔbɛ an ni kafodenw ma. An be se ka Jehova deli a k’a sagokɛla kanulen hakili sigi ani k’a dusu saalo. O deliliw ɲɔgɔn be se k’a tigi dusu saalo kosɔbɛ.—Zaki 5:16.

19. Mun lo be se k’an dɛmɛ an k’an yɛrɛ labɛn ka dɔ dusu saalo?

¹⁹ Dususalo kumaw fɔ a tigi ye. Miiri ka sɔrɔ ka kuma. N’o tɛ, i be se ka kuma dɔw fɔ minw bena a tigi tɔɔrɔ. Kuma diimanw be mɔgɔ dusu saalo (Talenw 12:18). O la, Jehova deli a k’i dɛmɛ ka kuma nunu sɔrɔ k’u fɔ: minw be mɔgɔ hakili sigi, kuma diimanw ani dususalo kumaw. A to i ka hakili la ko kuma si barika ma se Bibulu ka kumaw ma.—Eburuw 4:12.

20. U benna minw kan ka cɛnimusoko kɛ n’u ye u denmisɛn tuma, olu be se ka mun lo miiri u yɛrɛ koo la? An b’a fɛ k’u hakili jigi mun lo la?

²⁰ U benna minw kan ka cɛnimusoko kɛ n’u ye u denmisɛn tuma, olu be se k’a miiri ko nafa foyi t’u la wala ko u nɔgɔnin lo. U be se k’a miiri fana ko mɔgɔ si t’u kanu wala ko mɔgɔ tɛ se k’u kanu. O tɛ tiɲɛn ye fewu! O la, basigi vɛrise dɔw kan k’u hakili jigi k’u koo ka gwɛlɛ Jehova ma kosɔbɛ. (Koorilen nin lajɛ: “Bibulu ka dususalo kuma dɔw”). Tuma min na kira Daniyɛli hakili tun ɲagaminin lo, mɛlɛkɛ dɔ y’a barika bonya. A to i hakili la a y’o kɛ ni kanuya ye cogo min na. Jehova tun b’a fɛ Daniyɛli k’a lɔn ko a koo ka gwɛlɛ ale ma (Dan. 10:2, 11, 19). An balima dusukasibagatɔw fana koo ka gwɛlɛ Jehova ma!

21. Minw ye kojuguba kɛ, n’u ma nimisa, mun lo bena u sɔrɔ? Sanni o cɛ, an bɛɛ ka ɲi ka banba ka mun lo kɛ?

²¹ Mɔgɔw dusu saalotɔ, an b’u hakili jigi ko Jehova b’u kanu. An man ɲi ka ɲinɛ abada ko Jehova ye tilenninya tigi Ala lo ye fana. A b’a lɔn u benna mɔgɔ minw bɛɛ kan ka cɛnimusoko kɛ n’u ye u denmisɛn tuma. Minw y’o kojuguba kɛ, n’u ma nimisa, Jehova tɛna u to yen (Nɔnb. 14:18). Sanni o cɛ, o kojuguba kɛra minw na, an k’an seko bɛɛ kɛ k’a yira u la ko an b’u kanu. Dususalo lo an fɛ k’a lɔn ko Sutana n’a ka duniɲa ye kojuguba kɛ minw na, Jehova bena olu bɛɛ ka tɔɔrɔ ban pewu! Yanni dɔɔni, an tɛna miiri o kojugubaw la tugun.—Ezayi 65:17.