Bɛɛ be se ka Jehova sɔn
1 Yala i b’a lɔn ko hadama-denw be se ka fɛɛn dɔ di Ala ma wa? Abɛl y’a ka bɛgɛn fisaman dɔw saraka Jehova ye, ani Nuhun ni Jɔb fana y’a sɔn u ka fɛɛn fisaman dɔw la (Jen. 4:4; 8:20; Job 1:5). Tiɲɛn lo, o nilifɛnw ma Danbaga fɛntigiya cogo si la sabu fɛɛnw bɛɛ ye ale ta ye. Nka o sarakaw y’a yira k’o mɔgɔ kantigiw ka kanuya barika ka bon Ala ta fan fɛ. Bi, an fana be se k’an ka wagati, an ka fanga, ani an bolofɛnw kɛ “ka tanuli sarakaw bɔ” Jehova ye.—Heb. 13:15.
2 An ka wagati: Nafa bɛrɛ tɛ an ka koo minw na, n’an b’u to gɛrɛ fɛ, k’o “waati kunmabɔ” ka waajuli kɛ bɛrɛbɛrɛ, o ka kan ni tandoli ye dɛ! (Efɛs. 5:15, 16). N’a sɔrɔ, an be se k’an yɛrɛ labɛn walisa ka kɛ piyɔniye kɔrɔsigi ye kalo kelen wala ka tɛmɛ o kan yɛrɛ saan kɔnɔ. An be deli ka wagati min kɛ waajuli la, n’a sɔrɔ an be se ka dɔ fara o kan. N’an be miniti 30 wɛrɛ kɛ ka fara an ka wagati kan lɔgɔkun o lɔgɔkun, lɛri fila kɔni bena fara an ka wagati kan kalo kɔnɔ.
3 An ka fanga: Walisa ka fanga sɔrɔ ka baara kɛ Jehova ye, an ka ɲi k’an mabɔ ɲɛnagwɛkow ani baloɲini baaraw la minw b’an sɛgɛn fɔɔ an tɛ se ka bɛrɛ kɛ Jehova ye tugun. Haminanko minw b’an dusukun “barika ban”, an ka ɲi k’olu fana bila gɛrɛ fɛ, walisa an ka fanga sɔrɔ ka baara kɛ Ala ye (Ntal. 12:25). Hali ni joo b’an fɛ ka hami koo dɔ la, a ka fisa an k’an haminankow bɛɛ la Jehova kan.—Zab. 55:23; Fil. 4:6, 7.
4 An bolofɛnw: An be se k’an bolofɛn dɔw fana kɛ ka dɛmɛ don waajuli baara la. Pol y’a kerecɛnɲɔgɔnw jija ko u ka to ka “wari dɔ bila a dan na” walisa fɛɛn ka sɔrɔ ka di dɛsɛbagatɔw ma (1 Kɔr. 16:1, 2). O cogo kelen na an fana be se ka wari dɔ di kafo ka makow kama ani duniɲa kuru bɛɛ waajuli baara kama. An dusukun mana an lasun ka min di, hali ni fitinin lo, o ka di Jehova ye.—Luka 21:1-4.
5 Jehova ye fɛɛn caaman di an ma (Yak. 1:17). An k’a waleɲuman lɔn, an kɛtɔ k’a sɔn caaman: an ka wagati, an ka fanga ani an ka sɔrɔ wɛrɛw la. N’an b’a kɛ ten, an koo be diya a ye sabu “min be nili kɛ ni diyaɲe ye, o tigi de ko ka di Ala ye.”—2 Kɔr. 9:7.