An ka waajuli kɛ, ani an ka seereya kɛ k’a dafa

¹ Waajuli baaraba min tun be a ka kalandenw ɲɛfɛ, Yesu y’u labɛn o kama. A y’o kɛ i ko ‘kuntigi ni ci fɔbaa’ (Esayi 55:4; Luka 10:1-12; Kew. 1:8). Yesu ye cii min di u ma, ciden Piɛre y’o lakali nin cogo la: “Yesu y’a fɔ an ye ko an ka mɔgɔw waaju k’a jira u la k’a jɛya ko Ala ye min sigi ka kɛ ɲɛnamaw ni suw kiritigɛla ye, o ye ale de ye.” (Kew. 10:42). Ka seereya kɛ k’a dafa, o kɔrɔ ye mun ye?

² An kɛtɔ ka ciden Pol ka ɲɛyirali lajɛ, a be se k’an kalan kosɔbɛ. Lajɛn kɛtɔ ni Efɛse ka mɔgɔ kɔrɔw ye, a y’u hakili jigi ko: “Fɛn min bɛ se ka aw nafa, ne ma o si dogo aw la. Ne ma siran ka aw waaju ka aw kalan mɔgɔw bɛɛ ɲɛ na ani soo bɛɛ kelen-kelen kɔnɔ, k’a fɔ Yahutuw ni Grɛkiw fila bɛɛ ye ko u ka nimisa u ka jurumuw la ka da an Matigi Yesu la.” Kɔrɔbɔliw bɛɛ n’a ta, Pol y’a ɲini ka kibaro duman lase mɔgɔ caamanba ma. A ma tiɲɛn kalan jɔnjɔnw dɔrɔn lase a lamɛnbagaw ma ka dan o ma. Nka, a y’a ɲini ka “Ala sago bɛɛ” fɔ u ye. Walisa k’o dafa, a tun labɛnnen be ka jijaliba ni saraka kɛ o kama. A fana y’a fara a kan ko: “Ne tɛ ne ni jate fɛn ye, a bɛ i n’a fɔ foyi tɛ, ni ne bɛ se ka ne ka ɲɔgɔndan boli kɛ ka dafa. Matigi Yesu ye baara min kalifa ne ma ko ne ka Ala ka nɛɛma Kibaru Duman fɔ, o ko don.”—Kɛw. 20:20, 21, 24, 27.

³ Cogo juman na an be se ka tugu Pol ka ɲɛyirali kɔ bi? (1 Kɔr. 11:1). An be se k’o kɛ n’an be mɔgɔ sɔbɛw ɲini, hali n’an yɛrɛw be gwɛlɛyaw kunbɛnna. An fana ka ɲi k’an jija ka kibaro duman lase siyaw ni kaan fɔbaga sifaw bɛɛ ma. Mɔgɔ dɔ mana a mako don, an ka kan k’a ɲini k’a dɛmɛ sɔbɛ la (Mat. 10:12, 13). O tɛ ɲɛ n’an ma wagati ni jijali ni kanuya di mɔgɔw kama.

⁴ Yala i be se ka kɛ piyɔniye kɔrɔsigi ye wa? Marisi ni awirili kalow be se ka kɛ sababu ɲumanw ye i fɛ ka seereya kɛ k’a dafa n’i ye piyɔniye kɔrɔsigi baara kɛ. Salon, weleweledala caaman ye jijaliba kɛ walisa ka kɛ piyɔniye kɔrɔsigiw ye. O tun y’an jagwɛlɛya dɛ!

⁵ Jehova ka ɔriganisasiyɔn tun ye jagwɛlɛya kuma minw di, u ye saan 80 balimamuso dɔ lasun, a ka kɛnɛyako gwɛlɛya caaman bɛɛ n’a ta. A y’a sɛbɛ ko: “Kabini wagati jan, a nege tun be ne la ka kɛ piyɔniye kɔrɔsigi ye. O jagwɛlɛya kuma ye ne dusukun sɔrɔ. Negeba wilila ne la ka piyɔniye baara kɛ tugun, hali ni siɲɛ kelen dɔrɔn lo.” A y’a latigɛ k’o kɛ marisikalo la. A ko: “Ne ye koo fɔlɔ min kɛ, o ye nin ye: ne sigira ka jateminɛ kɛ. Ne y’o baro kɛ n’i n denmuso ye, sabu ne mako tun bena kɛ a ka dɛmɛ la. A ye ne kabakoya, sabu, a fana ye piyɔniye kɔrɔsigi sɛbɛ deli k’a dafa.” Kalo kɔnɔ, o balimamuso kɔrɔ ye lɛri 52 kɛ waajuli la. “Tuma caaman na, ne mana a ye ko ne barika be dɛsɛra, ne ye Jehova deli a ka barika kura don n na. Kalosa la, ne ɲagalila ka wasa. Ani, ne ye barika da Jehova ye siɲɛ caaman, sabu a ye n dɛmɛ. A bena diya ne ye k’a kɛ ka filɛ tugun.” Minw b’a fɛ ka kɛ piyɔniye kɔrɔsigi ye sɔbɛ la, u ka gwɛlɛyaw bɛɛ n’a ta, o balimamuso ka wale duman be se k’u jagwɛlɛya.

⁶ Balimacɛ dɔ ka patɔrɔn barila k’a bolo bɔ baara la. O kɛra fɛɛrɛ ye ale fɛ ka piyɔniye kɔrɔsigi baara kɛ. Baara kɛtɔ kalo kɔnɔ, a ye kisɛya sɔrɔ. Ani, kalo laban fan fɛ, a ye bibulukalan kura daminɛ. A miiritɔ o koo kan, a y’a fɔ ko: “Nin kɛra kalo ye dɛ!” A ɲagalilenba tun be, sabu Jehova y’a ɲɛminɛ, k’a dɛmɛ. Ɔwɔ, a ka jijaliba kɛli kosɔn waajuli la, Jehova ye dugaba lajigi o balimacɛ kan. Ani Jehova bena o ɲɔgɔn lo kɛ ile fana ye.—Mal. 3:10.

⁷ Piyɔniye kɔrɔsigi baara man nɔgɔ mɔgɔ caaman fɛ. Baloɲini ni denbaya kunkanbaaraw ni tɔgɔla gwɛlɛyaw be yen. O bɛɛ n’a ta, balima caaman sera ka kɛ piyɔniyew ye. N’an b’a fɛ ka seereya kɛ ka dafa, fɔɔ an ka sɔn tuma dɔw la k’an ka wagati nafaman, n’an ka barika saraka. Nka a dugaw ɲɔgɔnw tɛ yen.—Ntal. 10:22.

⁸ Piyɔniye kɔrɔsigi kɛwagati fisaman ye marisi ni awirili kalow ye. Samedi ni dimansi looru be yen marisikalo kɔnɔ. Minw be baara la wagati bɛɛ, u be se ka kɛ piyɔniye kɔrɔsigiw ye, n’u be waajuli kɛ lɔgɔkun labanw na ani tilen ben wagati la. Ka fara a kan, awirilikalo kɔnɔ, seli loonw be se ka cogoya di i ma ka waajuli kɛ. Dɔw be se ka kɔnze sɔrɔ lakɔli la, wala baara la. O be se k’u dɛmɛ ka piyɔniye kɔrɔsigi lɛri 50 sɔrɔ. Piyɔniye kɔrɔsigi wagati jaticogo dɔw be sɔrɔ barokun nin kɔnɔ. I be se ka tɛmɛ o ɲɛyirali dɔw fɛ k’i ka wagati jateminɛ walisa ka lɛri 50 kɛ waajuli la marisi ni awirili kalow kɔnɔ. I kɛtɔ k’i ka wagati jate minɛ, baro kɛ ni mɔgɔ wɛrɛw ye. N’a sɔrɔ u dɔw bena jagwɛlɛya sɔrɔ ka fara i kan waajuli la. N’i tɛ se ka kɛ piyɔniye kɔrɔsigi ye, i ka laɲinita tigitigi dɔ latigɛ o kalow kɔnɔ. Ani, i ka piyɔniyew kɔrɔta. Labɛn kɛ sisan walisa ka dɔ fara i ka waajuli baara kan marisi ni awirili kalow la.

⁹ A yira ko Hakilijigi seli ka di i ye: Saan o saan, kunmabɔ saraka waleɲumanlɔn be mɔgɔ caaman lasun ka ‘wagati kunmabɔ’ walisa ka kɛ piyɔniye kɔrɔsigiw ye (Efes. 5:15, 16). Afiriki tileben n’a cɛmancɛ jamana minw be jɛn ka baara kɛ ni An ka Masaya Cidenyabaara sɛbɛ nin ye, u ye piyɔniye kɔrɔsigi 8 970 sɔrɔ marisikalo la, ani ka 3 332 sɔrɔ awirilikalo la salon. O kɛra piyɔniye kɔrɔsigi mɔyɛni 6 151 ye o kalo kelen kelen kɔnɔ. O ka ca ni kalo fɔlɔw ka moyɛni ye: o min tun ye 1 266 ye kalo o kalo. Ɲinan, Hakilijigi seli wagati be cogoya ɲuman wɛrɛ di an ma k’a yira ko an be Kirista ka kunmabɔ saraka waleɲuman lɔn. An k’o yira an kɛtɔ ka dɔ fara an ka waajuli baara kan.

¹⁰ Awirilikalo tile 16nan kɛtɔ ka surunya, i ka miiri Hakilijigi seli kɔrɔ kan i yɛrɛ fɛ. Koo minw kɛra fɔɔ ka taga Kirista don saya bolo, i ka miiri u kan. Miiriya minw y’a hakili n’a dusu degun kosɔbɛ, i ka miiri u kan. Ɲagali min tun bilara Yesu ɲɛ, ani cogo min na o y’a dɛmɛ ka nintɔrɔ muɲu, i ka miiri o fana kan. Lɔyɔrɔ min b’a fɛ sisan, i ko kafo kuntigi, o jate minɛ: A be waajuli ni bibulukalanw baara kɔrɔsira (1 Kɔr. 11:3; Heb. 12:2; Jira. 14:14-16). O kɔ, a yira ko Kirista ye koo min bɛɛ kɛ, i b’o waleɲuman lɔn. I k’o yira, i kɛtɔ k’i seko bɛɛ kɛ waajuli baara la ka kɛɲɛ n’i yɛrɛ ka koow cogoya ye.

¹¹ Mɔgɔ wɛrɛw jagwɛlɛya u ka seereya kɛ ka dafa: Ni diinan mɔgɔkɔrɔw ni kɔrɔsigi cidenw yɛrɛw y’u sen don piyɔniye kɔrɔsigi baara la, o be se ka kɛ cogoya ɲuman ye u fɛ ka tɔɔw jagwɛlɛya. Cogoya ɲumanw b’u fɛ k’u balimaw dɛmɛ u k’o dan na baara kɛ ka dafa: N’u be waajuli kɛra n’u ye, ani n’u be taga bɔ u ye walisa k’u sabati. An bɛɛ ka miiri o dan na baara kan delili kɔnɔ. O la, an bɛɛ bena jɛn ka jijali kɛ walisa ka seereya kɛ ka dafa.

¹² Marisi ni awirili kalow la, kafo bena labɛnw kɛ baaraba kama. Diinan mɔgɔkɔrɔw ni kɔrɔsigi cidenw bena o labɛnw kɔrɔta. Nka waajulibaara kɔrɔsibaga kɔni bena a janto ka waajuli koow labɛn: lajɛn kɛyɔrɔw waajuli kama, waajuli kɛlonw, ani lɛri minw bɛnnen be weleweledala caamanba ma. A bena mɔgɔw hakili jigi o lɛriw koo la tuma o tuma. A ka ɲi ka labɛn kɛ walisa mɔgɔw ka ɲɔgɔnw kunbɛn wagati caaman na tile kɔnɔ. O cogo la, bɛɛ bena cogoya sɔrɔ k’u sen don waajuli faan dɔ la, i n’a fɔ: ka waajuli kɛ jago kɛyɔrɔw la, siradaw la, soo ni soo, viziti kuraw kɛtɔ, ani telefɔni fɛ. Ka fara o kan, a ka kan ka labɛn kɛ walisa gafew ni zurunaliw, ni waajuli kɛyɔrɔw ka labila caaman o kalo nin na.

¹³ Marisikalo la, gafe yirata bena kɛ gafe Dɔnniya ye. Laɲinita ye ka bibulukalanw daminɛ ni mɔgɔw ye. O gafe yiracogo ladili ɲumanw be sɔrɔ An ka Masaya Cidenyabaara lankana kɔnɔ (saan 2002, zanwiyekalo ta). Awirilikalo la, gafe yirata bena kɛ zurunaliw La Tour de Garde ni Réveillez-vous ! ye. Ladili minw be sɔrɔ “Zurunaliw yiracogo” barokun kɔnɔ, a ɲini ka baara kɛ n’u ye. Bɛɛ ka kan ka wagati ta k’a yɛrɛ labɛn koɲuman walisa ka seereya kɛ k’a dafa.

¹⁴ Ka kolo kafo kuntigi, Yesu Kirista ye walisa ka baara kɛ, ani ka nɛɛma sɔrɔ ka kibaru duman fɔ ni balima wɛrɛw ye, o ye duba ye an fɛ dɛ! Marisi ni awirili kalow ka surun. An k’an jija tugun k’u kɛ an ka kalo fisamanw ye, an kɛtɔ ka kolo Kirista ka cikan ye: ka waajuli kɛ, ani ka seereya kɛ k’a dafa.

[Box on page 4]

Wagati jaticogow, walisa ka kɛ piyɔniye kɔrɔsigi ye Saan 2003, marisi ani awirili kalow la

Loon Lɛriw

Ntɛnɛ 1 2 — — 2 —

Talata 1 — 3 — — —

Araba 1 2 — 5 — —

Lamisa 1 — 3 — — —

Juma 1 2 — — — —

Samedi 5 4 3 5 6 7

Dimansi 2 2 3 2 2 3

Marisi 56 56 54 55 50 50

Awirili 50 50 51 53 — —

Yala labɛnsira nin dɔ be bɛn i ma wa?