Mɔgɔ minw nana Hakilijigi lajɛn na, an be se k’u dɛmɛ cogo di?
1 Saan 2008 kɔnɔ marisikalo tile 22nan na, mɔgɔ miliyɔn caaman bena seereya barikaman sɔrɔ duniɲa kɔnɔ. Minw bena kɛ Hakilijigi lajɛn na, olu bena kalan sɔrɔ Jehova ka kanuyaba koo la, kanuya min y’a lasun ka kunmabɔsara di hadamadenw kosɔn (Yuh. 3:16). U fana bena kalan sɔrɔ Masaya koo la, cogo min na Jehova bena tɛmɛ o fɛ k’a sagonata dafa dugukolo bɛɛ kan (Mat. 6:9, 10). U yɛrɛw bena a kɔrɔsi ko kanuya ni kelenya be Ala ka mɔgɔw ni ɲɔgɔnw cɛ, ani ko an b’u bisimila koɲuman (Zab. 133:1).
2 Bibulu kalandenw: Hakilijigi lajɛnmɔgɔ dɔw bena kɛ an ka Bibulu kalanden kuraw ye. An k’u yira balimaw la. An ka lɔgɔkun kɔnɔ lajɛnw kofɔ u ye, ani an ka Masaya Boon yɔrɔ dɔw yira u la. Kalan dibaga bena o ɲɔgɔnna mɔgɔw jija u ka to ka ɲɛtaga kɛ Alako ta fan fɛ. I be se ka tɛmɛ ale ka kumaw fɛ k’i ka kalandenw jaa gwɛlɛya.
3 Weleweledala sumalenw: Hakilijigi lajɛnmɔgɔ dɔw bena kɛ weleweledala sumalenw ye. I k’a bɔ i yɛrɛ la k’u fo ni dusudiya ye. I kana ɲiningali dɔw kɛ wala kuma dɔw fɔ minw be se k’a tigi degun. Wagati dɔɔni Hakilijigi lajɛn tɛmɛnen kɔ, diinan mɔgɔkɔrɔw ka kan ka taga bɔ sumalenw bɛɛ ye k’u fo sabu u y’u jija ka na lajɛn na, ani k’u weele ni dusudiya ye ka na kafo ka lajɛn nata la.
4 Minw nana bɔ an ye: Hakilijigi lajɛnmɔgɔ dɔw be se ka kɛ an lɔnbaga wala an somɔgɔ dɔw ye, an yɛrɛ ye minw weele. N’a sɔrɔ dɔw wɛrɛw ye weeleli sɛbɛ sɔrɔ kanpaɲi kɛrɛnkɛrɛnnin tuma la. N’i ye mɔgɔ dɔw ye i tɛ minw lɔn, i k’a bɔ i yɛrɛ la k’u fo, k’i tɔgɔ fɔ u ye ani k’u bisimila. A be se ka kɛ k’u ma na an ka lajɛn si la ka ye. Baro kɛtɔ n’u ye, i be se k’a lɔn cogo min na i bena taga bɔ u ye. Tile damanin Hakilijigi lajɛn kɔ, i yɛrɛ be se ka taga bɔ u ye wala k’u weele telefɔni na walisa ka kalan nege don u la kosɔbɛ ani ka bibulukalan kofɔ u ye.
5 Viziti kura kɛtɔ, an be se ka tɛmɛ Hakilijigi lajɛn kalan hakilinataw fɛ ka gafe Qu’enseigne la Bible ? yira u la. Misali fɛ, Hakilijigi lajɛn kalan dibaga bena Esayi 65:21-23 kalan. Viziti kura kɛtɔ, i be se k’o kalan kofɔ ani k’a fɔ ko: “A to ne ka kunmabɔsara ka duga wɛrɛw yira i la.” O kɔ, i ka gafe Qu’enseigne la Bible ? ɲɛɛ 4-5 lajɛ n’a tigi ye. Wala i be se k’a fɔ ko: “Mɔgɔ caaman b’a fɛ k’a lɔn tuma juman Esayi ka ciraya kuma bena dafa.” O kɔ, i ka sapitiri 9nan ka dakun 1-3 lajɛ n’a ye. Cogo wɛrɛ ye ka tɛmɛ kalan dibaga ka kumaw fɛ ka gafe Qu’enseigne la Bible ? yira, ani ka bibulukalan kɛcogo ɲɛyira.
6 Bibulu kalandenw, sumalenw ani mɔgɔ minw bena na bɔ an ye Hakilijigi lajɛn na, an bɛɛ kelen-kelen ka sababuw ɲini k’u dɛmɛ (Luka 22:19). An be jijali min kɛ ka dɔ fara an ka Masaya baara kan, siga t’a la Jehova bena o duga.
[Study Questions]
1. Seereya barikaman juman bena di mɔgɔw ma saan 2008 marisikalo tile 22nan na?
2. Bibulu kalanden minw nana Hakilijigi lajɛn na, an be se k’olu dɛmɛ cogo di?
3. Sumalen minw nana Hakilijigi lajɛn na, mun lo be se ka kɛ k’u jaa gwɛlɛya?
4. Mɔgɔ minw nana bɔ an ye, an kelen-kelen bɛɛ be se k’u dɛmɛ cogo di?
5. An be se ka mun lo fɔ walisa ka bibulukalan daminɛ?
6. An kɛtɔ ka Yesu ka cikan bato k’an hakili jigi ale saya koo la, o be sababu juman di an ma?