U bena seereya barikaman sɔrɔ
1. Ka fara Hakilijigi kalan kan, koo wɛrɛ juman be se ka lonanw kabakoya? A’ y’a ɲɛfɔ.
1 Tuma juman na? Krista saya Hakilijigi loon sufɛ. An be jijaliba kɛra ka mɔgɔw weele u ka na fara an kan o lajɛn na. Lonan minw bena na Hakilijigi lajɛn na, u bena min lamɛn, o dɔrɔn tɛna u kabakoya dɛ. Hakilijigi lajɛn dɔ banni kɔ, muso dɔ y’a lakali ale ye min ye: bɛɛ ka teriya, ani Masaya Boon ɲuman saniyalen, Seerew y’u yɛrɛ di ka min lɔ ani k’a ladon. O kama, an bɛɛ kelen kelen ka ɲi ka dɔ kɛ walisa lonanw ka seereya sɔrɔ o loonba sufɛ, min ɲɔgɔn tɛ yen saan kɔnɔ. Kalankɛla dɔrɔn ka koo tɛ.—Efes. 4:16.
2. An kelen kelen bɛɛ be se ka seereya kɛ lonanw ye cogo di?
2 An ka lonanw fo ni dusudiya ye: N’an be lonanw fo ni dusudiya ni yɛlɛmisɛn ye, o bena kɛ seereya ye u fɛ (Yuh. 13:35). Hali n’i tɛ se ka kuma n’u bɛɛ ye, i kɔni be se k’i gɛrɛfɛ mɔgɔw fo ni dusudiya ye ani k’i tɔgɔ fɔ u ye (Heb. 13:1, 2). I ka kɔrɔsili kɛ k’a filɛ n’a be komi lonan dɔw tɛ mɔgɔ si lɔn. N’a sɔrɔ u ye welelisɛbɛ dɔ sɔrɔ kanpaɲi tuma na. I be se k’u ɲininga ko: “Yala aw siɲɛ fɔlɔ lo ka na yan wa?” U weele u ka na sigi i kɔrɔ, ani n’u be ni ɲiningali dɔ ye i k’u jaabi. N’aw ka kafo ka kan ka yɔrɔ labila joona kafo wɛrɛ ye, i be se k’a fɔ ko: “Ne b’a fɛ k’a lɔn i be min miiri nin lajɛn koo la. Ne be se k’i ye tugun cogo di?”
3. An be se ka weleweledala sumalenw bisimila cogo di?
3 An ka weleweledala sumalenw bisimila: Siga t’a la, weleweledala sumalenw bena na. U dɔw be dan ka na Hakilijigi lajɛn na dɔrɔn saan o saan. An k’u bisimila, ani an k’a fɔ u ye ko u nako diyara an ye tiɲɛn tiɲɛn na (Rom. 15:7). Hakilijigi lajɛn tɛmɛnen kɔ dɔrɔn, diinan mɔgɔkɔrɔw be se ka taga bɔ u ye walisa k’u jija u ka to ka jɛn ni kafo ye. Mɔgɔw bena min mɛn ani u yɛrɛ bena min ye an ka “kɛwale ɲumanw” kosɔn, an be Ala deli o ka u caaman lasun ka Ala tando.—1 Piɛrɛ 2:12.