“Aw ka tugu a sen nɔ na” koɲuman
1 Yesu tun ma kalan kɛ karamɔgɔ babaw ka kalanso la, nka o n’a ta bɛɛ a kɛra Ciden ye min ɲɔgɔn ma sɔrɔ ka ye. A kɛra kunnadiya ye, Yesu ka cidenya baara kɛcogo sɛbɛra ka bila an nafa kosɔn. An ka kan ka “tugu a sen nɔ na” koɲuman walisa an ka kɛ ciden setigiw ye.—1 Piɛrɛ 2:21.
2 An k’a yira ko an be mɔgɔw kanu: Yesu tun b’a janto mɔgɔw la ni kanuya ye, o lo tun b’a lasun k’u kalan (Marka 6:30-34). An ka kiinw kɔnɔ, mɔgɔ caaman be “tɔɔrɔ” la ani u makoyaba be tiɲɛn na (Rom. 8:22). N’an be miiri tɔɔrɔba minw b’u kan ani cogo min na Jehova b’a mako don u la ni kanuya ye, o bena an lasun k’an timinandiya waajuli la (2 Piɛrɛ 3:9). Ka fara o kan, mɔgɔw bena u tulo malɔ koɲuman an ka kuma na, n’u y’a ye ko an be an janto u la ni kɔnɔgwɛ ye.
3 An ka tɛmɛ sababu bɛɛ fɛ ka kuma: Yesu tɛmɛna sababu bɛɛ fɛ ka kibaro duman fɔ mɔgɔw ye (Mat. 4:23; 9:9; Yuh. 4:7-10). O cogo kelen na, an b’a fɛ an fana labɛnnen ka to walisa ka kuma tiɲɛn koo la ni an be an ka loon o loon baaraw la. Balima dɔw be Bibulu ni gafew bila u bolo kɔrɔ walisa u ka se ka seereya kɛ baarakɛyɔrɔ, lakɔliso, sannikɛyɔrɔ, n’u be tagara tagama na, o n’a ɲɔgɔnnaw.
4 An ka sinsin Masaya koow kan: Yesu ka waajuli kuun tun ye Masaya kibaro duman lo ye (Luka 4:43). Hali n’an tɛ sin ka Masaya kofɔ an ka baro la, an ka kan k’a to an hakili la ko an ka kan ka lamɛnnikɛla dɛmɛ a k’a faamu ko a mako be o Masaya la. Hali n’an be duniɲa ka koo juguw kofɔ minw b’a yira ko an be laban loonw na, an b’a ɲini fɔlɔ ka kɛ mɔgɔw ye “minw bɛ na ni Kibaru Duman ye.”—Rom. 10:15.
5 An ka basigi Ala ka Kuma kan: Yesu ka cidenya baara kuru bɛɛ kɔnɔ a basigira Ala ka Kuma kan. A ma foyi fɔ a yɛrɛ sago la (Yuh. 7:16, 18). A tun be balo Ala ka Kuma la ani a tun b’a sira tagama walisa ka se k’a yɛrɛ tanga Sitanɛ ka kɔrɔbɔli ma (Mat. 4:1-4). Walisa an ka se ka mɔgɔw kalan bɛrɛbɛrɛ, fɔɔ an fana ka Bibulu kalan loon o loon ani k’a sira tagama (Rom. 2:21). N’an be ɲiningaliw jaabira cidenya baara la, an ka kan k’a to an lamɛnbaga k’a faamu ko an be min fɔra o basiginen lo Bibulu kan ani tuma o tuma n’a be se ka kɛ, an ka sin ka kalan kɛ Bibulu kɔnɔ. An b’a fɛ an lamɛnbaga k’a faamuya ko an be Ala ka miiriyaw lo fɔra, an yɛrɛ taw tɛ.
6 An k’a to an ka kalan ka mɔgɔw dusukun sɔrɔ: “Mɔgɔ si ma kuma i ko nin cɛ abada!” (Yuh. 7:46). Garadiw lo ye nin fɔ Yesu koo la tuma min na sarakalasebagaw kuntigiw ni Farisiɛnw y’u ɲininga ko mun na u ma se ka Yesu minɛ. Yesu ma dan ka kunnafoni dɔrɔn di mɔgɔw ma, nka a tun be kalan kɛ cogo dɔ la min b’a lamɛnbagaw dusukun sɔrɔ (Luka 24:24-32). A tun be tɛmɛ ntalen kuma nɔgɔmanw fɛ ka barika don a ka kumaw la (Mat. 13:34). Yesu m’a lamɛnbagaw degun ni kuma caaman ye (Yuh. 16:12). A tun tɛ mɔgɔw hakili sama a yɛrɛ kan nka Jehova lo kan. I ko Yesu, an fana be se ka kɛ karamɔgɔ ɲumanw ye nka fɔɔ an k’an “janto . . . mɔgɔw kalanni la.”—1 Tim. 4:16.
7 An k’an timinandiya hali ni mɔgɔw tɛ an lamɛn ani u b’an kɛlɛ: Hali k’a to Yesu ye kabako koow kɛ, mɔgɔ caaman ma sɔn k’a lamɛn (Luka 10:13). Yesu somɔgɔw yɛrɛ tun y’a miiri ko “a hakili wulila.” (Marka 3:21). O bɛɛ n’a ta, Yesu y’i timinandiya. A tora ni miiriya ɲuman ye sabu a tun lanen b’a la kosɔbɛ ko ale be ni tiɲɛn ye, o min be se ka mɔgɔw hɔɔrɔnya (Yuh. 8:32). Jehova ka dɛmɛ barika la, an fana cɛsirinen lo, an t’a fɛ ka waajuli baara dabila.—2 Kɔr. 4:1.
8 An k’an ɲɛnako dɔw saraka walisa ka waajuli kɛ bɛrɛbɛrɛ: A ka cidenya baara kosɔn Yesu m’a ɲini ka bololafɛnw diya bɔ (Mat. 8:20). A tun tɛ sɛgɛn waajuli la. Tuma dɔw la, a ye waajuli kɛ fɔɔ ka tile ben (Marka 6:35, 36). Yesu tun b’a lɔn ko wagati min dira a ma ka waajuli kɛ, o tun man ca. Komi “Waati surunyara”, an fana ka kan k’an yɛrɛ saraka, an ka wagati, an ka fanga ani bololafɛnw ta fan fɛ i ko Yesu.—1 Kɔr. 7:29-31.
9 Kerecɛn fɔlɔw tun ye ciden setigiw ye sabu u tun kalanna Yesu fɛ (Kɛw. 4:13). Yesu kɛra Ciden ye min ɲɔgɔn ma sɔrɔ ka ye. N’an b’a ladegi an fana bena se k’an ka cidenya baara dafa bɛrɛbɛrɛ.—2 Tim. 4:5.
[Study Questions]
1. An be se ka kɛ ciden setigiw ye cogo di?
2. Mun lo bena an dɛmɛ ka Krista ka kanuya ɲɔgɔn yira mɔgɔw la?
3. Sababu jumanw fɛ Yesu ye mɔgɔw waaju?
4. Cogo juman na an be se ka Ala ka Masaya kɛ an ka waajuli barokun ye?
5. An ka kan ka baara kɛ ni Bibulu ye cogo di walisa k’an ka cidenya baara dafa bɛrɛbɛrɛ?
6. Yesu ye mun lo kɛ walisa k’a lamɛnbagaw dusukun sɔrɔ?
7. Mun na Yesu y’i timinandiya cidenya baara la?
8, 9. An be se ka Yesu ladegi cogo di k’an yɛrɛ saraka kibaro duman kosɔn?