“Viens, suis-moi”

1. Kalo nataw la, kafo ka Bibulu kalan bena sababu juman di an ma?

¹ Ala Dencɛ Yesu ye ɲɛnamaya min kɛ dugukolo kan, o lakalila k’a pereperelatigɛ Evanzili naani kɔnɔ. Komi kerecɛnw ka kan ka “tugu a sen nɔ na,” o kama an ka ɲi k’an yɛrɛ labɛn koɲuman ani ka lamɛnni kɛ bɛrɛbɛrɛ tuma min na an bena gafe “ Viens, suis-moi ” kalan kafo ka Bibulu kalan na. O bena daminɛ marisi tile fɔlɔ lɔgɔkun na (1 Piɛrɛ 2:21; Marka 10:21). Yesu ka ɲɛnamaya faan minw be se k’an jija cidenya baara la, a ka ɲi an k’an mako don olu lo la kosɔbɛ.

2. An be se ka nafa juman sɔrɔ Yesu ka muɲuli kɛcogo la?

² Yesu ka ɲɛyirali: Waajuli kɛtɔ soo ni soo la, yala mɔgɔw ma deli ka ban k’i lamɛn wa? N’o ɲɔgɔn kɛra an na, o b’an dɛmɛ ka Yesu ka kuma nin faamu ka ɲɛ: “Ni u ye ne tɔɔrɔ, u na aw fana tɔɔrɔ.” ( Yuh. 15:20). Tiɲɛn lo, mɔgɔ minw be ban k’an lamɛn, u bɛɛ tɛ an kɛlɛbagaw ye. O bɛɛ n’a ta, ninsɔndiya min tun be Yesu kɔnɔna, o lo y’a dɛmɛ ka kɔrɔbɔli ni tɔɔrɔ sifaw bɛɛ muɲu. An bena Jehova diyanye ani sara min sɔrɔ an ka kantigiya sen fɛ, an fana be se k’an ɲɛɛ jɔlen to o kan. O lo bena an dɛmɛ ‘walisa an dusuw barika kana ban ani an kana sɛgɛn.’ (Heb. 12:2, 3; Ntal. 27:11). N’an b’an timinandiya cidenya baara la, an fana be se k’an jigi la a la ko Yesu Krista bena an dɛmɛ.—Mat. 28:20.

3. Yesu tun be cidenya baara jati cogo min na, an be se k’a ladegi o la cogo di?

³ “Ne cira o de kosɔn”: Yesu ɲɛnako fɔlɔ tun ye Masaya waajulibaara lo ye (Luka 4:43). A sɔnna k’a yɛrɛ di o kama. A y’a jati ko kɔrɔtɔko lo ani a ye sababuw ɲini tuma bɛɛ ka kuma Masaya koo la. Komi an ye Yesu ka kalandenw ye, ka tugu a seen nɔɔ na o b’an lasun ka mun lo kɛ? An ka loon o loon baaraw la, yala mɔgɔ dɔw be yen an be se ka kibaro duman fɔ minw ye wa? An k’a to Krista ka kanuya k’an jija k’an seko bɛɛ kɛ ka kibaro duman jɛnsɛn!—2 Kɔr. 5:14.

4. An be se k’an ka cidenya baara kɛcogo fisaya cogo juman na?

⁴ “Mɔgɔ si ma kuma i ko nin cɛ abada”: Yesu ka kalan kɛcogo tun be a lamɛnbagaw kabakoya ( Yuh. 7:46; Mat. 7:28, 29). Mun lo y’a to a ni karamɔgɔ tɔɔw tun tɛ kelen ye? A tun be mɔgɔw kalan tiɲɛnko minw na, u tun ka di a ye. Ani, a tun be mɔgɔ minw kalan a tun b’olu fana kanu. A ka kalan kɛcogo fɛɛrɛw tun ka ca fana. An kɛtɔ ka Karamɔgɔba Yesu ladegi, an be se k’an ka cidenya baara kɛcogo fisaya.—Luka 6:40.

5. Gafe “ Viens, suis-moi ” kalantɔ, an ka laɲinita ka kan ka kɛ mun lo ye?

⁵ Nin koow bɛɛ ye Yesu ka ɲɛnamaya faan nafamanba damanin dɔrɔn lo ye. An be se ka koo nafamanba wɛrɛ jumanw sɔrɔ tugun Yesu koo la? Yesu ka ɲɛnamaya kɛcogo lajɛtɔ kafo ka Bibulu kalan na, an k’a laɲini ‘ka Krista ka kanuya lɔn’ an kɛtɔ k’a ka kumaw n’a ka kɛwalew ladegi.—Efes. 3:19.