An ka sukasibagatɔw dusu saalo
1 Mɔgɔ kanulen ka saya be na ni dusukasiba ye mɔgɔw fɛ, sanko minw tɛ ni Masaya jigiya ye (1 Tes. 4:13). Tuma caaman na mɔgɔw b’u yɛrɛw ɲininga ko: ‘Mun na mɔgɔ be sa? Mɔgɔ salenw be taga min? Yala ne bena n’ diyanye mɔgɔ salen ye tugun wa? Waajuli kɛtɔ, an be mɔgɔ dɔw sɔrɔ minw be u somɔgɔ wala u teri dɔ suu kasira. Ladili dɔw filɛ minw b’o ɲɔgɔnna mɔgɔw dusu saalo.—Es. 61:2.
2 Soo ni soo: Lamɛnnikɛla dɔ be se k’a fɔ an ye ko banni kɛra ale fɛ a ma mɛɛn. Yala a dusu tiɲɛnen lo kojugu wa? Yala a somɔgɔ dusukasilenw ka ca luu kɔnɔ wa? Nin koo ɲɔgɔnw na, a ka fisa an kana kuma janya (Waaj. 3:1, 7). N’a sɔrɔ an be se ka sangafoli kɛ a ye, ka sɛbɛnin, zurunali wala kitabunin bɛnnen dɔ di a ma ani ka sira ɲini ka taga. O kɔ, an be se ka segi ka na wagati fisaman dɔ la ka baro kɛ n’a ye bɛrɛbɛrɛ Bibulu ka dususalo kuma dɔw kan.
3 Siɲɛ wɛrɛw la, n’a sɔrɔ an bena a ye ko an be se ka kuma janya ka tɛmɛ fɔlɔ ta kan. Hali ni wagati tɛ ka ngalon miiriyaw sɔsɔ, Bibulu ka layidu kuma minw ɲɛsinna sukununi ma an be se k’o dɔw kalan n’a ye (Yuh. 5:28, 29). Wala, Bibulu be min fɔ suuw cogoya kan, an be se k’o yira a la (Waaj. 9:5, 10). Bibulu be sukununi minw lakali, u fana be se ka mɔgɔ dusu saalo (Yuh. 11:39-44). Fɛɛrɛ wɛrɛ ye ka jigiya kumaw lajɛ, mɔgɔ kantigiman Job ye minw fɔ Jehova ye (Job 14:14, 15). Sanni an ka taga, an be se ka nin kitabuninw di a ma: Que devient-on quand on meurt ?, Quand la mort frappe un être aimé. . . An be se fana ka kitabunin wala sɛbɛnin bɛnnen wɛrɛw di a ma. Walima an be se ka gafe Qu’enseigne la Bible to a fɛ, k’a hakili sama ka taga sapitiri 6nan ka kalan kan, ani k’a fɔ a ye ko siɲɛ wɛrɛ an bena baro kɛ o kan bɛrɛbɛrɛ.
4 Sababu wɛrɛw fɛ: Ni sukoɲɛ dɔw be kɛra Masaya Boon kɔnɔ, yala mɔgɔ dɔw bena kɛ yen, minw tɛ Jehova seerew ye wa? Gafe minw be mɔgɔ dusu saalo, olu be se ka labila o mɔgɔw ye. A diyara mɔgɔ dɔw ye ka kɛ n’an ka gafe bɛnnen dɔw ye u bolo kɔrɔ sangabonw kɔnɔ walisa k’u di sukasibagatɔw ma. Tuma dɔw la, sanga kibarow be sɛbɛ kunnafoni sɛbɛw kɔnɔ. O kɛra sababu ye balima dɔw ye dususalo lɛtɛrɛ kunkurunin dɔ sɛbɛ k’a ci banbagatɔ ka mɔgɔw ma. O cogo la, cɛɛ muso salen dɔ ye lɛtɛrɛ dɔ sɔrɔ, sɛbɛninw tun b’a kɔnɔ. A n’a denmuso tagara weleweledala ka soo k’a ɲininga ko: “Yala e lo ye lɛtɛrɛ nin ci ne ma wa? Ayiwa, ne b’a fɛ ka dɔ fara n’ ka lɔnniya kan Bibulu koo la!” O cɛɛ n’a denmuso sɔnna bibulukalan na, ani u y’a daminɛ ka taga kafo ka lajɛnw na.
5 Waajulikɛla 7:2 ko: “Ka taa sangabon dala, o ka fisa ni dumuniba so kɔnɔ taali ye.” Tuma caaman na, sukasibaga ka teli ka Ala ka kuma lamɛn ka tɛmɛ mɔgɔ ɲagalilen kan. An bɛɛ labɛnnen ka kan ka to ka sababu ɲumanw ɲini walisa ka mɔgɔw dusu saalo minw b’u ka kanulen dɔ suu kasira.
[Study Questions]
1. Mun na sukasibagatɔw mako be dususalo la?
2. Ni lamɛnnikɛla dɔ y’a fɔ an ye ko ale dusu kasilen lo, yala an ka kan ka kuma janya tuma bɛɛ wa?
3. N’a be se ka kɛ, vɛrise jumanw lo an be se k’a yira lamɛnnikɛla dusukasilen na?
4. Sababu wɛrɛ jumanw b’an fɛ ka mɔgɔw dusu saalo?
5. Mun na an ka kan ka sababuw ɲini walisa ka mɔgɔ dusukasilenw dusu saalo?