Yala i b’i ka denbaya labɛnna kisili kama wa?
1 Bibulu ka ciraya kumaw be dafara. O b’a yira ko nin duniɲa jugu ban tuma surunyana kosɔbɛ. Wagati min tun kɛra sanni sanjiba ka na, an be o ɲɔgɔnna wagati gwɛlɛn lo kɔnɔ sisan (Mat. 24:37-39). Duniɲa kɔrɔ halaki tuma na, Nuhun kisira sabu a “taamana Ala fɛ” (Jen. 6:9). N’a sɔrɔ Nuhun y’a ka denbaya kalan Jehova ka siraw la sabu olu fana kisira. Cogo juman na an be se ka Nuhun ladegi ani k’an ka denbaya labɛn walisa ka kisi nin duniɲa jugu ban tuma na?
2 Tilennenya koo waajulikɛla: Nuhun y’i timinandiya ka “tilennenya ko waajuli kɛ” wagati min kɔnɔ, bɛrɛ m’o jɛn saan 50 la (2 Piɛrɛ 2:5). N’a sɔrɔ mɛlɛkɛ murutilen minw ye hadamadenw cogoya ta, olu ye Nuhun ka wagati mɔgɔw lasun u ka yɛlɛ bɔ a la a ka waajuli kosɔn. Tuma caaman na, mɔgɔw be yɛlɛ bɔ an na ani u t’u mako don an ka cidenya baara la. O b’a yira ko nin duniɲa sera a laban yɔrɔ la (2 Piɛrɛ 3:3, 4). Nka bi mɔgɔ caaman be dan na ni Nuhun ka wagati mɔgɔw ye: u be sɔn an ka jijali baara ma ani u b’u kuun sin Jehova ka batoli yɔrɔ ma (Es. 2:2). An bena ‘an yɛrɛ kisi k’an lamɛnbagaw fana kisi’ nka fɔɔ an k’an timinandiya (1 Tim. 4:16). A kɔrɔtalen lo dɛ bangebagaw k’u deenw kalan ko waajuli baara ye kɔrɔtɔ koo ye! U k’o kɛ kuma ni ɲɛyiraliw fɛ.—2 Tim. 4:2.
3 “Nuhun y’a kɛ ten” tigitigi: Nuhun n’a ka denbaya ye Jehova ka cikanw sira tagama koɲuman. O lo kɛra sababu ye u kisira (Jen. 6:22). Bi a kɔrɔtalen lo fana an ‘labɛnnen ka to ka sɔn’ Bibulu ni Jɔncɛ kantigiman k’an ɲɛminɛ (Yak. 3:17, NW). Denbaya mɔgɔ dɔw hakili b’a la cogo min na facɛman tun be Jehova ka ɔriganisasiyɔn ka ladiliw sira tagama. Misali fɛ, a tun be gwakalan kɛ lɔgɔkun o lɔgɔkun, ani a tun be taga n’a ka denbaya ye waajuli kɛyɔrɔ la wikɛniw bɛɛ la. Lɔgɔkun o lɔgɔkun, a tun b’a jija ka waajuli kɛ ni a deenw la kelen ye. Komi a y’i timinandiya ka koow “kɛ ten” tigitigi, o ye nɔɔba to a deenw kan ani o denmisɛn mɔgɔ wɔɔrɔ bɛɛ kɔrɔbayara ka kɛ Jehova sagokɛla kantigimanw ye.
4 Nin duniɲa laban bena bari ka cun (Luka 12:40). An kɛtɔ ka Nuhun ladegi ani ka kɛ ni limaniya ye kisili kama, siga t’a la, an ni an ka denbaya labɛnnen bena sɔrɔ.—Heb. 11:7.