Tɔnbolo ka bataki

Masaya weleweledala kanulenw:

“Aw ka aw ɲɛw kɔrɔta ka forow filɛ. Suman kɔgɔra, a tigɛ tuma sera ka ban” (Yuh. 4:35). Yesu ninsɔndiyalen ye nin kuma fɔ a ka kalandenw ye suman tigɛ koo la Alako ta fan fɛ: o kɔrɔ, ka mɔgɔw lajɛn minw be i ko sagaw, ɲɛnamaya banbali kosɔn. Koɲumanba lo dɛ k’a ye ko yɔrɔ bɛɛ la, Jehova sagokɛlaw ɲɛɛ gwannen lo mɔgɔ sɔbɛw ɲinini na ani u be kɔrɔtɔ k’u ɲɛminɛ ka taga “don sow kɔnɔ” walisa u ka tanga Ala ka ɔriganisasiyɔn kɔnɔ!—Esayi 26:20.

Misali fɛ Kameruni kɔnɔ, saan o saan, zuwɛnkalo ni novanburukalo cɛ, weleweledalaw be taga duguw la yɔrɔ minw na waajuli tɛ kɛ tuma bɛɛ. Salon, o kalo wɔɔrɔ kɔnɔ dugu 87 kalifara jɛnkulu 124 ma (weleweledala 757). Waajuli kɛtɔ u ye gafe 81 652, ani gafenin 106 008 to mɔgɔw fɛ. Ɲinan, kabi zuwɛnkalo, weleweledala 1 267 ye u tɔgɔ di walisa ka taga baara kɛ dugu 95 kɔnɔ. Tɔnbolo ye gafenin 300 000 ani gafe 46 000 ci o weleweledalaw jɛnkulu 141 ma. Denbaya kuturuw, ani cɛɛ ni muso gwanaw, sandaw bɛɛ mɔgɔw ye u niin don o suman tigɛ kɛrɛnkɛrɛnnin na.

Togo jamana na, weleweledala 600 cira ka taga waajuli kɛ o ɲɔgɔnna duguw la. Kalo saba kɔnɔ, u ye gafe 5 830 ni gafenin 27 220 ani zurunali 18 799 to mɔgɔw fɛ. Yɔrɔ caaman na u ye foroba kalan kɛ ani lamɛnnikɛlaw hakɛ kɛra mɔgɔ 2 830 ye. Taga tuma sera tuma min na, o kɛra makari koo ye dɛ, dugu mɔgɔw b’u deli ko: “Aw kana ɲina an kɔ. Aw ka sabari ka segi ka na!”

O labɛn ɲɔgɔnna kɛra Burkina Faso ani balimacɛ fila cira ka taga kalo saba kɛ dugu dɔ la. U ye gafe 249 ni gafenin 597 ani zurunali 1 432 to mɔgɔw fɛ. Kalo sabanan na u ye bibulukalan 37 kɛ ni mɔgɔw ye. O cogo la daaw yɛlɛla walisa kudayi waajulikɛlaw ka to ka Jehova ka diyanye fɛɛnw lajɛn (Agize 2:7). Tiɲɛn na, “suman kɔgɔra” yɛrɛ le. Misali fɛ, Mali jamana na 43% farala mɔgɔ batiselenw hakɛ kan. O wagati kelen na Gine Biso ta kɛra 50% ye.

O kama ɲina, yala i be labɛn kɛra walisa k’i niin don cogo kɛrɛnkɛrɛnnin na “suman tigɛ” la wa? Siga t’a la dɛ: “Suman tigɛta ka ca, nka baarakɛlaw ka dɔgɔ” (Matiyu 9:37)! An dusu ka di ka aw bɛɛ fo, balimacɛw ni balimamusow ani an b’a fɔ ko: Aw ni baara! Jehova k’an bɛɛ duga waajuli baara saan nin kɔnɔ n’an be wagati caaman ani fangaba kɛ suman tigɛ la sabu tiɲɛn na “suman kɔgɔra, a tigɛ tuma sera ka ban.”

Aw balimaw,

Tɔnbolo ka biro