Aw Ka Ɲiningaliw Jaabiliw

◼ Bangebagaw be to ka wagati min kɛ gwakalan na, yala u fila bɛɛ be se k’o jati u ka rapɔɔri kɔnɔ wa?

Hali ni cii dira facɛmanw lo ma fɔlɔ k’u deenw “lamɔ ni Matigi ka kololi ni a ka laadili ye”, bangebaga fila bɛɛ b’u niin don u deenw kololi koo la (Efɛs. 6:4). Bibulu be denmisɛnw jija ko: “Ne denkɛ, i ka i fa ka kalan lamɛn, i kana ban i ba ka laadili ma” (Ntal. 1:8). Bangebagaw ka deen kololi fanba dɔ ye ka bibulukalan kɛ n’u ye gwa kɔnɔ.

Fɔlɔ la, bangebaga min tun be gwakalan ɲɛminɛ ka deen kalan min ma batise fɔlɔ, ale kelenpe dɔrɔn lo tun be kalan lɛri jati a ka rapɔɔri kɔnɔ hali ni bangebaga tɔɔ kelen tun b’a daa don fana kalan na. Nka o yɛlɛmana sisan. Gwakalan kɛtɔ, ni bangebaga fila bɛɛ b’u daa don deen kalanni koo la, u fila bɛɛ be se k’o wagati jati u ka rapɔɔriw kɔnɔ, nka a kana tɛmɛ lɛri kelen kan. Tiɲɛn na, bangebagaw be to ka wagati min ta k’u deenw kalan lɔgɔkun kɔnɔ, o ka ca ni lɛri kelen ye. Denmisɛnw kololi tɛ ɲɛ ni bangebaga fila bɛɛ tɛ to ka jijali kɛ o la (Dut. 6:6-9). Nka u ka kalola rapɔɔri ka kan k’a yira u ye min kɛ fɔlɔ cidenya baara la kiinw kɔnɔ. O kama, gwakalan wagati min be jati rapɔɔri kɔnɔ, o man kan ka tɛmɛ lɛri kelen kan lɔgɔkun kɔnɔ hali ni kalan be mɛɛn ka tɛmɛ lɛri kelen kan, hali n’a be kɛ siɲɛ damanin lɔgɔkun kɔnɔ, wala a be kɛ ni deenw ye u dan na dan na. Bangebaga kelenpe dɔrɔn lo bena o bibulukalan jati a ka rapɔɔri kɔnɔ, ani ka viziti kura kelen dɔrɔn jati lɔgɔkun kelen-kelen min kɔnɔ kalan kɛra.