Aw Ka Ɲiningaliw Jaabiliw

◼ Yala gwakalan rapɔɔri ka kan ka kɛ ka di kafo ma wa?

Ni kerecɛn bangebaga dɔ be gwakalan kɛra ani denmisɛnw fana be yen, minw ma batise fɔlɔ, o bangebaga be se ka kalan rapɔɔri jati kɛ: lɛri kelen lɔgɔkun o lɔgɔkun, viziti kelen lɔgɔkun o lɔgɔkun, ani bibulukalan kelen kalo o kalo. A tɛ tɛmɛ o kan hali ni kalan be mɛɛn ka tɛmɛ lɛri kelen kan, n’a be kɛ siɲɛ caaman lɔgɔkun kɔnɔ, wala ni kalan be kɛ ni denmisɛnw kelen kelen ye daan na.—A filɛ gafe Notre ministère ɲɛɛ 105nan kɔnɔ.

Ni somɔgɔw bɛɛ batisera ka ban, o la, lɛriw ani kalan yɛrɛ tɛ jati ka fara rapɔɔri kɔnɔ (fɔɔ ni deen dɔ ka gafe filanan kalan ma ban fɔlɔ a ka batɛmu kɔ). Koow be kɛ ten sabu, kafo ka waajuli rapɔɔri kuun fɔlɔ ye k’a yira baara min kɛra walisa ka kibaro duman waaju ani ka mɔgɔw kalan, minw m’u yɛrɛkun di Jehova ma ani u ma batise fɔlɔ ka kɛ Jehova sagokɛlaw ye (Mat. 24:14; 28:19, 20). Nka o tɛ foyi bɔ gwakalan nafa la. A kɔrɔtalen be k’o kalan kɛ tuma o tuma.

Kerecɛn bangebagaw ka kunkanbaara ye ka kalan kɛ n’u denmisɛnw ye. Minw mako be dɛmɛ na walisa ka gwakalan sigi seen kan, wala k’a kɛcogo fisaya, u be se ka ɲɛsin diinan mɔgɔkɔrɔw ma. Ni koow cogoya kosɔn, a ka fisa ko weleweledala wɛrɛ ka kalan kɛ ni denbaya dɔ ka deen ye, deen min ma batise fɔlɔ, u ka diinan mɔgɔkɔrɔw ɲɛbila wala waajulibaara kɔrɔsibaga ɲininga fɔlɔ. N’olu sɔnna, kalan kɛbaga bena o kalan kɛ ani a bena a rapɔɔri di i n’a fɔ bibulukalan wɛrɛw.

Ka denmisɛnw kolo Jehova ka siraw la, o be wagati caaman ta ani jijali caaman be kɛ, minw tɛ ye rapɔɔri kɔnɔ (Dut. 6:6-9; Ntal. 22:6). Kerecɛn bangebagaw ka kan ni tandoliw ye, sabu, u be kunkanbaara min dafa, a ka gwili: ka denmisɛnw lamɔ “ni Matigi ka kololi ni a ka laadili ye”.—Efes. 6:4.