I be se ka kɛ karamɔgɔ ye!
1 Barajiba be sɔrɔ cidenya baara faan minw na, u la kelen ye ka mɔgɔ dɔ kalan tiɲɛn koo la. K’a ye k’o tigi sɔnna Masaya kibaro la ani k’a dɛmɛ a k’a magwɛrɛ duniɲa kuru bɛɛ Masaba la, o ye wale ye min ka kan ka jati kooba ye ( Yak. 4:8). Kɔngɔ be mɔgɔ dɔw la tiɲɛnko ta fan fɛ. K’o ɲɔgɔnna mɔgɔ dɔ kalan tiɲɛn koo la ani k’a ye ko a y’a daminɛ ka yɛlɛmaniba don a sɔɔn n’a sawura n’a tagamacogo la, o ye koo ye min ka kan ka kɛ weleweledala kelen-kelen bɛɛ ka laɲinita ye.—Mat. 28:19, 20.
2 I jigi la Jehova kan: Fɔlɔfɔlɔ la, Jehova sagokɛla kantigiman dɔw tun b’a miiri ko see t’u ye k’u ka cii dafa. Musa, Jeremi, Amos ani mɔgɔ gwansan wɛrɛw y’u jigi la Jehova Ala kan. O kama, u ye see sɔrɔ u ka sigasigali wala u ka barikantanya kan ani u sera ka baara kabakoman kɛ (Ekis. 4:10-12; Jer. 1:6, 7; Amos 7:14, 15). Ciden Pol fana ye “ja gɛlɛya” sɔrɔ, o kɔrɔ, a sera ka kuma ni kɔnɔgwɛ ye. A y’o sɔrɔ cogo di? A ko o kɛra “Ala” lo barika la (1 Tes. 2:2). An mako be dɛmɛ, hakilitigiya ni fanga minw na, an bɛɛ be se k’an jigi la Jehova kan ko a bena o di an ma walisa an ka se ka bibulukalanw kɛ minw be ɲɛtaga sɔrɔ.—Es. 41:10; 1 Kɔr. 1:26, 27; 1 Piɛrɛ 4:11.
3 I ka sɔn fɔrɔmasɔn ma: An Karamɔgɔba, Jehova Ala, be tɛmɛ Alako kalanw fɛ tuma o tuma ka fɔrɔmasɔn di an ma. O b’an dɛmɛ an ka kɛ karamɔgɔ bɛrɛbɛrɛw ye (Es. 54:13; 2 Tim. 3:16, 17). An ka sɔn o fɔrɔmasɔn ma an kɛtɔ k’an seko bɛɛ kɛ ka dɔ fara an ka Bibulu faamuyali kan ani k’an ka kalan kɛcogo fisaya n’an be Bibulu ka tiɲɛnkow ɲɛfɔra. Kafo ka lajɛnw bɛɛ b’an degi an ka baara kɛ ni Bibulu yɛrɛ ye walisa ka mɔgɔw kalan. Nka o kɔni ye Ala ka Mara cidenyabaara lakɔli ani waajuliko lajɛn ka laɲinita fɔlɔ ye.
4 Hali ni Alako kalan dunbaw lo, i jija ka fɛɛrɛ dɔw degi walisa ka mɔgɔw kalan cogo nɔgɔman na. Gafe École du ministère, ɲɛɛ 227 b’a ɲɛfɔ ko: “N’i b’a fɛ mɔgɔ wɛrɛw k’i ka kalan faamu, fɔɔ i yɛrɛ k’a faamu koɲuman fɔlɔ.” Ka lakalitaw kɛ lajɛnw na, o fana b’an dɛmɛ ka hakilinata jɔnjɔnw don an kuun na sanko ka se ka baara kɛ n’u ye loon wɛrɛ. O kama, i yɛrɛ labɛn ka ɲɛ. O la, i jigi bena sigi koɲuman ko see b’i ye ka mɔgɔw kalan.
5 Siga t’a la, kabi a daminɛ na kerecɛn cidenw ye kalan sɔrɔ u ni ɲɔgɔn cɛ tuma min na u tun be jɛn ka mɔgɔw kɛ Krista ka kalandenw ye (Luka 10:1). N’a be se ka kɛ, i ka weleweledala setigiw, piyɔniyew, diinan mɔgɔkɔrɔw ani kafokulu kɔrɔsibagaw bila sira u ka bibulukalanw na. I janto k’a filɛ cogo min na u be baara kɛ ni an ka kalankɛ gafew ka ntalen nɔgɔmanw, jaaw n’a ɲɔgɔnnaw ye walisa ka Bibulu ka tiɲɛn kalanw ɲɛfɔ. Ladiliw ɲini u fɛ, o minw be se k’a to i k’i ka kalan kɛcogo fisaya (Ntal. 1:5; 27:17). An k’o fɔrɔmasɔn bɛɛ filɛ nafaman fɛɛnw ye sabu u bɔra Jehova lo yɔrɔ.—2 Kɔr. 3:5.
6 An k’an jigi la Jehova kan, ani a be fɔrɔmasɔn min di an ma, an ka nafa sɔrɔ o la. An ka delili kɛ sanko ka ɲɛtaga sɔrɔ (Zab. 25:4, 5). E fana be se ka ninsɔndiya sɔrɔ ka mɔgɔ dɔ dɛmɛ a ka kɛ Ala ka Kuma karamɔgɔ ye i ko e yɛrɛ!
[Study Questions]
1. Sababuba juman lo dira weleweledala kelen-kelen bɛɛ ma?
2. Mun na dɔw be sigasiga ka bibulukalan kɛ ni mɔgɔw ye? Mun lo be se k’u dɛmɛ ka see sɔrɔ o gwɛlɛya kan?
3, 4. Fɔrɔmasɔn juman lo be sen kan o min b’an dɛmɛ ka mɔgɔw kalan Ala ka Kuma na?
5. Fɔrɔmasɔn wɛrɛ juman lo b’an fɛ kafo kɔnɔ n’a be se k’an dɛmɛ ka ɲɛtaga sɔrɔ ka kɛ karamɔgɔw ye?
6. An mako jɔnjɔn be mun lo la sanko ka kɛ Ala ka Kuma karamɔgɔw ye?