Bibulukalanw kɛcogo ni gafe “ Amour de Dieu ” ye

1. Gafe “ Amour de Dieu ” dilan kuun ye mun ye?

¹ Tile saba lajɛnba la min kuun tun ko “An k’a to Hakili Senu k’an ɲɛminɛ”, an ɲagalila kosɔbɛ ka gafe “ Gardez-vous dans l’amour de Dieu ” sɔrɔ. I ko a tun fɔra cogo min na, gafe nin dilanna walisa k’an dɛmɛ ka Jehova ka sariyaw lɔn tagamacogo ta fan fɛ ani k’u koo diya an ye. A ma dilan walisa ka mɔgɔw dɛmɛ u ka Bibulu ka kalan jɔnjɔnw lɔn. An tɛna a kofɔ mɔgɔw ye soo ni soo waajuli kɛtɔ.

2. An bena baara kɛ ni gafe nin ye cogo di, ani an bena a kalan ni jɔn lo ye?

² O gafe bena kɛ gafe filanna ye bibulukalan kama ni kalanden tilara gafe Qu’enseigne la Bible ? kalan na. An k’a to an hakili la ko bɛɛ ka ɲɛtaga tɛ kelen ye Alako ta fan fɛ. Bibulukalan kelen-kelen bɛɛ ka kan ka kɛ ka kɛɲɛ ni kalanden ka faamuli cogo ye. An k’an janto a la ko kalanden be kalan faamu ka ɲɛ. Mɔgɔ dɔw ye bibulukalan kɛ an ka gafe caaman kɔnɔ ka tɛmɛ, nka u tɛ na kafo ka lajɛnw na. U ye Bibulu ka tiɲɛn kalan minw sɔrɔ, u b’a yira ka gwɛ fana ko u tɛ fɛ k’u ka ɲɛnamaya kɛ ka kɛɲɛ n’o ye. Tuma caaman na, an man kan ka bibulukalan daminɛ ni o mɔgɔw ye gafe nin kɔnɔ.

3. An ka kan ka mun lo kɛ n’a y’a sɔrɔ an be bibulukalan kɛra gafe Adorez Dieu kɔnɔ?

³ Ni aw be bibulukalan kɛra gafe Adorez Dieu kɔnɔ ani kalansen damanin dɔrɔn tora, n’a sɔrɔ aw bena a latigɛ ka o gafe bɛɛ kalan ka ban. O la, a’ ye kalanden jija a ka gafe “ Amour de Dieu ” kalan a yɛrɛ ma. N’o tɛ, a ka fisa ka kalan yɛlɛma o gafe kura daminɛ na. Barokun wɛrɛ minw be sɔrɔ gafe nin laban na ka fara sapitiriw yɛrɛ kan, i ko gafe Qu’enseigne la Bible ?, waajibi tɛ k’u lajɛ ni kalanden ye.

4. An ka kan ka mun lo kɛ ni kalanden batisera k’a sɔrɔ a ma gafe Qu’enseigne la Bible ? ani gafe “ Amour de Dieu ” kalan k’u ban?

⁴ Ni kalanden batisera k’a sɔrɔ a ma o gafe fila kalan ka ban, o tuma na, kalan ka kan ka to ka kɛ fɔɔ gafe “ Amour de Dieu ” laban na. Hali ni kalanden batisera, i be se k’o bibulukalan ni lɛri ni viziti kura jati i ka rapɔɔri kɔnɔ. Weleweledala min be i bila sira ani k’a daa don kalan na, ale fana be se k’a wagati jati a ka rapɔɔri kɔnɔ.

5. Weleweledalaw minw ye waajuli dabila kabini wagati damanin, baara be se ka kɛ cogo di ni gafe “ Amour de Dieu ” ye walisa k’u dɛmɛ?

⁵ Ni kafo ka waajuliko ɲɛnabɔbagaw jɛnkuluden dɔ ye cii di i ma ko i ka bibulukalan kɛ ni weleweledala dɔ ye min sumana waajulibaara la, n’a sɔrɔ a bena a ɲini i fɛ i ka sapitiri tigitigi dɔw kalan n’a ye gafe “ Amour de Dieu ” kɔnɔ. Waajibi tɛ k’u bibulukalan ɲɔgɔnw kɛ wagati jan kɔnɔ. Gafe kura nin ye labɛn ɲuman ye an fɛ dɛ! A dilanna walisa k’an dɛmɛ an ka “to Ala ka kanuya la.”—Jude 21.