An ka cidenyabaara sababu fɛ an b’a yira ko an be Ala kanu
1. Ala kanu ye Yesu lasun ka mun lo kɛ?
1 Kanuya lo ye Yesu lasun k’a ka cidenya baara dafa. Yesu ka cidenya baara faan bɛɛ be a ka kanuya yira ka gwɛ Jehova ta fan fɛ. Yesu y’a fɔ ko: “Nka nin diɲɛ ka kan k’a dɔn ko ne bɛ ne Fa kanu, ani ne Fa ye ci min fɔ ne ye, ne bɛ o de kɛ.” ( Yuh. 14:31). Komi an be Yesu seen nɔɔ lo ta, nɛɛma lo an fɛ fana k’a yira ko an be Ala kanu kosɔbɛ an ka cidenya baara sababu fɛ.—Mat. 22:37; Efɛs. 5:1, 2.
2. Jehova kanuya be nɔɔ juman to an ka cidenya baara kan?
2 “I tɔgɔ ka saniya”: N’an b’an seko bɛɛ kɛ ka tɛmɛ sababuw bɛɛ fɛ ka kuma mɔgɔw fɛ Jehova n’a ka Masaya koo la, an b’a yira ko an be Ala kanu. O be kɛ sababu ye fana k’a tɔgɔ saniya (Zab. 83:19; Ezek. 36:23; Mat. 6:9). I ko Yesu y’a yira cogo min na, an fana b’a yira an ka cidenya baara fɛ ko a nege b’an na kosɔbɛ tuma o tuma ko Jehova tɔgɔ ka saniya ani a sago ka kɛ.—Mat. 26:39.
3. N’an be Jehova kanu, o b’an dɛmɛ ka se sɔrɔ gwɛlɛyaw kan cogo di?
3 Kanuya b’an lasun an ka see sɔrɔ gwɛlɛyaw kan: N’an be Jehova kanu, foyi si tɛ se k’an bali k’an ka baara kɛ (1 Kɔr. 13:4, 7). Yesu ye gwɛlɛya caaman sɔrɔ minw tun be se k’a fari faga a ka cidenya baara la. Nka, komi a tun be Jehova kanu kosɔbɛ ani a tun b’a fɛ k’a sago kɛ, o lo tun b’a dɛmɛ ka see sɔrɔ gwɛlɛyaw bɛɛ kan (Marka 3:21; 1 Piɛrɛ 2:18-23). An fana be gwɛlɛya caaman minw sɔrɔ, Ala kanuya lo be se k’an dɛmɛ ka see sɔrɔ u kan. N’an be tugu Krista ka ɲɛyirali kɔ, an be se ka la a la ko foyi tɛna an fari faga an ka cidenya baara la. N’an somɔgɔw b’an kɛlɛ, ni kɛnɛyako ni kɔrɔyako b’an kan wala ni mɔgɔ caaman t’u mako don an na, o be se ka nɔɔ to an kan. Nka o t’an bali k’an seko bɛɛ kɛ k’an ka cidenya baara dafa bɛrɛbɛrɛ k’a yira ko an be Jehova kanu.
4. N’an be Jehova kanu, o be nɛɛma juman di an ma?
4 Kanuya barika ka bon. Duga lo an fɛ ka se k’a yira an ka cidenya baara sababu fɛ ko an be Ala kanu n’an dusukun bɛɛ ye (1 Kɔr. 13:13). Jehova tɔgɔ bena saniya siɲɛ kelenpe wagati min na, o wagati be sera joona-joona. O lo kosɔn, an k’a to an ka “kanuya ka bonya ka ta’a fɛ.”—Fil. 1:9; Mat. 22:36-38.