An k’an janto kaan wɛrɛ fɔbagaw la
1. Waajuli kɛtɔ kafo ka kiinw kɔnɔ, an be ni sababu juman ye?
1 Yesu Krista tun kɔnna k’a fɔ ko kibaro duman waajuli tun bena kɛ duniɲa yɔrɔw bɛɛ la “ka kɛ siyaw bɛɛ seere ye.” Minw bɛɛ b’u seen don waajuli baara la ani mɔgɔw kalanni na, u b’a lɔn k’o kumaw kɔrɔtalen lo (Mat. 24:14; 28:19, 20). An kɛtɔ ka waajuli kɛ ani ka mɔgɔw kɛ Krista ka kalandenw ye, an be se ka jamana wɛrɛ mɔgɔw ani siya dɔw sɔrɔ minw be kaan wɛrɛ fɔ. Olu fana ka kan ka nɛɛma sɔrɔ ka Masaya kibaro lamɛn ani k’u cɛɛ siri ka tugu tiɲɛn kɔ sanni Jehova ka loon ka se, o min ye jatigɛ loon ye (Mal. 3:18). An ka kafo ka kiinw kɔnɔ an be se k’an janto kaan wɛrɛ fɔbagaw la cogo di?
2. N’an be kuma kaan wɛrɛ fɔbagaw fɛ, an be Jehova ladegi cogo di?
2 An ka kaan wɛrɛ fɔbagaw jati i ko Jehova b’u jati cogo min na: Jehova tɛ mɔgɔ woloma, a be bɛɛ kanu. N’an b’a fɛ k’a ladegi o cogo la, an ka kan k’a ɲini sɔbɛ la k’an ka kiin mɔgɔw bɛɛ dɛmɛ ka lɔnniya tigitigi sɔrɔ tiɲɛn Ala Jehova koo la, u ka kaan mana kɛ min o min ye (Zab. 83:19; Kɛw. 10:34, 35). Hali n’an ɲɛnako fɔlɔ ye ka kuma an ka kafo kaan fɔbagaw fɛ, an fana ka kan k’an janto kaan wɛrɛ fɔbagaw la ani ka cogoya ɲini ka Masaya kibaro fɔ u ye. N’an t’o kɛ, o bɛnnen tɛ Jehova sagonata ma, o min ye ka seereya di siyaw bɛɛ mɔgɔw ma. N’o lo, mɔgɔ minw tɛ kafo ka kaan fɔ, an be se k’u dɛmɛ cogo di?
3. Gafe nafaman juman labɛnna an ye, ani an be se k’an yɛrɛ labɛn cogo di ka baara kɛ n’a ye?
3 An ka baara kɛ ni gafe Une bonne nouvelle pour des gens de toutes nations ye: O gafe labɛnna walisa k’an dɛmɛ n’an ye kaan wɛrɛ fɔbaga dɔ kunbɛn. An ka kɛ n’a ye an kun tuma bɛɛ, an k’a ɲini k’a cogoya lɔn ani an k’an yɛrɛ labɛn ka baara kɛ n’a ye. Kaan minw be fɔ an ka kiinw kɔnɔ, an ka tagamasiɲɛ la u kan walisa k’u sɔrɔyɔrɔ lɔn joona. N’an ka sɛbɛ dɔw be sɔrɔ o kaanw na, an be se ka dɔw kɛ an kun walisa k’u di kaan wɛrɛ fɔbagaw ma baara kɛnen kɔ n’o gafe ye.
4. An be se ka baara kɛ ni gafe Une bonne nouvelle pour des gens de toutes nations ye cogo di?
4 Waajuli kɛtɔ, n’i ye mɔgɔ dɔ kunbɛn ani i t’a lɔn a be kaan min fɔ, i k’a daminɛ ka gafe kɔɔ yira a tigi la. O kɔ, a dayɛlɛ ka kariti yira a la. I bolo sin i yɛrɛ ma, ani i ka jamana yira a la kariti kan. O kɔ, a yira a la ko a bena diya i ye k’a lɔn ale be bɔ jamana min na ani a be kaan min fɔ. I mana a lɔn a be kaan min fɔ, i ka gafe ɲɛɛ 3 ani 4 lajɛ k’o kaan sɔrɔyɔrɔ lɔn. Gafe yɛlɛ o yɔrɔ la. Kumasen min sɛbɛra san fɛ ka fin kosɔbɛ, i k’o yira a la. Kuma minw sɛbɛra o jukɔrɔ, i k’a yira a tigi la ko i b’a fɛ a k’u kalan. N’a y’u kalan ka ban, i ka sɛbɛnin dɔ di a ma a ka kaan na. N’o dɔ t’i bolo i ka dakun 3nan ka kumasen laban yira a la. O kumasen b’a yira ko i b’a fɛ ka segi ka na gafe dɔ di a ma a ka kaan na. Kumaden minw sɛbɛra ka fin kosɔbɛ dakun 4nan kɔnɔ ko “n’ tɔgɔ,” o yira a la, ani i tɔgɔ fɔ a ye ka gwɛ. Kumaden minw sɛbɛra ka fin ko “i tɔgɔ,” o yira a tigi la ani i ka mɛnni kɛ a fɛ. I ka labɛn tigitigi dɔw kɛ walisa ka segi ka na bɔ a ye.
5. Ni kaan wɛrɛ fɔbaga dɔ y’a mako don tiɲɛn koo la, an ka kan ka mun lo kɛ walisa k’o tigi dɛmɛ koɲuman?
5 Makodon mɔgɔw dɛmɛcogo: Mɔgɔ minw b’u mako don Masaya kibaro la, an ka kan k’an seko bɛɛ kɛ ka segi ka taga bɔ u ye, u ka kaan mana kɛ min o min ye. N’an y’a kɔrɔsi ko u b’u mako don Ala ani Bibulu koo la, an ka kan ka sɛbɛ nin dafa: Veuillez suivre l’intérêt (S-43). O kɔ, an k’a di joona kafo ka sekeretɛri ma a b’a ci Betɛli la walisa o makodon mɔgɔ ka kaan fɔbaga dɔ ka taga bɔ a ye. Betɛli bena o sɛbɛ (S-43) ci jɛnkulu dɔ ma min b’o kaan fɔ. O jɛnkulu mana sɛbɛ sɔrɔ, a bena teliya ka mɔgɔ ci makodon mɔgɔ fɛ. Sekeretɛri be se k’o sɛbɛ dɔ di waajulibaara kɔrɔsibaga ma walisa a k’a lɔn ko kaan wɛrɛ fɔbaga dɔ b’a mako donna tiɲɛn koo la. Sɛbɛ (S-43) man kan ka dafa fɔɔ ni mɔgɔ dɔ b’a mako donna tiɲɛn koo la sɔbɛ la.
6. N’an ye makodon mɔgɔ dɔ kunbɛn min be kaan wɛrɛ fɔ, an ka kan ka mun lo kɛ?
6 K’a ta sɛbɛ S-43 dafa wagati ma ka taga se tuma min na makodon mɔgɔ ka kaan fɔbaga dɔ bena na bɔ a ye, o bena wagati dɔɔni ta. O kama, weleweledala min ye sɛbɛ S-43 dafa, a ka to k’a jija k’o tigi dɛmɛ fɔɔ a ka kaan fɔbaga dɔ ka na bɔ a ye. Tuma dɔw la, bibulukalan be se ka kɛ n’a tigi ye. Nka, sanni o tigi ka kaan fɔbaga ka na, weleweledala be se ka gafew sɔrɔ cogo di o kaan na?
7. Labɛn juman lo kɛra min b’an dɛmɛ ka gafew sɔrɔ kaan wɛrɛ fɔbagaw ye?
7 Gafew, kaan wɛrɛw la: Gafe caaman man kan ka sɔrɔ kafo kɔnɔ kaan wɛrɛw la. Nka, ni waajulibaara kɔrɔsibaga y’a ye ko kaan dɔ fɔbaga caaman b’u mako donna tiɲɛn koo la, a be se k’a jati ko a bɛnnen lo ka gafe hakɛ kɛɲɛnen dɔ mara o kaan na weleweledalaw ye. Ni gafe si tɛ yen o kaan na, kafo be se ka dɔ deli Betɛli fɛ. Sanni o gafew ka na, o be se ka wagati dɔɔni ta. O kama, labɛn kɛra walisa an ka se k’an ka gafe dɔw sɔrɔ ɛntɛrɛnɛti kan ladɛrɛsi nin na: www.watchtower.org. O yɔrɔ la, weleweledala wala makodon mɔgɔ be se k’an ka gafe dɔw sɔrɔ joona kaan kɛmɛ-kɛmɛ caaman na. Weleweledala minw be makodon mɔgɔw dɛmɛna kaan wɛrɛ la, o labɛn bena u nafa, siga t’o la.
8. Kafo ka baara ye mun lo ye kaan wɛrɛ fɔbagaw dɛmɛni koo la?
8 Kafo ka baara ye min ye: Tuma dɔw la, a be se ka kɛ ko kaan dɔ fɔbagaw be cayara yɔrɔ dɔ la ani kafo si tɛ yen min b’a ka lajɛnw kɛ o kaan na. O kama, o kaan fɔbaga minw b’u mako don tiɲɛn koo la, an ka kan k’u weele ka na an ka lajɛnw na. N’an b’u bisimila ni dusudiya ye ani n’an b’an mako don u la, o be se k’u jija u ka to ka na lajɛnw na tuma bɛɛ. Komi an tɛ kaan kelen fɔ ani an ka delinankow tɛ kelen ye, o be se ka kɛ bali ye a daminɛ na. Nka Jehova Seerew ka jɛnkulu kɔnɔ duniɲa kuru bɛɛ kɔnɔ, foyi tɛ kanuya sɔbɛ bali (Sof. 3:9; Yuh. 13:35). Yala i be kaan wɛrɛ fɔ ka ɲɛ wa? N’o lo, n’i labilanen lo ka mɔgɔ wɛrɛw dɛmɛ o kaan na, i k’o fɔ i ka kafo ka sekeretɛri ye walisa a k’o kunnafoni lase Betɛli ma. O bena Betɛli dɛmɛ n’a be weleweledala dɔ ɲinina walisa k’o kaan fɔbaga dɔ dɛmɛ.
9. Cikan minw ɲɛsinna kaan wɛrɛ fɔbagaw dɛmɛni ma, tuma juman lo u sira ka kan ka tagama, ani o koo be ɲɛnabɔ cogo di?
9 Balikukalan, kaan wɛrɛ la: N’i be kaan wɛrɛ fɔbagaw dɛmɛna, a ka fisa i k’u jija u k’a daminɛ ka taga kafo ka lajɛnw na u ka kaan na n’a yɔrɔ man jan u la kojugu. Nka n’o tɛ se ka kɛ, weleweledala dɔw be se k’a latigɛ k’o kaan degi walisa ka se k’o makodon mɔgɔw dɛmɛ bɛrɛbɛrɛ. Ni kafo si tɛ yen o kaan na o mara la ani lonanw wala dugulenw ka ca, Betɛli be se ka sira di ko balikukalan ka kɛ o kaan na. N’o lo, a be se k’o fɔ kafow ye o mara la ani ka labɛn kɛ walisa kafodenw ka kunnafoniw sɔrɔ ko balikukalan dɔ bena kɛ. Minw b’u tɔgɔ di o balikukalan kama, u ka laɲinita ka kan ka kɛ ka jɛn n’o kaan fɔbagaw ka jɛnkulu wala kafo ye walisa ka waajuli kɛ o kaan na.
10. Tuma juman lo kaan wɛrɛ fɔbagaw jɛnkulu be se ka sigi sen kan, ani o koo be latigɛ cogo di?
10 Jɛnkulu labɛncogo: Sarati jɔnjɔn naani ka kan ka dafa ka sɔrɔ ka jɛnkulu dɔ sigi sen kan kaan dɔ la. (1) Makodon mɔgɔ caaman ka kan ka sɔrɔ o kaan fɔbagaw cɛ. (2) Weleweledala damanin ka kan k’o kaan lɔn wala a ka kan ka sɔrɔ k’u be o kaan degira. (3) Diinan mɔgɔkɔrɔ wala kɔrɔsigi ciden setigi dɔ labilanen ka kan ka sɔrɔ ka koow ɲɛnabɔ ani ka lajɛn kelen ɲɔgɔn ɲɛminɛ o kaan na lɔgɔkun o lɔgɔkun. (4) Diinan mɔgɔkɔrɔw jɛnkulu dɔ labilanen ka kan ka sɔrɔ k’o jɛnkulu dɛmɛ. N’o saratiw dafara k’a dama kɛɲɛ, diinan mɔgɔkɔrɔw ka kan ka sɛbɛ ci Betɛli ma k’o jɛnkulu cogo lakali a ye. U fana ka kan k’a ɲini Betɛli fɛ a k’o jɛnkulu daga ani k’a kalifa olu ma. (A filɛ gafe Organisés ɲɛɛ 106-107 kɔnɔ.) Diinan mɔgɔkɔrɔ min b’o jɛnkulu ka koow ɲɛɛ fɛ, a be weele ko “jɛnkulu kɔrɔsibaga.” Ni kɔrɔsigi ciden lo, a be weele ko “jɛnkulu baarakɛden.”
11. Ka kaan wɛrɛ fɔbagaw dɛmɛ an ka kafo kiinw kɔnɔ, mun na o ye nɛɛma ye an fɛ?
11 K’a ɲini ka kaan wɛrɛ fɔbagaw waaju an ka kiinw kɔnɔ ani k’u dɛmɛ, o ye an ka waajuli baara fanba dɔ ye min be kɛra duniɲa kuru bɛɛ kɔnɔ. Yesu Krista lo ye o baara sigi sen kan ani an be tugu ale ka ɲɛyirali lo kɔ. An ka kisɛya k’an seko damayira kɛ ani an k’a filɛ cogo min na Jehova bena to ka siyaw yɛrɛyɛrɛ walisa mɔgɔ ɲumanw ka na a fɛ (Agize 2:7). N’an b’an seen don o baara la, o ye ninsɔndiya ye an fɛ dɛ! An be jɛn ka jijali minw kɛ ka kaan wɛrɛ fɔbagaw dɛmɛ an ka kafo kelen-kelen bɛɛ kɔnɔ, Jehova k’o duga. An kana ɲinɛ ko a mana kɛ kaan o kaan ye, Ala be se k’a to Masaya kisɛ ka yiriwa o kaan na!—1 Kɔr. 3:6-9.