“I kana siran”
1. Jeremi ka koo juman ɲɔgɔn be se k’an sɔrɔ?
1 Jeremi ka kiraya daminɛ tuma na, a y’a jati ko see tɛ ale ye. Nka Jehova y’a hakili sigi ko: “I kana siran.” Ani a ye barika don a la ni kanuya ye walisa a ka se k’a ka cii dafa ( Jer. 1:6-10). Bi, n’an be maloya wala n’an tigɛnen lo an yɛrɛ la, o be se k’a to an t’an seen don bɛrɛbɛrɛ cidenya baara la. Mɔgɔw b’an jaabi wala u b’an jati cogo min na, n’an be siran o ɲɛ, o be se k’an bali ka seereya kɛ tuma dɔw la. An be se ka see sɔrɔ o siranya ɲɔgɔn kan cogo di, ani an yɛrɛ bena na nafa juman sɔrɔ o la?
2. Cogo juman na labɛnko ɲuman be se ka dɔ bɔ an ka siranya la waajuli koo la?
2 Kɔn k’i yɛrɛ labɛn: Labɛnko ɲuman be se ka dɔ bɔ an ka siranya la. Ɲɛyirali fɛ, mɔgɔw ka teli ka sɔsɔli kuma minw lawuli kiinw kɔnɔ, n’an be kɔn k’an yɛrɛ labɛn o kama, an bena se k’u jaabi ka ɲɛ (Ntal. 15:28). An ka teli ka gwɛlɛya minw sɔrɔ lakɔliso wala waajuli la, mun na an t’a ɲini k’an yɛrɛ labɛn u kama an kɛtɔ ka yiracogo dɔw kɛ ka filɛ gwa kɔnɔ batoli tuma na?—1 Piɛrɛ 3:15.
3. N’an b’an jigi la Jehova kan, o b’an dɛmɛ cogo di ka see sɔrɔ siranya kan?
3 I jigi la Jehova kan: Siranya lakarinan ɲuman ye k’i jigi la an ka Ala kan. Jehova b’an jigi sigi ko a bena an dɛmɛ (Esayi 41:10-13). Mun be se k’an tanga ka se o ma? Ka fara o kan, Yesu b’an hakili sigi ko hali ni barinankow y’an sɔrɔ, Ala ka hakili senu bena an dɛmɛ ka seereya kɛ cogo ɲuman na (Marka 13:11). O kama, an ka to ka hakili senu deli Jehova fɛ tuma o tuma.—Luka 11:13.
4. Gwɛlɛyaw bɛɛ n’a ta, nafa juman b’a la ka timinandiya waajuli la?
4 Duga minw b’a la: Gwɛlɛyaw bɛɛ n’a ta, n’an b’an timinandiya cidenya baara la, o be barika don an na walisa an ka see sɔrɔ gwɛlɛya nataw kan. O fana b’a to an be kɛ ni jagwɛlɛya ni kisɛya ye o minw be sɔrɔ mɔgɔw la minw falen be hakili senu na (Kɛw. 4:31). Ka fara o kan, an kɛtɔ ka see sɔrɔ an ka siranya kan Jehova sababu fɛ, o b’an lasun tugun ka limaniya kɛ ani k’an jigi la a bolo barikaman kan (Esayi 33:2). An fana be ninsɔndiya ani ka wasa k’a ye ko an koo ka di an sankolola Faa ye (1 Piɛrɛ 4:13, 14). O kama, an kana siran ka Masaya kibaro fɔ ni kisɛya ye sabu an lanen b’a la ko Jehova bena an dɛmɛ tuma bɛɛ.