I be se ka koo minw bɛɛ lɔn Jehova fɛ, yala i b’a ɲini k’u lɔn wa?
1. Jehova be mun lo miiri kalan koo la?
An Karamɔgɔba Jehova b’a fɛ an ka kalan sɔrɔ (Es. 30:20). A ye mɔgɔw kalanni daminɛ a Dencɛ fɔlɔ bangelen danni kɔ (Yuh. 8:28). Adama murutinin kɔ, Jehova ma mɔgɔw kalanni dabila. Nka, a tora ka adamaden dafabaliw kalan ni kanuya ye.—Es. 48:17, 18; 2 Tim. 3:14, 15.
2. Bi, mɔgɔw kalanni kanpaɲi juman be sen kan?
2 Bi, Jehova be mɔgɔw kalanni kanpaɲiba dɔ ɲɛminɛna min ɲɔgɔn ma deli ka kɛ. I ko Esayi tun kɔnna k’a fɔ cogo min na, Jehova “ka so bɛ kulu” min kan, mɔgɔ miliyɔn caaman be bɔ duniɲa kuru bɛɛ kɔnɔ ka girin ka taga yen (Es. 2:2). Mun na do? Walisa Jehova Ala k’u kalan a ka siraw la (Es. 2:3). Waajuli baara saan 2010 kɔnɔ, Jehova Seerew ye lɛri miliyari kelen ni miliyɔn kɛmɛ wɔɔrɔ ni kɔ kɛ ka mɔgɔw waaju ani k’u kalan Bibulu ka tiɲɛn kuma na. Ka fara o kan, hakilimaya kalan be kɛ kafo 105 000 ni kɔ kɔnɔ lɔgɔkun o lɔgɔkun duniɲa kuru bɛɛ kɔnɔ, ani Jɔncɛ kantigiman hakiliman be gafew bɔ mɔgɔw kalanni kama kaan 500 ni kɔ la.
3. Jehova be kalan min di an ma, e yɛrɛ ye nafa juman sɔrɔ o la?
3 A ɲini ka nafa sɔrɔ bɛrɛbɛrɛ o kalan na: Tiɲɛn na, o Alako kalan y’an nafa yɛrɛ le! An y’a faamu ko tɔgɔ be Ala la ani ko a b’a janto an na (Zab. 83:18, NW; 1 Piɛrɛ 5:6, 7). Ɲiningali minw kɔrɔtanin lo ɲɛnamaya kɔnɔ, an y’olu jaabili sɔrɔ. U dɔw ye: Mun na mɔgɔw be tɔɔrɔ ani u be sa? Ne be se ka hɛɛrɛ sɔbɛ sɔrɔ cogo di? Ɲɛnamaya kuun ye mun lo ye? Jehova y’a yira an na fana an ka ɲi ka tagama cogo min na walisa ‘an ka koo kɛtaw ka ɲɛ.’—Jos. 1:8.
4. Sababu jumanw dira Jehova sagokɛlaw ma ka fɔrɔmasɔn dɔw sɔrɔ, ani mun na an ka kan k’a ɲini nafa bɛrɛbɛrɛ sɔrɔ u la?
4 Ka fara o kan, Jehova be fɔrɔmasɔn kɛrɛnkɛrɛnnin labɛn a sagokɛla dɔw ye walisa k’u dɛmɛ u ka se ka dɔ fara u ka cidenya baara kan. O kalanw kofɔra sɛbɛ nin ɲɛɛ 4-6 kan. N’a sɔrɔ an ka koow cogoya tɛ sira di an ma k’o fɔrɔmasɔn dɔw sɔrɔ. Nka, Alako kalan minw be an bolo kɔrɔ, yala an b’a ɲini ka nafa sɔrɔ u la bɛrɛbɛrɛ wa? Lakɔli karamɔgɔw ni mɔgɔ wɛrɛw ka teli ka denmisɛnw lasun u ka kalanbabaw kɛ. Yala an b’u jija u ka laɲinitaw latigɛ Alako ta fan fɛ ani k’a ɲini ka fɔrɔmasɔn sɔrɔ Jehova fɛ wa? O fɔrɔmasɔn ka fisa ni duniɲa ka kalanbabaw ye fɔɔ ka taga ka na wa? N’an b’a ɲini ka nafa bɛrɛbɛrɛ sɔrɔ Jehova ka kalanw na, o bena an dɛmɛ an ka hɛɛrɛ sɔrɔ an ka ɲɛnamaya kɔnɔ sisan ani fɔɔ abada.—Zab. 119:105; Yuh. 17:3.
Mɔgɔ be se ka lakɔli ni fɔrɔmasɔn minw kɛ Jehova ka ɔriganisasiyɔn kɔnɔ
Kalangwɛ ni sɛbɛri degeli lakɔli
A kuun: Ka mɔgɔw degi kalangwɛ ni sɛbɛri kɛcogo la walisa u ka se ka Bibulu kalan u yɛrɛ ma ani ka mɔgɔ wɛrɛ kalan tiɲɛn koo la.
A kuntaga: A be mɛɛn ka kɛɲɛ ni kalandenw makoya ye.
A kɛyɔrɔ: Masaya Boon na.
Jɔn lo be se k’a kɛ: Weleweledalaw ani makodon mɔgɔw fana.
Tɔgɔ dicogo: Diinan mɔgɔkɔrɔw b’o lakɔli sigi sen kan ni dɔw mako b’a la, ani minw bɛɛ be se ka nafa sɔrɔ a la, u b’u jija u k’u niin don a la.
Ala ka Mara cidenyabaara lakɔli
A kuun: Ka fɔrɔmasɔn di weleweledalaw ma walisa u ka kɛ kibaro diiman waajulikɛlaw ani karamɔgɔ setigiw ye.
A kuntaga: A be kɛ furututu.
A kɛyɔrɔ: Masaya Boon na.
Jɔn lo be se k’a kɛ: Weleweledalaw bɛɛ ani mɔgɔ minw be jɛn ni kafodenw ye tuma o tuma. I ka kan ka sɔn Bibulu ka kalansiraw la ani ka ɲɛnamaya kɛ ka kɛɲɛ ni kerecɛnya sariyaw ye.
Tɔgɔ dicogo: I k’i ɲɛsin lakɔli kɔrɔsibaga ma.
Kaan wɛrɛ degeli lakɔli
A kuun: Ka weleweledalaw degi waajuli kɛcogo la kaan wɛrɛ la.
A kuntaga: Kalo naani wala kalo duuru. Kalan ka teli ka kɛ samedi sɔgɔma, lɛri kelen wala lɛri fila.
A kɛyɔrɔ: A ka teli ka kɛ Masaya Boon dɔ kɔnɔ, aw ka mara la.
Jɔn lo be se k’a kɛ: Weleweledala minw be ni tɔgɔ ɲuman ye ani u b’a fɛ ka waajuli kɛ kaan wɛrɛ la.
Tɔgɔ dicogo: Betɛli lo be labɛn kɛ o lakɔli kama ka kɛɲɛ ni kafow ka makoya ye.
Masaya Boonw lɔli
A kuun: Ka Masaya Boonw lɔ wala k’u lakuraya. Lakɔli yɛrɛ yɛrɛ tɛ, nka balima minw b’u yɛrɛ di o baara kama, u b’u degi boonw lɔcogo fɛɛrɛ dɔw la walisa u ka se ka dɛmɛ don o baara la.
A kuntaga: Ka kɛɲɛ ni boon lɔbagaw ka koow cogoya ye.
A kɛyɔrɔ: Yɔrɔ o yɔrɔ, tɔnbolo ka mara la. U be se ka boon lɔbaga dɔw ci yɔrɔ jan na walisa u ka taga dɛmɛ lase yɔrɔ min na balawo kɛra.
Jɔn lo be se k’a tɔgɔ di: Balima minw batisera ani diinan mɔgɔkɔrɔw ye sira di u ma k’o baara kɛ hali n’u tɛ se boon lɔcogo la.
Tɔgɔ dicogo: I ka sɛbɛ nin ɲini diinan mɔgɔkɔrɔw fɛ ani i k’o dafa: Question-naire pour les volontaires (S-82).
Piyɔniyew ka lakɔli
A kuun: Ka piyɔniyew dɛmɛ u k’u ka “baara bɛɛ kɛ ka dafa.”—2 Tim. 4:5.
A kuntaga: Lɔgɔkun fila.
A kɛyɔrɔ: Betɛli lo b’o latigɛ. Nka a ka teli ka kɛ Masaya Boon dɔ kɔnɔ aw ka mara la.
Jɔn lo be se k’a kɛ: Minw ye saan kelen kɔni kɛ kudayi piyɔniye baara la.
Tɔgɔ dicogo: Ni piyɔniye dɔ b’o lakɔli sarati dafa, u be sin k’a tɔgɔ ta ani kafokulu kɔrɔsibaga be kaan bɔ a ye.
Betɛliden kuraw ka lakɔli
A kuun: A kuun ye ka Betɛliden kuraw dɛmɛ u ka yiriwa Betɛli baara la.
A kuntaga: Lɛri kelen lɔgɔkun o lɔgɔkun fɔɔ lɔgɔkun tan ni wɔɔrɔ kɔnɔ.
A kɛyɔrɔ: Betɛli la.
Jɔn lo be se k’a kɛ: Minw be baara kɛ Betɛli la kudayi, ani minw b’u yɛrɛ di ka baara kɛ yen wagati damanin kɔnɔ (saan kelen wala saan kelen ni kɔ)
Tɔgɔ dicogo: U be sin ka betɛliden kuraw tɔgɔw ta.
Masaya cidenyabaara lakɔli
A kuun: Ka diinan mɔgɔkɔrɔw ni kɔrɔsigi cidenw degi u ka kɔrɔsili baara n’u ka kunkanbaaraw dafacogo la (Kɛw. 20:28). Saan damanin o saan damanin, Koow Ɲɛnabɔla Jɛnkulu b’a latigɛ ko o lakɔli ka kɛ.
A kuntaga: Saan tɛmɛninw na, diinan mɔgɔkɔrɔw ye tile kelen ni tilan kɛ a la ani kɔrɔsigi cidenw ye tile kelen kɛ.
A kɛyɔrɔ: A ka teli ka kɛ Masaya Boon wala lajɛnba boon kɔnɔ aw ka mara la.
Jɔn lo be se k’a kɛ: Diinan mɔgɔkɔrɔw ni kɔrɔsigi cidenw dɔrɔn.
Tɔgɔ dicogo: Kafokulu kɔrɔsibaga lo be welekan lase u ma.
Diinan mɔgɔkɔrɔw ka lakɔlia
A kuun: Ka diinan mɔgɔkɔrɔw dɛmɛ u k’u ka kunkanbaaraw dafa kafo kɔnɔ.
A kuntaga: Loon duuru.
A kɛyɔrɔ: Betɛli lo b’o latigɛ, nka a ka teli ka kɛ Masaya Boon wala lajɛnba boon dɔ kɔnɔ aw ka mara la.
Jɔn lo be se k’a kɛ: Diinan mɔgɔkɔrɔw dɔrɔn.
Tɔgɔ dicogo: Betɛli lo be welekan lase u ma.
Kɔrɔsibaga tagamakɛlaw n’u musow ka lakɔlib
A kuun: Ka kafokulu ani distriki kɔrɔsibagaw dɛmɛ u ka kafow mako ɲɛ bɛrɛbɛrɛ, ka “Ala ka kuma waajuli ni mɔgɔw kalanni baara kɛ” kosɔbɛ ani k’u janto sagakulu la o min kalifara u ma.—1 Tim. 5:17; 1 Piɛrɛ 5:2, 3.
A kuntaga: Kalo fila.
A kɛyɔrɔ: Betɛli lo b’o latigɛ.
Jɔn lo be se k’a kɛ: Kafokuluw ni distrikiw kɔrɔsibagaw dɔrɔn.
Tɔgɔ dicogo: Betɛli lo be welekan lase o kɔrɔsibagaw n’u musow ma.
Cɛgwanaw ka Bibuluko lakɔlic
A kuun: Ka fɔrɔmasɔn di diinan mɔgɔkɔrɔw ni kɔrɔsigi cidenw ma minw ma furu fɔlɔ walisa u ka se ka kunkanbaara wɛrɛw dafa. Minw y’o lakɔli seereyasɛbɛ sɔrɔ, u b’u fanba ci ka taga baara kɛ yɔrɔ min na makoya be yen u faso la. U be se k’u damanin ci jamana wɛrɛ la n’u labilanin lo.
A kuntaga: Kalo fila.
A kɛyɔrɔ: Betɛli lo b’o latigɛ, nka a ka teli ka kɛ lajɛnba boon wala Masaya Boon dɔ kɔnɔ.
Jɔn lo be se k’a kɛ: Cɛgwana minw sanda be saan 23 ni 62 cɛ, n’u ka kɛnɛ, n’u b’a fɛ ka baara kɛ u balimaw ye ani ka Masayakow yiriwa yɔrɔ o yɔrɔ (Marka 10:29, 30). U ka kan ka kɛ diinan mɔgɔkɔrɔw wala kɔrɔsigi cidenw ye kabi saan fila kuru bɛɛ wala saan fila ni kɔ.
Tɔgɔ dicogo: N’o lakɔli be kɛ aw ka tɔnbolo mara la, minw b’a fɛ k’o fɔrɔmasɔn sɔrɔ, lajɛn dɔ be kɛ olu kama tile fila lajɛnba la. Kunnafoni wɛrɛw be di u ma o lajɛn na.
Kerecɛn furuninw ka Bibuluko lakɔlid
A kuun: Ka fɔrɔmasɔn kɛrɛnkɛrɛnnin dɔ di kerecɛn furuninw ma walisa Jehova n’a ka ɔriganisasiyɔn ka se ka baara kɛ n’u ye bɛrɛbɛrɛ. Minw y’o lakɔli seereyasɛbɛ sɔrɔ, u b’u fanba ci ka taga baara kɛ yɔrɔ min na makoya be yen u faso la. U be se k’u damanin ci jamana wɛrɛ la n’u labilanin lo.
A kuntaga: Kalo fila.
A kɛyɔrɔ: O lakɔli ka kalan fɔlɔw be kɛra Jehova Seerew ka kalansoba la min be Patɛrsɔn (Niyɔriki mara la, Etazini). O kɔ, a bena kɛ yɔrɔ wɛrɛw la ani tɔnbolo lo bena a kɛyɔrɔ latigɛ. Tuma caaman na, a bena kɛ lajɛnba boon wala Masaya Boon kɔnɔ.
Jɔn lo be se k’a kɛ: Kerecɛn furunin minw sanda be saan 25 ani 50 cɛ, n’u ka kɛnɛ, n’u be se ka taga baara kɛ yɔrɔ min na makoya be yen ani ni miiriya nin b’u la: “Ne, i ka ne ci.” (Es. 6:8). Ka fara o kan, u furunin ka kan ka kɛ kabi saan fila wala saan fila ni kɔ, ani u ka kan ka kɛ kudayi cidenyabaara la kabi saan fila kuru bɛɛ.
Tɔgɔ di cogo: N’o lakɔli be kɛ aw ka tɔnbolo mara la, minw b’a fɛ k’o fɔrɔmasɔn sɔrɔ, lajɛn dɔ be kɛ olu kama tile kelen lajɛnba la. Kunnafoni wɛrɛw be di u ma o lajɛn na.
Gilead ka Bibuluko lakɔli
A kuun: Ka fɔrɔmasɔn di piyɔniyew ani kudayi cidenya baarakɛla wɛrɛw ma misɔndenya baara kama.
A kuntaga: Kalo duuru.
A kɛyɔrɔ: Jehova Seerew ka kalansoba min be Patɛrsɔn.
Jɔn lo be se k’a kɛ: Kerecɛn furunin minw batisera kabi saan saba ani u sanda be saan 21 ni 38 cɛ tuma min na u b’u tɔgɔ dira o lakɔli kama siɲɛ fɔlɔ la. U ka kan ka angilikan fɔ. U furunin ka kan ka kɛ kabi saan fila wala saan fila ni kɔ, ani u ka kan ka kɛ kudayi cidenyabaara la kabi saan fila kuru bɛɛ. U ka kan ka kɛ kɛnɛya la. Piyɔniye minw tɛ waajuli kɛ u faso la (hali u minw be jati misɔndenw ye), kɔrɔsibaga tagamakɛlaw, Betɛli ka denbayamɔgɔw, minw tun ye Cidenyabaara degeli Lakɔli wala cɛgwanaw ka Bibuluko lakɔli ani kerecɛn furuninw ka Bibuluko lakɔli ka seereyasɛbɛ sɔrɔ, olu fana be se k’u tɔgɔ di n’u be saratiw dafa.
Tɔgɔ dicogo: Minw b’a fɛ k’o lakɔli kɛ, lajɛn dɔ be kɛ olu kama tile saba lajɛnba tuma na jamana dɔw la. Kunnafoni wɛrɛw be di u ma o lajɛn na. N’i b’a fɛ k’o lakɔli kɛ ani lajɛn si tɛ kɛ o kama aw ka tile saba lajɛnba la, i be se ka sɛbɛ ci i ka jamana ka Betɛli ma walisa ka kunnafoniw sɔrɔ.
Tɔnbolo ka kɔmite mɔgɔw n’u ka musow ka lakɔli
A kuun: Ka tɔnbolo ka kɔmite mɔgɔw dɛmɛ u ka se ka Betɛli ka koow n’a ka baaradaw kɔrɔsi ka ɲɛ, k’u janto kafow ka koow la, ka kafokuluw ni distrikiw kɔrɔsi u ka baaraw la, k’u janto gafew bayɛlɛmani n’u dilanni koo la ani k’u ci kafow ma.—Luka 12:48b.
A kuntaga: Kalo fila.
A kɛyɔrɔ: Jehova Seerew ka kalansoba la min be Patɛrsɔn.
Jɔn lo be se k’a kɛ: Tɔnbolo wala jamana ka kɔmite mɔgɔw, wala o cii bena kalifa minw ma.
Tɔgɔ dicogo: Koow Ɲɛnabɔla Jɛnkulu lo be welekan lase o balimacɛw n’u musow ma.
a O lakɔli tɛ sɔrɔ jamanaw bɛɛ la fɔlɔ.
b O lakɔli tɛ sɔrɔ jamanaw bɛɛ la fɔlɔ.
c O lakɔli tɛ sɔrɔ jamanaw bɛɛ la fɔlɔ.
d O lakɔli tɛ sɔrɔ jamanaw bɛɛ la fɔlɔ.