Cidenyabaara degeli Lakɔli: Daaba yɛlɛnen lo baara kama
1 Jehova kɔnna k’a fɔ cira Jeremi daa fɛ ko: “Ne na sagagɛnnaw bila [ne ka mɔgɔw] kun na. U tɛna siran, u ja tɛna tigɛ, hali kelen tɛna u jɛ.” ( Jer. 23:4). Bi, o sagagwɛnna baara ɲɔgɔn be kɛra siyaw bɛɛ la mɔgɔw fɛ. Kafow ka diinan mɔgɔkɔrɔ waa caaman lo b’o baara kɛra. Ka fara o kan, kamalenw jama, minw ka ca i ko ngomi, u b’u yɛrɛw di Jehova ka baara kama (Zab. 110:3). Tiɲɛn na, o balima majigilenw ye duba ye kafow fɛ dɛ! Komi mɔgɔw lajɛnni baara be tagara ɲɛ, an mako be cɛɛ setigiw la hali bele walisa u k’u yɛrɛ labila ka baara kɛ u balimaw ye.
2 Cidenyabaara degeli Lakɔli ye labɛn ɲuman ye min kɛra walisa ka diinan mɔgɔkɔrɔw ni kɔrɔsigi ciden furubaliw dege u ka kunkanbaarabaw dafa. Kabini o lakɔli daminɛna saan 1987 la, kalanso 999 kɛra, ani lakɔliden 22 000 ni kɔ ye kalan sɔrɔ. U bɔra jamana 140 ɲɔgɔn na. O balimaw fɛ, o lakɔli sɔrɔla ka kɛ ‘daba ye, min yɛlɛla ka baara caman kɛ.’—1 Kɔr. 16:9.
3 Lakɔli kuun: Cidenyabaara degeli Lakɔli kuun ye ka cɛɛ setigiw kalan ani k’u dege kunkanbaaraw kɛcogo la, ani k’u ci yɔrɔ o yɔrɔ ni ɔriganisasiyɔn mako be dɛmɛ la. Lakɔli be dɔ fara u ka setigiya kan walisa u ka bila ɲɛ waajulibaara la, ka sagakulu mara, ani ka kafo kalan. U ka seereyasɛbɛw sɔrɔlen kɔ, nɛɛma baara be di lakɔliden dɔw ma i ko danna piyɔniyew wala kafokuluw kɔrɔsibagaw u ka jamana kɔnɔ wala jamana wɛrɛ kɔnɔ. Dɔ wɛrɛw be bila ka taga baara kɛ u yɛrɛw ka kafow kɔnɔ wala yɔrɔ min na makoyaba be yen u ka tɔnbolo mara la.
4 U ka kalan be mɛɛn lɔgɔkun seegi. O wagati kɔnɔ, u b’a daminɛ ka Bibulu kalan bɛrɛbɛrɛ. U be Bibulu kalansira caaman ni sagagwɛnnaw ka kunkanbaaraw lajɛ ka dunya. U fana be baarakɛsiraw lajɛ, minw be kerecɛnw ka gwɛlɛyaw ɲɛnabɔcogo yira. Bibulu be min fɔ Ala ka soo maracogo kan, ani kitikow ni ɔriganisasiyɔn koow kan, u b’o kalan kɛ. U b’u kalan forobakalan dicogo tigitigi la. Ladiliw fana be di bɛɛ kelen kelen ma a dan na walisa a ka kɔgɔ joona hakilimaya ta fan fɛ.
5 Jɔn be se ka taga lakɔli la? A dagalen be lakɔli saratiw ka kɔrɔta. Minw b’a fɛ ka taga o lakɔli la, u ka kan ka kɛ diinan mɔgɔkɔrɔw wala kɔrɔsigi cidenw ye kabini saan fila kɔni ka tugu ɲɔgɔn kɔ. U bɛɛ ka kan ka kɛ cɛɛ gwanaw ye, minw be saan 23 ni 50 cɛ. Lakɔli kalan be kɛ kaan min na, u ka kan ka se ka kuma, ka sɛbɛri kɛ ani ka gafew kalan koɲuman o kaan na. U ka kan ka kɛ kɛnɛya ɲuman na, n’u waajibiyalen tɛ ka furaw ta tuma bɛɛ wala ka ban domuni sifa dɔ la kɛnɛyako kosɔn. Minw be kudayi piyɔniye baara la, sira be di olu lo ma fɔlɔ ka taga o lakɔli la.
6 Minw b’u tɔgɔ di o lakɔli kama, u labɛnnen ka kan ka kɛ, ani see ka kan ka kɛ u ye ka taga yɔrɔ o yɔrɔ n’u makoya b’u la o yɔrɔ la. O kɔrɔ ko cira Esayi ka miirili ɲɔgɔn ka kan ka kɛ u la. Ale y’a yɛrɛ di ni dusudiya ye ka taga danna baara dɔ kɛ. A y’a fɔ ko: “Ne, i ka ne ci.” (Esayi 6:8). A ka ɲɛnamaya bɛɛ kɔnɔ, a fana y’a yira ko a majigilen be. Minw b’u yɛrɛw labila Cidenyabaara degeli Lakɔli kama, u ŋaniya ka kan ka kɛ kanuya ye u balimaw kosɔn, ani k’a ɲini ka baara kɛ u ye sanni k’a ɲini ka lɔyɔrɔba sɔrɔ wala ka nɛɛma baara dɔ sɔrɔ. Minw y’o degeli ɲuman kɛ k’a seereyasɛbɛ sɔrɔ, a ɲininen be u fɛ u ka baara kɛ n’o kalan ye ka mɔgɔ wɛrɛw nafa.—Luka 12:48.
7 Lakɔli nafaw: Lɔgɔkun seegi kɔnɔ kalandenw be degeli bɛrɛbɛrɛ sɔrɔ. O wagati kɔnɔ, u be ‘balo dannaya ni kalan tiɲɛma kuma fɛ.’ (1 Tim. 4:6). O cogo la, u be see sɔrɔ k’u balimaw dɛmɛ ani k’u jagwɛlɛya kafow ni kafokuluw kɔnɔ yɔrɔ minw na u cira ka baara kɛ. Yɔrɔ minw na Cidenya-baara degeli Lakɔli kalandenw cira yen, tuma caaman na dɔ farala waajuli baara kan, piyɔniye baara nege donna mɔgɔw la, kamalenw ni sunguruw kɔni cɛ. Ani, Ala ka jama kɔnɔ, mɔgɔ kura caaman b’a ye k’u b’u mako don olu ka koow la.
8 Yala i ye diinan mɔgɔkɔrɔ wala kɔrɔsigi ciden furubali ye min be saan 23 ni 50 cɛ wa? Mun na i t’a ɲini ka sɛbɛ dafa ka taga Cidenyabaara degeli Lakɔli la? Yala i ye kamalen ye min be miiri a ka laɲinitaw n’a ka siniɲasigi koo kan Jehova ka baara la wa? Mun na i t’i ka ɲɛnamaya kɛcogo nɔgɔya k’i ɲɛɛ jɔlen to koo kelen kan walisa i ka se ka don ‘daba fɛ min yɛlɛla ka baara caman kɛ’? A be se ka ɲagaliba ni wasali lase i ma. Siga t’a la, minw ye Cidenyabaara degeli Lakɔli kɛ, a sɔrɔla ka kɛ dugaw sababu ye u fɛ. Olu dɔrɔn tɛ, Ala sagokɛlaw ka kafow bɛɛ fana y’a nafa sɔrɔ duniɲa kuru bɛɛ kɔnɔ.
[Box on page 3]
U ye nafa minw sɔrɔ lakɔli sababu fɛ
“Lakɔli sababu fɛ, ne ka waajuli kɛcogo fisayara kosɔbɛ. Ne ye see sɔrɔ ka baara kɛ ni Bibulu ye walisa ka sagakulu mara ni hakilitigiya ye.”
“Lakɔli sababu fɛ, ne ye hakilisigi sɔrɔ ka tɛmɛ fɔlɔ kan ka n’ ka kunkanbaaraw dafa kafo kɔnɔ.”
“Lakɔli ye koo caamanba yɛlɛma ne ka ɲɛnamaya kɔnɔ, janko ne tun be Ala ka koow labɛncogo n’a ka ɔriganisasiɔn jati cogo min na fɔlɔ la.”
“Ne ye kalan min sɔrɔ, o ye ne dɛmɛ n’ k’a faamu ko n’ ka kan ka n’ yɛrɛ labila ka taga baara kɛ yɔrɔ o yɔrɔ n’u mako be n’ na yen.”