“A’ ye to Ala ka kanuya la”
1. Gafe “A’ ye to Ala ka kanuya la” sɛbɛra kuun juman na?
1 An kɔrɔtɔnin lo kosɔbɛ ka gafe kura nin kalan kafo ka Bibulu kalan na: “A’ ye to Ala ka kanuya la” ! O kalan bena daminɛ saan 2012, novanburu tile 5nan lɔgɔkun na. Koow Ɲɛnabɔla Jɛnkulu ye lɛtɛrɛ min ci Jehova kanubagaw kelen-kelen bɛɛ ma, a kuma laban ko: “An jigi b’a la sɔbɛ la ko gafe nin bena i dɛmɛ i ka to ka tiɲɛn sira tagama ani o la, i ka to ‘Ala ka kanuya la . . . fo ɲɛnamaya banbali la.’—Zude 21, ABM.”
2. Gafe kura nin bena an dɛmɛ an ka ɲɛnamaya faan jumanw na?
2 Kalan juman be sɔrɔ gafe nin kɔnɔ? An be se ka Bibulu kɔnɔ miiriya jɔnjɔnw sira tagama cogo di koo nunu na: jɛnɲɔgɔnyakow, ɲɛnagwɛkow, faamanw bonyali, an yɛrɛ ka delinankow, furuko, kumacogo ani landakow? Miiriya jɔnjɔn tilennin minw be sɔrɔ Bibulu kɔnɔ, olu kalan bena an dusukun kolo (Zab. 19:8, 9). N’an be Jehova ka miiriyaw faamu ka ɲɛ, an bena sɔn ka kolo a ye an ka ɲɛnamaya faanw bɛɛ la sabu an b’a fɛ k’an koo diya a ye.—Ntal. 27:11; 1 Yuh. 5:3.
3. Mun na an ka kan k’an seko bɛɛ kɛ k’an daa don kalan na lɔgɔkun o lɔgɔkun?
3 An k’an jija k’an daa don kalan na: N’i b’i yɛrɛ labɛnna, i k’a laɲini ka Ala tando a ka kafodenw cɛma (Heb. 13:15). Kafo kuturu bɛɛ bena lajɛn ka gafe kura nin kalan. Komi dakun damanin dɔrɔn lo bena kalan lɔgɔkun o lɔgɔkun, an bena se k’an yɛrɛ labɛn koɲuman. O la, an ye koo minw kalan, an bena se k’u tilan ni tɔɔw ye. N’an be kalan labɛn koɲuman, an ka lakalita gwɛninw bena tɔɔw jija kanuya ni kɛwale ɲumanw kɛli la ani dɔ bena fara kalan diya n’a nafa kan (Heb. 10:24). N’an bɛɛ b’an ka limaniya kofɔ, dɔ bena fara an ka ninsɔndiya kan fana.
4. Mun na a kɔrɔtanin lo kosɔbɛ an ka Jehova ka cikanw mara?
4 Yesu ye suu laban min kɛ dugukolo kan i ko adamaden, a y’a ɲɛfɔ ko n’an b’a fɛ ka to Ala ka kanuya la, a kɔrɔtanin lo an ka Jehova ka cikanw mara (Yuh. 15:10). Miiriya jɔnjɔn minw be Bibulu kɔnɔ, gafe “Ala ka kanuya” bena an dɛmɛ an k’an cɛsiri koɲuman k’u sira tagama an ka ɲɛnamaya kɔnɔ loon o loon ani ka “to Ala ka kanuya la.”—Jude 21.