I janto i dusukun na

1. Tile kelen lajɛnba nata barokun ye mun lo ye? A ka kalanw labɛnna kuun juman lo kama?

¹ Loon o loon, koo caaman be kɛ an seen kɔrɔ minw be se ka kɛ sababu ye an dusukun b’an kɛlɛ. O lo kama, k’a ta sɛtanburu nata tile fɔlɔ ma, tile kelen lajɛnba minw bena kɛ waajuli baara saan 2013 kɔnɔ, olu barokun ko “I janto i dusukun na” (1 Tim. 1:19). Dusukun ye an Danbaga ka nilifɛn kabakoman ye. Tile kelen lajɛnba ka kalanw labɛnna walisa k’an bɛɛ dɛmɛ an k’an janto kosɔbɛ baara kɛcogo la n’o nilifɛn ye.

2. Kalanw bena ɲiningali jɔnjɔn jumanw lo jaabi?

² A ɲini ka ɲiningali nunu jaabili sɔrɔ: Kalanw bena ɲiningali jɔnjɔn wolonfila nunuw jaabi ka ɲɛsin dusukun koo ma:

• Farati juman be se k’an dusukun sɔrɔ?

• An be se k’an dusukun kolo cogo di?

• An be se ka mun lo kɛ walisa mɔgɔ si joli hakɛ kana kɛ an kan?

• An be Bibulu kɔnɔ miiriya jɔnjɔnw jati ani an b’u sira tagama cogo min na, o be mun lo yira an koo la?

• An be se ka mun lo kɛ walisa an kana mɔgɔw kunnatiɲɛ dusukunko ta fan fɛ?

• Kanbelew ni sunguruw, aw be se ka lɔ kelen kan cogo di n’u be aw lasunna ka koo bɛnbali kɛ?

• Minw b’a to hakili senu b’u ɲɛminɛ dusukunko ta fan fɛ, olu be duga jumanw sɔrɔ o la?

3. Lajɛnba ka kalanw bena an nafa cogo di?

³ Sutana b’a jijara k’an lafili dusukunkow ta fan fɛ. Nka, Jehova ka dɛmɛ barika la an be se ka see sɔrɔ a kan. An sankolola Faa kanutigi be tɛmɛ a ka Kuma n’a ka ɔriganisasiyɔn fɛ k’a fɔ an ye ko: “Sira filɛ nin ye, i ka taa nin fɛ.” (Esayi 30:21). Jehova be tɛmɛ fɛɛrɛ minw fɛ k’o sira yira an na, nin lajɛnba ka kalanw y’o dɔ ye. O kama, i ka labɛn kɛ walisa k’o lajɛnba ka kalanw bɛɛ lamɛn. I ka lamɛnni kɛ bɛrɛbɛrɛ ani i k’a filɛ cogo min na i bena ladiliw sira tagama. E n’i ka denbayamɔgɔw ka baro kɛ lajɛnba ka kalanw kan ɲɔgɔn fɛ. N’an be kalanw sira tagama, o bena barika don an na an ka to ka kɛ ni “dusukun ɲuman” ye. O la, Sutana tɛna se k’an lafili ni duniɲa nin ka farisogo negelakow ye.