Barokun nin bena diya jɔn lo ye?

1. N’an be La Tour de Garde ni Réveillez-vous ! kalanna, an ka kan ka mun lo kɛ ani mun na do?

¹ La Tour de Garde ni Réveillez-vous ! labɛnna duniɲa mɔgɔw bɛɛ lo kosɔn. O lo kama, barokun sifa caaman be sɔrɔ u kɔnɔ. N’an be barokun kelen kelen bɛɛ kalanna, an k’a filɛ a be se ka diya mɔgɔ tigitigi min ye ani an k’an jija k’o zurunali di o tigi ma.

2. Barokun sifa jumanw lo be an ka zurunaliw kɔnɔ minw be se ka diya kosɔbɛ mɔgɔw ye?

² N’a sɔrɔ e n’i baarakɛɲɔgɔn dɔ ye baro kɛ Bibulu kɔnɔnako dɔ kan. Yala La Tour de Garde kura ɲɛsinna o ma wa? Yala barokun dɔ be sɔrɔ a kɔnɔ ka ɲɛsin gwa koow ma ani a be se k’i somɔgɔ dɔ dɛmɛ wa? Yala i lɔnbaga dɔ b’a fɛ ka taga jamana dɔ la min kofɔra Réveillez-vous ! kɔnɔ wa? Jagokɛyɔrɔ wala gofɛrɛnɛman ka baarada minw be aw ka kiinw kɔnɔ, yala an ka zurunali dɔ bena diya o yɔrɔ baarakɛlaw ye wa? Ɲɛyirali fɛ, a be se ka kɛ ko kɛnɛyako dɔ ɲɛfɔra an ka zurunali dɔ kɔnɔ ani o barokun bena diya kosɔbɛ dɔgɔtɔrɔw ye. Zurunali min be kuma kojugukɛ koo la, o be se ka diya faamanw ye.

3. A’ ye wale dɔ lakali k’a yira ko nafa b’a la k’an ka zurunaliw di mɔgɔ tigitigi dɔw ma n’an b’a miiri ko u bena diya u ye.

³ Dɔw ye nafa minw sɔrɔ o la: Barokun nin tun be sɔrɔ saan 2011 ɔkutɔburu ka Réveillez-vous ! kɔnɔ: “ Faites de vos enfants des adultes responsables. ” Balimacɛ dɔ n’a muso y’o sɔrɔ tuma min na, u ye telefɔni ci lakɔliso 25 ma u ka kiinw kɔnɔ Afiriki worodugu fan fɛ. U la 22 sɔnna an ka zurunaliw ma ani u y’u tilan ka di u ka lakɔlidenw ma. O dugu kelen kɔnɔ, balimacɛ wɛrɛ n’a muso fana y’o ɲɔgɔn lo kɛ lakɔlisow la u ka kiinw kɔnɔ. Lakɔliso kelen yɛrɛ y’a latigɛ k’o zurunali yɔrɔ dɔw lajɛ u ka lɔgɔkun o lɔgɔkun kalan na. Balimacɛ n’a muso y’u ka wale lakali kafokulu kɔrɔsibaga dɔ ye. Ale ye balimaw jija a ka kafokulu kɔnɔ ko u ka taga an ka zurunaliw yira lakɔlisow la u ka kiinw kɔnɔ. Kafow y’o zurunali caaman wɛrɛw deli Betɛli fɛ fɔɔ u labanna k’o zurunaliw dilan tugun.

4. Mun lo kosɔn an b’a fɛ ka zurunaliw jɛnsɛn yɔrɔ bɛɛ?

⁴ Koo minw be kɛ duniɲa kɔnɔ bi, an ka zurunaliw b’u kɔrɔ tigitigi ɲɛfɔ. U fana be mɔgɔw hakili sama ka ɲɛsin Bibulu ni Ala ka Masaya ma. Olu dɔrɔn lo be “kisili ko welewele da” dugukolo kan (Es. 52:7). O lo kama, an k’an jija k’u jɛnsɛn yɔrɔ bɛɛ. An bena se k’o kɛ n’an b’an yɛrɛ ɲininga ko: “Barokun nin bena diya jɔn lo ye?”