An ka kiraw ladegi: Amɔsi
1. Mun na Amɔsi ka koo be se k’an jija?
1 Yala i b’a miiri ko see tɛ i ye ka waajuli kɛ sabu i ye mɔgɔ gwansan ye wa? N’o lo, Amɔsi ka koo be se k’i jija. Amɔsi tun ye sagamarala ni sɛnɛkɛla ye. O bɛɛ n’a ta, Jehova ye see di a ma walisa a ka kibaro gwɛlɛ dɔ weleweleda (Amɔsi 1:1; 7:14, 15). O cogo kelen na bi, minw ye mɔgɔ dɔgɔmanninw ani mɔgɔ majigininw ye, Jehova b’a ka baara kalifa olu lo ma (1 Kor. 1:27-29). An be kalan wɛrɛ jumanw sɔrɔ Amɔsi fɛ minw b’an dɛmɛ waajuli la?
2. Mun na an be se ka lɔ kelen kan kɔrɔbɔli ɲɛ waajuli la?
2 I ka lɔ kelen kan kɔrɔbɔli ɲɛ: Israɛl siya tan minw tun be saheli fan fɛ, Amaziya tun ye olu ka sarakalasebaga dɔ ye. A tun be misiden bato. Tuma min na a ye Amɔsi ka kiraya kuma mɛn, a ye kuma dɔ fɔ min kɔrɔ ko: ‘Taga i ka soo! An to yen ɲɛsuma na! An be ni an ka diinan ye ka ban!’ (Amɔsi 7:12, 13). Amaziya ye Amɔsi ka kumaw kɔrɔ yɛlɛma walisa ka masacɛ Zerobowamu lasun a ka Amɔsi ka waajuli baara bali (Amɔsi 7:7-11). Nka o koo ma Amɔsi lasiran. Bi, diinan kuntigi dɔw be tɛmɛ politiki ɲɛmɔgɔw fɛ walisa ka Jehova sagokɛlaw kɛlɛ. Nka, Jehova b’an hakili sigi ko kɛlɛkɛminan fɛɛn o fɛɛn dilanna an kama, o si tɛna see sɔrɔ an kan kudayi.—Ezayi 54:17.
3. Bi, an be kibaro min weleweleda, a ɲɛsinna koo fila jumanw ma?
3 I ka Ala ka kitikow weleweleda ani a ka duga nataw fana: Tiɲɛn lo ko Amɔsi ye kiraya kɛ ka Israɛl siya tan ka masaya jalaki. Nka, a y’a ka kitabu kuncɛ k’a yira ko Jehova ye layidu ta ko a bena batoli senuman sigi sen kan kokura ani k’a ka mɔgɔw duga kosɔbɛ (Amɔsi 9:13-15). An fana be mɔgɔw lasɔmi Ala ka “kitilon” nata koo la. Nka an ka waajuli tɛ dan o ma. O kitilon nata ye Masaya “kibaru diman” faan dɔ ye (2 Piyɛri 3:7; Mat. 24:14). Komi Jehova bena mɔgɔ juguw halaki Arimagedɔn tuma ma, o bena kɛ sababu ye dugukolo ka kɛ alijɛnɛ ye.—Zab. 37:34.
4. Mun na an lanin b’a la ko an be se ka Jehova sago kɛ?
4 Mɔgɔ caaman b’an kɛlɛ Masaya waajuli baara kosɔn. O ye kɔrɔbɔli ye an fɛ sabu an y’an yɛrɛkun di Jehova ma ani an cɛsirinin lo k’a sago kɛ (Zan 15:19). O bɛɛ n’a ta, an lanin b’a la ko Jehova bena to k’an dɛmɛ k’a sago kɛ i ko a ye Amɔsi dɛmɛ cogo min na.—2 Kor. 3:5.