An kana ban ka koo ɲuman kɛ mɔgɔw ye
1 An kɛtɔ k’an seen don sɔbɛ la Ala ka Masaya kibaro duman waajuli la, an tɛ “ban ka ko ɲuman kɛ” an ka kiinw mɔgɔw ye (Ntal. 3:27). Nɛɛma wagati min bena kɛ Ala ka Mara kɔrɔ, kibaro fisaman wɛrɛ tɛ yen k’a lase hadamadenw ma ka tɛmɛ o kan. N’a sɔrɔ i be tɛmɛ sababu dɔw sen fɛ ka Masaya jigiya seereya kɛ bɛrɛbɛrɛ wala i be gafew to mɔgɔw fɛ caaman. Nka n’i tɛ bibulukalan kɛra ni mɔgɔw ye fɔlɔ, mun na i t’a laɲini ka dɔ daminɛ?
2 Tuma dɔw la, an yɛrɛ ka dusukunnataw lo b’an bali ka bibulukalan daminɛ ni mɔgɔw ye. Dɔw be sigasiga k’o kɛ sabu u b’a miiri ko see t’u ye wala k’u bolo degunnen lo kojugu. Ladili ninw be se k’i dɛmɛ i kana sigasiga k’i seen don bibulukalan baara la.—Mat. 28:19; Kɛw. 20:20.
3 Minw lanen t’u yɛrɛw la: N’a sɔrɔ i ma lakɔli kɛ ka taga ɲɛ fɛ wala sababu wɛrɛ lo y’a to i lanen t’i yɛrɛ la ko i be se ka mɔgɔw kalan Bibulu la. Saan kɛmɛkulu fɔlɔ kerecɛnw tun ye ciden setigiw ye nka u “tun ye mɔgɔ gansan kalanbaliw ye.” Mun lo y’u dɛmɛ ka mɔgɔw kalan tiɲɛn koo la? Olu “ni Yesu tun bɛ ɲɔgɔn fɛ” (Kɛw. 4:13). U tun kalanna karamɔgɔba Yesu fɛ, o min ka kalanw ni a ka baarakɛcogo sɛbɛra Bibulu kɔnɔ ka mara an ye. Hali n’i ma lakɔli kɛ ka taga ɲɛ fɛ, i be kalan sɔrɔla Alako la o min ɲɔgɔn tɛ yen.—Es. 50:4; 2 Kɔr. 3:5.
4 Tuma dɔw la Jehova tɛmɛna a ka ciraw fɛ ka faamanw wala mɔgɔba wɛrɛw kɔrɔfɔ minw ye sira bila. O cira dɔw tun tɛ ni lɔyɔrɔba ye, i na fɔ Amos. Ale yɛrɛ ko: “Ne tɛ kira ye, ne tɛ kiraden ye. Ne ye sagagɛnna dama de ye. Ne [ye sikomɔr toroden sɔgɔla ye, NW]” (Amos 7:14). O bɛɛ n’a ta, Amos ma sigasiga ka Jehova ka kiti lase sarakalasebaga Amaziya ma, o min tun be misiden boli bato (Amos 7:16, 17). An ka kan k’a to an hakili la tuma bɛɛ ko an be Ala ka baara lo kɛra ani ko a bena see di an ma k’o baara dafa.—2 Tim. 3:17.
5 Minw bolo degunnen lo kosɔbɛ: Hali n’i bolo degunnen lo, n’a sɔrɔ i ye wagati dɔ latigɛ walisa k’i seen don cidenya baara la tuma o tuma. Ka bibulukalan kɛ ni mɔgɔw ye, o be se ka kɛ an ka waajuli baara faan diimanba dɔ ye. Nɛɛma lo k’a ye ko Jehova ka Kuma be nɔɔ to mɔgɔ kan (Heb. 4:12). A ka di Jehova ye n’an b’an yɛrɛ di walisa ka mɔgɔw dɛmɛ u ka lɔnniya tigitigi sɔrɔ tiɲɛn koo la (1 Tim. 2:4). Hali mɛlɛkɛw be ɲagali ni mɔgɔ dɔ nimisara k’a ka sira jugu bila ani ka ɲɛtaga sɔrɔ Alako ta fan fɛ.—Luka 15:10.
6 Ala sago ye ko “mɔgɔ sifa bɛɛ ka kisi, ani u ka tiɲɛn tigitigi lɔnniya sɔrɔ.” (1 Tim. 2:4, NW). Nɛɛmaba lo dɛ ka baara kɛ ka kɛɲɛ ni Ala sago ye, n’an tɛ sigasiga ka bibulukalanw kɛ ni mɔgɔw ye!
[Study Questions]
1. Cogo juman na an tɛ “ban ka ko ɲuman kɛ”?
2. Mun lo be se ka to an be sigasiga ka bibulukalan daminɛ?
3. Mun na see b’an ye ka mɔgɔw kalan Bibulu la?
4. An be kalan juman sɔrɔ Amos ka ɲɛyirali la?
5. Mun na an ka kan k’an jija ka bibulukalan daminɛ ni mɔgɔw ye hali n’an bolo degunnen lo?
6. An be nɛɛma juman sɔrɔ Ala sago kɛli la?