Denmisɛnw kalancogo Ala koo la: Fɛɛrɛ jumanw lo ka fisa?
1. Ala ye kunkanbaara juman di bangebagaw ma?
1 Bibulu be ladili nafamanw di bangebagaw ma k’a yira u la u be se k’u deenw kalan koo minw na ani cogo min na. Loon o loon, bangebagaw ka kan ka cogoya ɲini ka kuma n’u deenw ye Ala koo la (Deter. 6:6, 7). Ladili dɔw filɛ jukɔrɔ, u ye bangebaga caaman dɛmɛ k’u deenw kalan Ala koo la. O ladiliw basiginin lo Bibulu kan.
2. Cogo juman na bangebagaw be se ka tɛmɛ Ala ka danfɛnw fɛ k’u deenw kalan?
2 Tɛmɛ danfɛnw fɛ k’i deenw kalan: Bangebagaw be se ka koo caaman kɛ k’u deenw dɛmɛ u k’a jati ko Ala ye mɔgɔ yɛrɛ yɛrɛ ye. Baro kɛ n’i deenw ye Ala ka danfɛn dɔw koo la. O danfɛnw be Ala ka jogo minw yira, i deenw dɛmɛ u k’o faamu (Ɔrɔm. 1:20). A filɛ i be se ka min kɛ: 1) I deenw ɲininga ko yiri, flɛru, bɛgɛn wala kongosogo juman lo koo ka di olu ye? 2) A’ ye sɛgɛsɛgɛri kɛ o fɛɛn koo la. 3) Denmisɛnw dɛmɛ u k’a faamu o danfɛn cogoya be u kalan min na Ala koo la.
3. Cogo juman na bangebagaw be se ka Yezu ladegi n’u be u deenw kalanna?
3 Yezu ka kalankɛcogo ladegi: Mɔgɔw kalantɔ, Yezu tun be ɲiningali caaman kɛ u ye. A tun b’a fɛ sɔbɛ la k’u ka miiriyaw n’u kɔnɔkow lɔn (Mat. 17:24, 25; Mariki 8:27-29). Bangebagaw bena se k’u deenw kalan koɲuman n’u be Yezu ladegi ani n’u be u deenw jija ko u kana siran k’u kɔnɔkow fɔ. Nka, ni miiriya jugu be deen na do, wala n’a tɛ faamuyali kɛ joona joona do? I k’a filɛ Yezu y’a ka cidenw minɛ cogo min na. Tuma dɔw la, cidenw tun be ɲɔgɔn sɔsɔ kosɔbɛ ani u m’a faamu joona ko a kɔrɔtanin lo u k’u yɛrɛ majigi. Nka Yezu muɲuna u kɔrɔ: siɲɛ caaman na, a y’u kalan ko a kɔrɔtanin lo u k’u yɛrɛ majigi (Mariki 9:33, 34; Luka 9:46-48; 22:24, 25). Bangebagaw ka kan ka Yezu ladegi: U ka kan k’u deenw kolo ni muɲuli ye ani ka segi kalan kan siɲɛ caaman na walisa u deenw ka faamuyali kɛ ka ɲɛ.
4. Bangebagaw ka ɲɛyirali be se ka nɔɔ juman to u deenw kan?
4 A’ ye ɲɛyirali ɲuman di u ma: Bangebagaw ka kɛwalew be nɔɔ to u deenw kan ka tɛmɛ u dalakumaw kan. Barika bena sɔrɔ bangebagaw ka kuma na n’olu yɛrɛ b’a sira tagama.
5. Bangebagaw be se ka dɛmɛ sɔrɔ min walisa k’u deenw kalan?
5 I be se ka dɛmɛ sɔrɔ min? Bangebaga minw b’a fɛ k’u deenw kalan Ala koo la, Jehova ka ɔriganisasiyɔn ye gafe caaman bɔ walisa k’u dɛmɛ. O gafe dɔw sɛbɛra deen fitininw kosɔn. Dɔ wɛrɛw be bangebagaw dɛmɛ u ka kumaɲɔgɔnya kɛ n’u deen kɔrɔbaninw ye. Ɛntɛrɛnɛti sɔrɔcogo be minw fɛ, olu be se ka kunnafoni wɛrɛw sɔrɔ minw ɲɛsinna bangebagaw ni denmisɛnw ma www.jw.org kan.