Aw ka ɲiningaliw jaabiliw

◼ Denmisɛnw ka kan ka mun lo kalan walisa ka kɔgɔ Alako ta fan fɛ?

Kerecɛn bangebagaw be koo caaman kɛ walisa k’u deenw “kolo k’u ladi, ani k’u kalan ka kɛɲɛ ni Matigi sago ye” (Efɛz. 6:4). Ɲɛyirali fɛ, u y’a ye ko nafa b’a la ka tilera kalan kɛ n’u deenw ye loon o loon sɔgɔma. Gwa kɔnɔ batoli tuma na ani wagati wɛrɛw la, denbayaw be se ka videwo dɔ filɛ ani ka baro kɛ o kan. U fana be se ka gafe Les jeunes s’interrogent yɔrɔ dɔw lajɛ, ka Bibulu kɔnɔko dɔ kɛ i n’a fɔ teyatiri, wala ka waajuli kɛcogo dɔw kɛ ka filɛ. Nka, n’u b’a fɛ u deenw “ka taga ɲa” ani ka kɔgɔ, fɔɔ u k’u kalan Bibulu ka tiɲɛn kuma dɔw la minw ka dun.—Eburuw 6:1.

An ka miiri k’a filɛ an be kiinmɔgɔw kalan min na. An tɛmɛko fɔlɔ la u fɛ wala viziti kura tuma na, an b’an jija ka bibulukalan daminɛ n’u ye gafe nin kɔnɔ: Kalan tigitigi juman be Bibulu kɔnɔ? O bannin kɔ, an be gafe wɛrɛ nin lajɛ n’u ye: “A’ ye to Ala ka kanuya la.” Mun na an b’o kɛ do? Gafe Bibulu ka kalan b’u dɛmɛ ka Bibulu ka kalan jɔnjɔn faamu. Gafe “Ala ka kanuya” b’a yira u la cogo min na u ka ɲi ka tagama ka kɛɲɛ ni Bibulu ka fɔta ye loon o loon. O gafe fila kalan b’u dɛmɛ u “ka kɛ Yesu la i ko jiri dili donnen” ka “sabati dannaya la” (Kɔlɔs. 2:6, 7, Bible senuma, 1996). O gafe fila tɛ se k’an deenw fana nafa wa? Olu fana mako b’a la an k’u kalan kunmabɔsara, Masaya ani suuw cogoya koo la. Denmisɛnw mako b’a la fana k’a lɔn fɛɛn min kama Ala b’a to tɔɔrɔw ka kɛ ani cogo min na u be se k’a lɔn ko an be duniɲa nin laban loonw na. U ka kan ka la a la tigitigi ko Jehova Seerew be tiɲɛn siran kan. Miiriya jɔnjɔn minw be Bibulu kɔnɔ, denmisɛnw mako b’a la k’u faamu ani ka “hakili sɔrɔ ka ɲumaman ni juguman lɔn ka bɔ ɲɔgɔn na” (Eburuw 5:14). Tiɲɛn lo ko bangebagaw ka kan k’u janto u deenw sanda la ani k’a filɛ u be koow faamu ka se hakɛ min ma. Bibulu ka tiɲɛn kuma minw ka dun, an k’a lɔn ko denmisɛn caaman be se k’olu faamu hali n’u ka dɔgɔ.—Luka 2:42, 46, 47.