An ka kiraw ladegi: Sofoni
1. Mun le tun be kɛ kira Sofoni ka wagati la? Mun na Sofoni ye ɲɛyirali ɲuman ye an fɛ bi?
1 Saan kɛmɛkulu wolonfilanan tilancɛ la ka kɔn Krista tile ɲɛ, Baali batoli tun be kɛ Juda jamana yɔrɔ bɛɛ la. A ma mɛɛn, u ye masacɛ jugu Amɔn faga. Sisan, kanbele Zoziyasi lo sigira masaya la (2 Til. Kib. 33:21–34:1). O wagati lo la, Jehova ye Sofoni ci ko a ka ale ka kitikow weleweleda. Sofoni tun ye Juda masacɛ dɔ bɔnsɔn ye. O bɛɛ n’a ta, Jehova tun ye jalaki min ben Juda kuntigiw kan, Sofoni ma o yɛlɛma (Sof. 1:1; 3:1-4). An b’an jija ka Sofoni ka jagwɛlɛya ɲɔgɔn ladegi. O kama, an be jɛnɲɔgɔnya min kɛ n’an somɔgɔw ye, an t’a to o k’an bali ka Jehova bato a ɲɛɛ ma (Mat. 10:34-37). Sofoni ye cii juman le weleweleda ani mun lo sɔrɔla o la?
2. An ka kan ka mun lo kɛ walisa ka kisi Jehova ka dimiya loon na?
2 Jehova ɲini: Jehova kelenpe lo be se ka mɔgɔ kisi a ka dimiya loon na. O lo kama, Sofoni ye Juda jamana mɔgɔw jija u ka Jehova ɲini, ka tilenninya ni yɛrɛmajigilenya ɲini sanni o loon ka se (Sof. 2:2, 3). An b’o ɲɔgɔn lo kɛ bi fana. I ko Sofoni, an be mɔgɔw jija u ka Jehova ɲini. Nka, fɔɔ an yɛrɛ ka dɔ kɛ dɔ ye. An kana ban fewu ka tugu Jehova kɔ (Sof. 1:6). An be Jehova ɲini an kɛtɔ k’a ka Kuma kalan bɛrɛbɛrɛ ani ka Jehova deli a k’an ɲɛminɛ. N’an be tagama cogo bɛnnin na, o b’a yira ko an be tilenninya ɲini. An be yɛrɛmajigilenya ɲini an kɛtɔ k’a yira ko an kolonin lo ani ko an be sɔn joona joona Jehova ka ɔriganisasiyɔn ka fɔta ma.
3. An ka cidenya baara la, mun na an ka ɲi ka koow filɛ ni ɲɛɛ ɲuman ye?
3 Nafa min sɔrɔla: Sofoni tun be kitiko min weleweleda, o ye Juda jamana mɔgɔ dɔw dusu sɔrɔ i n’a fɔ Josiyasi o min tun ye kanbele ye. Ale tun y’a daminɛ ka Jehova ɲini kabi a denmisɛnman. Kɔfɛ, Josiyasi ye kanpaɲiba dɔ kɛ jamana kɔnɔ walisa mɔgɔw kana boliw bato tugun (2 Til. Kib. 34:2-5). Bi, tiɲɛn lo ko Masaya kisɛ dɔw be ben siradaw la, farayɔrɔw la ani ŋɔniw cɛma. Nka, dɔw fana be ben dugukolo ɲuman kan ani u be den (Mat. 13:18-23). An lanin b’a la ko Jehova bena to k’an duga n’an tora k’an jija ka Masaya kisɛw jɛnsɛn.—Zab. 126:6.
4. Mun na an ka ɲi ka to ka Jehova makɔnɔ?
4 Juda jamana na, mɔgɔ dɔw tun b’a miiri ko Jehova tɛna foyi kɛ. Nka Jehova y’a fɔ ka gwɛ ko ale ka loonba surunyana (Sof. 1:12, 14). Mɔgɔ minw tun be u jigi la Jehova kan, olu dɔrɔn lo tun bena kisi (Sof. 3:12, 17). K’an to an ka Alaba Jehova makɔnɔni na, an ka jɛn n’an kerecɛn ɲɔgɔnw ye k’a bato ninsɔndiya la!—Sof. 3:8, 9.