Dɔnkili kuraw batoli kama!
1 Watch Tower tɔɔn b’a ka lajɛn min kɛ saan o saan, ɲina o kɛra ɔkutɔburu tile 4nan na. O lajɛn sen fɛ, u ye mɔgɔw lalɔnniya ko an ka dɔnkili gafe kɔnɔnakow bena yɛlɛma. O kibaro ye mɔgɔw ninsɔndiya dɛ! U ye bɛɛ hakili jigi ko Masaya dɔnkiliw ye an ka batoli faan dɔ ye min kɔrɔtanin lo kosɔbɛ.—Zab. 96:2.
2 N’a sɔrɔ i bena i yɛrɛ ɲininga ko: ‘Mun na a bɛnnin lo an k’an ka dɔnkili gafe kɔnɔnakow yɛlɛma?’ An ka kan k’o kɛ kuun caaman kosɔn. A fɔlɔ, an be ni faamuyali min ye Bibulu koo la, o be gwɛra ka taga ani an ka dɔnkiliw kɔnɔ kuma dɔw bɛnnin tɛ o ma (Talenw 4:18). Kuun wɛrɛ ye ko kuma minw be sɔrɔ an ka dɔnkili gafe kɔnɔ sisan, u fanba bɔra Traduction du monde nouveau kɔrɔman lo kɔnɔ. O kumaw ka kan ka yɛlɛma ka kɛɲɛ ni Traduction du monde nouveau bɔnin kura ye. Komi baaraba lo ka kan ka kɛ walisa ka se k’o yɛlɛmaniw dɔrɔn kɛ, an y’a la tigɛ ka dɔnkili kura damanin fara kɔrɔmanw kan.
3 Yala an ka kan ka kɔnɔni kɛ dɔnkili gafe kura ka bɔ papiye kan fɔlɔ ka sɔrɔ k’a daminɛ ka dɔnkili kuraw la wa? Ayi. An ninsɔn ka di k’a fɔ aw ye ko kalo damanin nataw la, dɔnkili kura dɔw bena bila jw.org kan. Ni dɔnkili kura dɔ bɔra, an bena a sɛbɛ waajuliko lajɛn dɔ ka porogramu laban na ko “dɔnkili kura” ani an bena a la.
4 Dɔnkili kuraw degicogo: A man nɔgɔ ka dɔnkili kura degi. Nka, an b’a fɛ ka dɔnkili la ni kaanba ye kafo ka lajɛnw na. I ko zaburu sɛbɛbaga, an t’a fɛ ka dɔnkili la “dabila” (Zab. 30:13). Walisa ka dɔnkili kura degi, an ka tugu ladili nɔgɔman nunu kɔ:
Dɔnkili ka fɔlikan min bena bila jw.org kan i k’o lamɛn siɲɛ caaman. N’i tora k’a lamɛn, a tɛna gwɛlɛya i fɛ k’i hakili to a la.
Dɔnkili ka kumaw degi ani banba k’u to i hakili la.
Dɔnkili kɔnɔ kumaw la ka tugu fɔlikan kɔ. I ka to k’o kɛ fɔɔ ka dɔnkili nin lɔn bɛrɛbɛrɛ.
A’ ye wagati dɔɔni ta gwa kɔnɔ batoli tuma na ka dɔnkili kuraw degi fɔɔ aw ka denbaya k’u lɔn koɲuman.
5 Kalo nataw la, n’u ye dɔnkili kura dɔ don porogramu na walisa ka waajuliko lajɛn kuncɛ, kafo bena piyanokan lamɛn siɲɛ kelen. O kɔ, jama bena tugu fɔlikan kɔ ka dɔnkili la i ko an be deli ka dɔnkili tɔɔw la cogo min na.
6 N’an miirila k’a filɛ, an bena a ye ko n’an be dɔnkili la an ka lajɛnw na o be sababu di an ma k’an kaan fara ɲɔgɔn kan ka Jehova tando ninsɔndiya la. O kama, an kana to ka wuli ka bɔ an ka sigiyɔrɔ la gwansan ni dɔnkili daminɛna an ka lajɛnw na.
7 An be se k’a yira cogo wɛrɛ la ko an ka miziki senuman ka di an ye. Lajɛnbaw la, fɔlikan be lamɛn ka sɔrɔ ka kalanw daminɛ. Siɲɛ fila saan o saan, balima kantigiw be bɔ duniɲa faan bɛɛ la ka na Patɛrsɔn (Niyɔriki mara la) walisa ka fɔlikan diimanw labɛn an ka batoli kama. Olu yɛrɛ lo be u ka taransipɔri sara. O kama ni kalankɛla ɲɛbila y’a ɲini an fɛ ko an ka sigi an ka sigiyɔrɔw la ani ka fɔlikan lamɛn, an ka kan ka mɛnni kɛ a fɛ. N’an y’o kɛ, o bena an dɛmɛ k’an dusukun labɛn walisa ka kalanw lamɛn.—Ɛsid. 7:10.
8 An bena an ka bi lajɛn kuncɛ ni dɔnkili kura ye. A kuun ko: “Masaya sigira sen kan. O Masaya ka na!” O dɔnkili kura bɔra Watch Tower tɔɔn ka saan o saan lajɛnba tɛmɛnin na. A labɛnna Ala ka Masaya saan 100nan lo kama.
9 Siga t’a la, dɔnkili kura nunu ye ‘fɛnɲumanw’ ye ka bɔ Jehova yɔrɔ (Mat. 12:35a). An k’an jija k’u degi ani k’u la n’an dusukun bɛɛ ye. O cogo la an bena tandoli ani nɔɔrɔ la an ka Ala kan cogo bɛnnin na!—Zab. 147:1.