Fiyentɔw dɛmɛ u ka Jehova lɔn

1. Yezu y’a yira cogo di ko a be makari fiyentɔw la?

¹ Yezu salon tora tile damanin dɔrɔn. A bɔtɔ Zeriko dugu kɔnɔ, fiyentɔ darikɛla fila tora ka pɛrɛn k’a fɔ ko: “Matigi, makari an na!” Tɔɔrɔbaw tun bena Yezu sɔrɔ. Hali k’a sɔrɔ a tun be miirila o la, a lɔra ka fiyentɔ fila nunu weele ani a y’u kɛnɛya (Mat. 20:29-34). Yezu makarila fiyentɔw la cogo min na, an be se k’a ladegi cogo di o la?

2. An be se ka fiyentɔw waaju cogo di jamayɔrɔ la?

² A ɲini k’u dɛmɛ: N’i ye fiyentɔ dɔ ye, i n’a fɔ jamayɔrɔ la, i tɔgɔ fɔ a ye ani a ɲini k’a dɛmɛ. A daminɛ na, a be se ka sigasiga i la sabu mɔgɔw ka teli k’o ɲɔgɔnna mɔgɔw tɔɲɔ. Nka, n’i b’i mako don a la sɔbɛ la, o be se k’a hakili sigi. I hakili to a la ko fiyentɔya sifaw ka ca. O la, i bena a lɔn a tigi mako be dɛmɛ sifa min na. A tigi dɛmɛni kɔ, i be se k’a fɔ a ye ko i be mɔgɔw dɛmɛna fana ka Bibulu faamu. A fɔ a ye ko i b’a fɛ ka bibulusen dɔ kalan a ye i n’a fɔ Zaburuw 146:8 wala Ezayi 35:5, 6. N’a be se ka braille (fiyentɔw ka sɛbɛriw) kalan, a ɲininga n’a be gafe dɔ fɛ min sɛbɛra o cogo la. O gafe bena a dɛmɛ ka dɔ lɔn Bibulu koo la. I be se fana k’a dɛmɛ ka fɛɛn lamɛnta dɔw sɔrɔ jw.org kan. Sɛbɛri minw be bɔ ɔridinatɛri ka ekran kan, porogramu dɔw be se k’u kalan ni kaanba ye. N’o porogramu ɲɔgɔn b’a ka ɔridinatɛri kɔnɔ, a be se ka jw.org ka gafew dɔw kalan lamɛn. A fana be se ka gafe dɔw telesarse RTF cogo la (format de texte enrichi).—Koorilen nin lajɛ: “Fiyentɔ dɛmɛcogo.”

3. An be se ka fiyentɔw sɔrɔ cogo di an ka kiinw kɔnɔ?

³ An ka fiyentɔw yɔrɔ ɲini: Waajuli kɛtɔ soo ni soo, an man teli ka fiyentɔw ye. Mun na do? U caaman be sigasiga ka kuma ni lonanw ye. O lo kama, an ka ɲi k’an jija sɔbɛ la k’u “yɔrɔ ɲini” walisa k’u waaju (Mat. 10:11). I ka baarakɛɲɔgɔn wala lakɔli filankuru dɔ ye fiyentɔ ye wa? A ɲini k’a waaju. Yala fiyentɔw ka lakɔliso dɔ be yen aw ka kiin kɔnɔ wa? N’o lo, an ka gafe minw sɛbɛra fiyentɔw kosɔn, taga u dɔw di o lakɔliso ka biblotɛki la. I be mɔgɔ dɔ lɔn min ka somɔgɔ dɔ ye fiyentɔ ye wa? Aw ka kiin kɔnɔ, yala jɛnkulu dɔw be yen wala siyɔrɔ dɔw be yen fiyentɔw dɛmɛni kama wa? A ɲɛfɔ o fiyentɔ ka somɔgɔ ye, jɛnkulu ka sekeretɛri wala fiyentɔw siyɔrɔ ka ɲɛmɔgɔ ye ko Jehova Seerew b’a fɛ sɔbɛ la ka fiyentɔw dɛmɛ. A fɔ u ye ko i bena na gafew wala fɛɛn lamɛntaw di u ma. A yira u la Bibulu kɔnɔ ko yanni dɔɔni, Ala bena fiyentɔya ban pewu. I be se fana ka jw.org ka videwo nin yira u la: “N’ale tun tɛ, n tun bena kɛ di?” (Sans elle, je serais perdu). O videwo b’a yira fiyentɔ dɔ ye nafa min sɔrɔ Bibulu la min sɛbɛra fiyentɔw kosɔn. N’i ye i nakun ɲɛfɔ o cogo la, o be se k’a to i be sira sɔrɔ ka baro kɛ ni fiyentɔw ye.

4. Zanɛti ka koo b’an dɛmɛ ka mun lo faamu?

⁴ An balimamuso Zanɛti ye fiyentɔ ye. A tagara bɔ fiyentɔ dɔw fɛ u ka luu kɔnɔ. A ye baro daminɛ ni muso dɔ ye. Zanɛti y’a fɔ a ye ko: “Yezu ye fiyentɔw ɲɛɛw yɛlɛ walisa k’a yira a bena na min kɛ fiyentɔw bɛɛ ye.” U ye Yirali 21:3, 4 kalan ɲɔgɔn fɛ. Ala ka Masaya bena o layidu dafa cogo min na, Zanɛti y’o ɲɛfɔ muso ye. Muso jera dɔɔni ani a y’a fɔ ko: “Ne ma deli k’o mɛn fiyentɔ dɔ daa la. Minw tɛ fiyentɔw ye, olu fanba b’a miiri ko mɔgɔ ka kɛwalew wala a bɛnbaw ka kɛwalew lo b’a to a be kɛ fiyentɔ ye.” Gafe Bibulu ka kalan be sɔrɔ yɔrɔ min na jw.org kan, Zanɛti y’o ladɛrɛsi ci muso ma e-mail fɛ. Sisan, u be bibulukalan kɛ ɲɔgɔn fɛ siɲɛ fila lɔgɔkun o lɔgɔkun.

5. An tɛ se ka fiyentɔw ɲɛɛw yɛlɛ i ko Yezu y’a kɛ cogo min na. Nka, n’an b’an mako don u la, an bena nɛɛma juman lo sɔrɔ?

⁵ Tiɲɛn lo ko an tɛ se ka fiyentɔw ɲɛɛw yɛlɛ i ko Yezu y’a kɛ cogo min na. Nka, duniɲa nin ka ala ye mɔgɔ minw hakili fiyen, ani minw ye fiyentɔw yɛrɛ yɛrɛ ye, an be se k’olu dɛmɛ u ka Bibulu ka tiɲɛn kumaw faamu (2 Kor. 4:4). Yezu ye fiyentɔ fila nunu ɲɛɛw yɛlɛ Zeriko gɛrɛfɛ sabu “u hinɛ donna” a la (Mat. 20:34). An k’an mako don fiyentɔw la o cogo kelen na. O la, an bena nɛɛma sɔrɔ k’u dɔw dɛmɛ u ka Jehova lɔn. Ale lo bena fiyentɔya ban pewu pewu.