U ka limaniya ladegi
1. K’a ta ɔkutɔburu tile 19nan lɔgɔkun ma, an bena mun lo lajɛ kafo ka Bibulu kalan na?
1 Saan 2015, ɔkutɔburu tile 19nan lɔgɔkun na, an bena a daminɛ ka gafe nin lajɛ kafo ka Bibulu kalan na: U ka limaniya ladegi. Cɛɛw ni muso limaniyanin minw kofɔra Bibulu kɔnɔ, olu 14 ka maanaw lo lakalila o gafe kɔnɔ. A b’o mɔgɔ kantigimanw ka koo lakali cogo dɔ la, a be kɛ komi an ɲɛɛ b’u la tiɲɛn tiɲɛn na. O la, an b’a faamu cogo min na u ye baara kɛ Jehova ye gwɛlɛyaw bɛɛ n’a ta. O kitabu b’an dɛmɛ fana ka kalan sɔrɔ o mɔgɔw ka koo la ani k’a filɛ cogo min na an yɛrɛ be se k’o kalan sira tagama bi.—Eburuw 6:12.
2. An bena gafe min lajɛ, a’ y’o cogoya dɔw lakali.
2 Gafe cogoyaw: Jaa ani karti dɔw b’a kɔnɔ minw b’an dɛmɛ k’a lɔn mɔgɔ kelen kelen bɛɛ y’a ka ɲɛnamaya kɛ yɔrɔ min na ani tuma min na. Ka fara o kan, kalansen kelen kelen bɛɛ laban na, yɔrɔ dɔ be yen ko: “Miiri k’a filɛ . . . ” O b’an dɛmɛ ka miiri o kalan na ani k’a filɛ an be se k’a sira tagama cogo min na. Jaa kulɛrilaman caaman be o gafe kɔnɔ ani sɛgɛsɛgɛri kɛra koɲuman walisa k’an dɛmɛ an ka miiri k’a filɛ koow kɛra cogo min na tigitigi.
3. An be se ka nafa sɔrɔ o gafe kalan na cogo di?
3 I be se ka nafa min sɔrɔ a kalan na: Gafe be daminɛ ni Koow Ɲɛnabɔla Jɛnkulu ka bataki lo ye. U b’an jija ko: “A kɛ komi i be yen o maanaw kɛyɔrɔ la: A ɲini ka kɛ n’o mɔgɔw ka dusukunnataw ye. U ɲɛɛ lara min kan, a kɛ komi i ɲɛɛ b’o la fana. Olu ye koow ta cogo min na, a filɛ e tun bena min kɛ fana.” N’a fɔra ko an k’a kɛ komi an tun be yen o maanaw kɛyɔrɔ la, o kɔrɔ tɛ ko an ka miiri an kunfɛ. Nka, o kɔrɔ ko an ka jatiminɛ kɛ o maanaw koo la ani an k’a ɲini k’an yɛrɛ bila o mɔgɔw nɔɔ na. Walisa ka se k’o kɛ, fɔɔ an ka wagati ta ani ka miiri koɲuman koow kan (Neemi 8:8). An bena yɔrɔ min lajɛ, n’o be daminɛ kalansen cɛmancɛ la, kalan ɲɛminɛbaga bena sekɔndi 30-60 ta ka segi kalan tɛmɛnin kan. Kalankɛla be se ka ɲiningali kelen wala fila kɛ walisa ka segikanni kɛ ani ka kalan kuncɛ, n’a y’a sɔrɔ ko yɔrɔ nin tɛ yen kalan laban na: “Miiri k’a filɛ . . . ”
4. Mun na an mako b’a la ka gafe nin kalan: U ka limaniya ladegi?
4 An be duniɲa min kɔnɔ, o b’a ɲini loon o loon k’an ka limaniya nagasi cogo bɛɛ la. Gafe nin basiginin lo La Tour de Garde kan. O gafe ani a ɲɔgɔnna barokun minw bele be to ka bɔ La Tour de Garde kɔnɔ, olu bɛɛ ye Jehova ka nilifɛnw lo ye. U b’an dɛmɛ k’an ka limaniya sabati (Zaki 1:17). An k’o gafe nafa sɔrɔ bɛrɛbɛrɛ an kɛtɔ ka na kafo ka Bibulu kalan na tuma o tuma ani k’an daa don baro la bɛrɛbɛrɛ!