‘ Rends pleinement témoignage au sujet du Royaume de Dieu ’

1. K’a daminɛ marisikalo tile 14nan lɔgɔkun ma, an bena mun lo lajɛ kafo ka Bibulu kalan na?

¹ Saan 2011, marisikalo tile 14nan lɔgɔkun na, an bena a daminɛ ka gafe ‘ Rends pleinement témoignage au sujet du Royaume de Dieu ’ lajɛ kafo ka Bibulu kalan na. Gafe nin be Kɛwalew kitabu kuturu bɛɛ lo lajɛ. A b’o kɛ cogo dɔ la min b’a to a kɔnɔko kabakomanw b’a kalanbaga dusukun sɔrɔ kosɔbɛ. Gafe Rends témoignage tɛ Kɛwalew kitabu vɛrisew lajɛ ka tugu tugu ɲɔgɔn kɔ. Nka, o kitabu be koo minw lakali, a b’an dɛmɛ ka kalan sɔrɔ u la ani k’a filɛ an yɛrɛ be se k’o kalan sira tagama cogo min na.—Rom. 15:4.

2. A’ ye gafe Rends témoignage cogoya dɔw lakali.

² Gafe cogoyaw: Dadon kuma minw be sɔrɔ ɲɛɛ 2nan kan, o ye Koow Ɲɛnabɔla Jɛnkulu ka bataki diiman lo ye k’a yira cogo min na u b’a fɛ o gafe k’an nafa. K’a ta sapitiri 2nan ma, kumasen dɔ be yen min be sapitiri kelen kelen ka hakilinata kunba yira. Ani, bibulusen dɔw b’a yira kalan basiginen be Kɛwalew kitabu yɔrɔ minw kan. Koorilenw be sɔrɔ sapitiri caaman kɔnɔ. U be kunnafoniw di mɔgɔw, yɔrɔw wala wale dɔw koo la. Gafe dakɛnɛw ka boon boon, an be se ka kunnafoni wɛrɛw sɛbɛ yen. Gafe kuru bɛɛ kɔnɔ, jaaw be yen minw be Bibulu kɔnɔko dɔw yira walisa k’an dɛmɛ ka koo jɔnjɔn dɔw faamu. Gafe ɲɛɛ laban b’an dɛmɛ ka jaaw sɔrɔyɔrɔ lɔn gafe kɔnɔ ani a b’a ɲɛfɔ jaa nunu be koo minw yira. Gafe kɔgolow kɔnɔ, kartiw be yen minw b’an dɛmɛ k’a lɔn saan kɛmɛkulu fɔlɔ kerecɛnw tagara yɔrɔ minw na tuma min na u y’a daminɛ ka kibaro duman jɛnsɛn “fo ka taa se dugukolo dan bɛɛ ma.”—Kɛw. 1:8.

3. Kɛwalew kitabu kalan bena an dɛmɛ ka ɲiningaliba jumanw ka jaabiliw sɔrɔ?

³ Ɲiningaliba dɔw ka jaabiliw: Kɛwalew kitabu kalan bena an dɛmɛ ka ɲiningaliba dɔw ka jaabiliw faamu ka ɲɛ kerecɛn cidenya baara koo la. I n’a fɔ, baara ani kibaro jumanw lo b’a to mɔgɔw be Yesu Krista ka kalanden sɔbɛw lɔn? O baara min be kɛra duniɲa kuru bɛɛ kɔnɔ, jɔn lo b’a ɲɛminɛ ani a b’o kɛ cogo di? Ni mɔgɔw be cidenw kɛlɛ ani k’u kɔrɔbɔ o be sababu jumanw di u ma? Hakili senu b’an dɛmɛ cogo di an ka cidenya baara la?

4. An be se ka nafa bɛrɛbɛrɛ sɔrɔ o gafe kalan na cogo di?

⁴ Walisa ka nafa bɛrɛbɛrɛ sɔrɔ o gafe kalan na, kɔn ka kalan lajɛ ani i yɛrɛ labɛn walisa k’i daa don baro la kafo kɔnɔ. I ka kɛ lajɛn kelen kelen bɛɛ la ani i ka miiri k’a filɛ cogo min na i be se ka kalanw sira tagama i ka cidenya baara la. An k’a to o gafe diiman kalan k’an lasun ka seereya kɛ ka dafa Ala ka Masaya koo la!—Kɛw. 28:23.