Mɔgɔw kalan tiɲɛn koo la

K’a ta sɛtanburukalo ma, yiracogo modɛli kura dɔ bena to ka bɔ Kerecɛnw ka ɲɛnamaya n’u ka waajuli baara Lajɛnsɛbɛ kɔnɔ. A kuun ko: “Mɔgɔw kalan tiɲɛn koo la.” An ka laɲinita bena kɛ ka basigi ɲiningali ni vɛrise dɔ kan walisa ka Bibulu ka kalan jɔnjɔn dɔ yira ka gwɛ.

Ni dɔ y’a mako don, an be se ka sɛbɛ dɔ to a fɛ wala ka jw.org ka videwo dɔ yira a la. O la, a tigi bena kɔrɔtɔ an ka na siɲɛ wɛrɛ. An ka banba ka taga bɔ a tigi ye tile damanin kɔnɔ walisa ka taga ɲɛ ni baro ye. O yiracogow ani lakɔlidenw ka kalanw bena basigi gafe nin sapitiriw ka hakilinata jɔnjɔnw kan: Bibulu b’an kalan mun lo la? Ɲiningaliw ni vɛrise wɛrɛw be sɔrɔ o gafe kɔnɔ walisa k’an dɛmɛ ka basigi Bibulu dɔrɔn kan ka viziti kuraw ni bibulukalan kɛ.

Ɲɛnamaya sira ye kelen dɔrɔn lo ye (Mat. 7:13, 14). An be kuma minw fɛ, u ka diinanw n’u bɔyɔrɔw tɛ kelen ye. O kama, mɔgɔ bena a mako don Bibulu ka tiɲɛn kuma minw na, an k’olu lo fɔ a ye (1 Tim. 2:4). Dɔ bena fara an ka ninsɔndiya kan n’an be Bibulu ka barokun caaman lɔn ka ɲɛ ani n’an b’an jija ka se baarakɛcogo la koɲuman ni Ala ka Kuma ye. An bena se fana ka mɔgɔw kalan tiɲɛn koo la koɲuman.—2 Tim. 2:15.