Ka ɲɔgɔn dɛmɛ ka waajuli kɛ kiin minw kɔnɔ kaan caaman be fɔ

Saan 33 ka Pantekɔte K.T.L, Yahutu dɔw nana ka bɔ “diɲɛ faan bɛɛ” la ani u “tun be siran Ala ɲa kosɔbɛ.” N’a sɔrɔ u tun be kaan dɔw mɛn mɔgɔw tun ka teli ka minw fɔ i n’a fɔ heburukan wala gɛrɛkikan. Nka, Jehova ye labɛn kɛ walisa u ka kibaro diiman mɛn u “ka kaan na.” (Kɛw. 2:5, 8). Mun na do? Sabu, ni mɔgɔw ye Masaya kibaro diiman mɛn u ka kaan na, u ka teli ka sɔn a la. Bi, kaan caaman be fɔ kiin dɔw la. Ni kafo dɔw tɛ lajɛnw kɛ kaan kelen na ani u be waajuli kɛ o kiinw ɲɔgɔn na, u ka teli ka kɛ ni waajuli kɛyɔrɔ kelen ye. N’o lo, u ka ɲi k’u janto u kana waajuli kɛ wagati kelen na wala ka segi kojugu ka na waajuli kɛ o kiinw kɔnɔ. N’o tɛ, lamɛnnikɛlaw be se ka dimi. O kafow ka weleweledalaw be se ka baara kɛ ɲɔgɔn fɛ cogo di do?

• 

  A’ ye kuma ka bɛn kelen kan (Talenw 15:22): Waajulibaara kɔrɔsibagaw ka ɲi ka jɛn ka fɛɛrɛ dɔ sigi seen kan ɲɔgɔn fɛ min bena kafow dɛmɛ k’u ka kiinw bɛɛ baara cogo fisaman na. Kafo minw na kaan wɛrɛ be fɔ, n’u ka kiinw man ca, n’a sɔrɔ u bena a ɲini aw fɛ aw kana olu ka kaan fɔbagaw waaju. Nka, a be se ka kɛ k’o kafow ka kiinw ka bon ani u tɛ sera k’u ka kiinw bɛɛ baara tuma bɛɛ. O kama, n’a sɔrɔ u bena a fɔ aw ye ko aw k’u ka kaan fɔbagaw waaju, nka ni dɔ y’a mako don, aw ka kaan bɔ olu ma (od-F 93 § 37). Wala u be se k’a ɲini aw fɛ aw k’u dɛmɛ k’u ka kaan fɔbagaw yɔrɔ ɲini ani k’u ka ladɛrɛsi ci u ma walisa u k’o sɛbɛ u ka kiin kartiw kan (km 7/12 5, koorilen). A to i hakili la ko tuma dɔw la, a be se ka kɛ ko kaan caaman be fɔ luu kelen kɔnɔ. Labɛn minw be kɛ ka se ka kiinw bɛɛ baara, o ka ɲi ka bɛn ni jamana ka sariyaw ye.

• 

  A’ ye cikanw labato (Efɛz. 4:16): Aw ka kafo ka waajuli baara kɔrɔsibaga mana cikan o cikan di aw ma, aw k’o labato koɲuman. Yala i be bibulukalan kɛra ni mɔgɔ dɔ ye min be kaan wɛrɛ fɔ wa? N’a sɔrɔ o Bibulu kalanden bena ɲɛtaga kɛ joona joona n’i y’a kalifa kafo wala jɛnkulu dɔ ma min b’a ka kaan fɔ.

• 

  I yɛrɛ labɛn (Talenw 15:28; 16:1): Ni lamɛnnikɛla dɔ be kaan wɛrɛ fɔ, i seko kɛ ka kibaro diiman fɔ a ye. Kiinmɔgɔw be kaan minw fɔ, i be se k’i yɛrɛ labɛn i kɛtɔ k’o kaan degi. I be se ka kɔn ka Bibulu ni videwow telesarse i ka telefɔni wala tablɛti kan o kaanw na. Ani fana, i be se ka baara kɛ ni JW Language ye walisa ka foli kɛcogow degi kaan dɔw la.