KERECƐNW KA ƝƐNAMAYA

Baara kɛ ni gafe nin ye waajuli la: Ɲɛnamaya kɛ hɛɛrɛ la fɔɔ abada!

An ninsɔn ka di kosɔbɛ yɛrɛ le ka kitabunin kura ni gafe kura dɔ sɔrɔ bibulukalanw kama! An bena jijali minw bɛɛ kɛ walisa ka mɔgɔ caaman kɛ Krista ka kalandenw ye, an be Jehova deli a k’o duga (Mat. 28:18-20; 1 Kor. 3:6-9). An be se ka baara kɛ n’o baarakɛminanw ye cogo di?

Gafe Ɲɛnamaya kɛ hɛɛrɛ la fɔɔ abada!, b’a to mɔgɔ be nafa sɔrɔ bibulukalan na kalankɛcogo kura dɔ sababu fɛ. An b’i jija i ka cikan nunu sira tagama n’i b’i yɛrɛ labɛnna bibulukalan kama, ani n’i be bibulukalan kɛra ni mɔgɔw ye.a

Dakunw kalan, ani a’ ye baro kɛ ɲiningaliw kan
A sɛbɛra vɛrise minw kɔrɔ ko “kalan”, aw k’u kalan ani kalanden dɛmɛ a k’a faamu a be se k’u sira tagama cogo min na
Videwow yira, ani ɲiningali minw kɛra ka ɲɛsin videwow ma, a’ ye baro kɛ u kan
N’i ye kalansen dɔ daminɛ ni dɔ ye, a ɲini k’o ban o loon bɛɛ

Waajuli la, kitabunin di mɔgɔw ma fɔlɔ k’a filɛ n’u b’u mako don (Koorilen nin lajɛ: “Baara kɛcogo ni sɛbɛ nin ye ɲɔgɔnyeko fɔlɔ la: Ɲɛnamaya kɛ hɛɛrɛ la fɔɔ abada!”). N’o kitabunin banna ani kalanden b’a fɛ ka taga ɲɛ n’a ka bibulukalan ye, gafe d’a ma ani aw ka kalansen 4nan daminɛ. N’i ye bibulukalan daminɛ ni mɔgɔ dɔ ye ka ban gafe nunu dɔ kɔnɔ: Bibulu b’an kalan mun la? wala To Ala ka kanuya la, o bibulukalan yɛlɛma gafe kura kɔnɔ. O kɔ, a filɛ aw be se ka kalan daminɛ yɔrɔ min na o gafe kɔnɔ.

O balimacɛ n’a muso be baara kɛra ni gafe nin ye walisa ka bibulukalan kɛ n’o cɛɛ ye a ka soo: “Ɲɛnamaya kɛ hɛɛrɛ la fɔɔ abada!”

VIDEWO NIN FILƐ: I DANSƐ I KA BIBULUKALAN NA. O KƆ, ƝININGALI NUNU JAABI:

Kalandenw bena mun lo kalan o gafe kura kɔnɔ?
Mun na i ka ɲi k’o videwo yira kalanden kuraw la?
I ka ɲi ka kalanden jija a ka to ka laɲinita jumanw lo latigɛ ani k’u dafa?—Yɔrɔ nin lajɛ: “Tilanyɔrɔ kelen kelen bɛɛ: Barokun ni laɲinitaw.”

a I JANTO: Yɔrɔ min na a sɛbɛra ko “Nunu lajɛ fana”, hali ni waajibi tɛ k’u lajɛ bibulukalan tuma na, wagati ta ka barokunw kalan ani ka videwow lajɛ i yɛrɛ labɛntɔ. O la i bena a lɔn min be se k’i ka kalanden dusukun sɔrɔ tigitigi, ani k’a dɛmɛ. N’i b’o gafew lajɛra i ka tablɛti n’a ɲɔgɔnnaw kɔnɔ, videwo dɔw ni fɛɛn wɛrɛw lien be yen minw tɛ sɔrɔ papiyelaman kan.

TILANYƆRƆ KELEN KELEN BƐƐ: BAROKUN NI LAƝINITAW
	KALANSENW	BAROKUNW	KALANDEN KA LAƝINITAW
1	01-12	Bibulu be se k’i dɛmɛ cogo min na k’i ka ɲɛnamaya kɛcogo fisaya ani i be se ka Bibulu Tigi lɔn cogo min na.	Kalanden jija a ka Bibulu kalan, a k’a yɛrɛ labɛn bibulukalan kama, ani a ka taga lajɛnw na.
2	13-33	A filɛ Ala ye min kɛ an ye, ani a b’a fɛ an k’a bato cogo min na.	Kalanden be min kalanna, a jija a k’o kofɔ tɔɔw ye ani a ka kɛ weleweledala ye.
3	34-47	A filɛ Ala be min ɲini a batobagaw fɛ.	Kalanden jija a k’a yɛrɛkun di Jehova ma ani ka batize.
4	48-60	A filɛ i be se ka to Ala ka kanuya la cogo min na.	Kalanden dɛmɛ a k’a lɔn a be se ka ɲuman ni juguman faranfasi ka bɔ ɲɔgɔn na cogo min na ani ka ɲɛtaga kɛ Alako ta fan fɛ.