Masacɛ minw be ɲɔgɔn kɛlɛla laban wagati la

Kiraya kuma minw kofɔra tablo nin kɔnɔ, olu dɔw dafara wagati kelen na. U b’a yira cogo caaman na ko an be “laban waati” lo la.—Dan. 12:4.

• 

  

  Vɛrisew: Yir. 11:7; 12:13, 17; 13:1-8, 12

  Kiraya kuma: “Sogo” be dugukolo marala kabi saan waa saba ni kɔ. Laban wagati la, a kungolo wolonfilanan mandimina. Kɔfɛ, o kuun sumana ani “adamadenw” tugura sogo kɔ. Sutana tɛmɛna o sogo fɛ ka “kɛlɛ nin yɛlɛma k’a sin [muso] deenw ma.”

  A dafali: Sanjiba kɔ Nuhun ka wagati la, gofɛrɛnɛman minw murutinin lo Ala ka kuntigiya ma, olu y’a daminɛ ka adamadenw mara. O kɔ, saan waa saba ni kɔ, o gofɛrɛnɛman setigi dɔ kɛra Angletɛri ye. A ka fanga dɔgɔyara kɛlɛba fɔlɔ la. Ameriki farala a kan ani a ye barika sɔrɔ kokura. Laban wagati la, Sutana be tɛmɛna gofɛrɛnɛmanw bɛɛ fɛ ka Ala sagokɛlaw kɛlɛ.

• 

  Vɛrisew: Dan. 11:25-45

  Kiraya kuma: Worodugu yanfan fɛ masacɛ ani saheli yanfan fɛ masacɛ be ɲɔgɔn kɛlɛ setigiya kosɔn.

  A dafali: Alemaɲi ye Angletɛri ni Ameriki kɛlɛ. Saan 1945, Soviyetiki mara n’a jɛnɲɔgɔnw kɛra saheli yanfan fɛ masacɛ ye. Saan 1991, Soviyetiki mara ka fanga nagasira. O kɔ, Irisi jamana n’a jɛnɲɔgɔnw kɛra saheli yanfan fɛ masacɛ ye.

• 

  Vɛrisew: Ezayi 61:1; Mal. 3:1; Luka 4:18

  Kiraya kuma: Jehova y’a ka “ciden” ci walisa “a ka sira labɛn” sanni Masiya ka Masaya ka sigi sen kan. O ciden y’a daminɛ “ka kibaru diman fɔ” mɔgɔ majigininw ye.

  A dafali: K’a ta saan 1870 ma, Charles Russell n’a jɛnɲɔgɔnw ye Bibulu sɛgɛsɛgɛ kosɔbɛ walisa ka Bibulu ka tiɲɛn kalanw ɲɛfɔ mɔgɔw ye. Saan 1881, u y’a faamu ko a kɔrɔtanin lo kosɔbɛ Ala sagokɛlaw ka waajuli kɛ. U ye barokun dɔw sɛbɛ i n’a fɔ “An mako be weleweledala 1 000 na” ani “Ala y’an mɔ waajuli kama.”

• 

  Vɛrisew: Mat. 13:24-30, 36-43

  Kiraya kuma: Cɛɛ dɔ ye bile dan a ka foro kɔnɔ. O kɔ, a jugu dɔ nana binjugu dan yen. Binjugu falenna ka bile datugu. Sumantigɛ tuma na, u ye binjugu faran ka bɔ bile la.

  A dafali: K’a ta saan 1870, faranfasi min be kerecɛn sɔbɛw ni kerecɛn tɔgɔtigiw cɛ, o yirala ka gwɛ dɔɔni dɔɔni. Laban wagati la, kerecɛn sɔbɛw lajɛnna kafo kɔnɔ ani u faranna ka bɔ kerecɛn tɔgɔtigiw la.

• 

  Vɛrisew: Dan. 2:31-33, 41-43

  Kiraya kuma: Jaa min dilanna ni nigɛ sifa caaman ye, ale sentigɛ ye nigɛ ni bɔgɔ ye.

  A dafali: Angletɛri ni Ameriki be kuntigiya kɛra mɔgɔ minw kun na, olu murutinin lo u ma. Bɔgɔ y’o mɔgɔw lo tagamasiɲɛ ye. U ka kɛtaw kosɔn, o gofɛrɛnɛman minw fanga be i ko nigɛ, u tɛ se k’o digi mɔgɔw kan.

• 

  

  Vɛrisew: Mat. 13:30; 24:14, 45, NW; 28:19, 20

  Kiraya kuma: “Bile” tigɛra ka don “bondo” kɔnɔ ani “jɔncɛ kantigiman hakiliman” sigira “baaradenw” kun na. U y’a daminɛ ka “Ala ka kibaru diman” fɔ “diɲɛ yɔrɔ bɛɛ la.”

  A dafali: Saan 1919, jɔncɛ kantigiman sigira Ala ka mɔgɔw kun na. Kabi o tuma, Bibulu Kalandenw tora ka waajuli kɛ kosɔbɛ. Bi, Jehova sagokɛlaw be waajuli kɛ jamana 200 ni kɔ la ani u be sɛbɛw ni videwow dilan kaan 1 000 ni kɔ la.

• 

  Vɛrisew: Dan. 12:11; Yir. 13:11, 14, 15

  Kiraya kuma: Sogo min be ni gɔɔn fila ye, ale y’a fɔ “mɔgɔw ye k’u ka Sogo fɔlɔ nin jaa dilan” ani a ye “nii don jaa nin na.”

  A dafali: Angletɛri ni Ameriki y’a ɲini jamana dɔw fɛ u ka jɛn ka Société des Nations sigi sen kan. Jamana wɛrɛw donna o ɔriganisasiyɔn kɔnɔ. K’a ta saan 1926-1933, saheli yanfan fɛ masacɛ fana tun b’o ɔriganisasiyɔn kɔnɔ. Mɔgɔw tun b’a miiri ko Société des Nations tun bena hɛɛrɛ sigi duniɲa kɔnɔ k’a sɔrɔ Ala ka Masaya dɔrɔn lo be se k’o kɛ. U b’o lo miiri fana Nasiyɔn Zini koo la.

• 

  

  Vɛrisew: Dan. 8:23, 24

  Kiraya kuma: Masacɛ jugu dɔ bena na ni “cɛnniba ye.”

  A dafali: Angletɛri ni Ameriki ye mɔgɔ caaman faga ani u ye tiɲɛni caaman kɛ. Ɲɛyirali fɛ, kɛlɛba filanan wagati la, Ameriki ye bɔnbu fila fili jamana dɔ kan. O jamana y’ale ni Angletɛri jugu dɔ ye. Tiɲɛni min kɛra, kɛlɛkɛminan si tun ma deli k’o ɲɔgɔn kɛ.

• 

  Vɛrisew: Dan. 11:31; Yir. 17:3, 7-11

  Kiraya kuma: “Sogo wuleman” min be ni gɔɔn tan ye ani a bɔra dingɛ dunba kɔnɔ, ale lo ye masacɛ seeginan ye. Daniyɛli ka kitabu b’o masacɛ weele ko “fɛnjugu cɛnnikɛla.”

  A dafali: Kɛlɛba filanan wagati la, Société des Nations fanga banna. Kɛlɛ bannin kɔ, u ye Nasiyɔn Zini “bila” a nɔɔ na. Mɔgɔw tun b’a miiri ko Nasiyɔn Zini bena hɛɛrɛ sigi duniɲa kɔnɔ k’a sɔrɔ Ala ka Masaya dɔrɔn lo be se k’o kɛ. U tun b’o lo miiri Société des Nations fana koo la. Nasiyɔn Zini bena wuli diinanw kama.

• 

  

  Vɛrisew: 1 Tes. 5:3, NW; Yir. 17:16

  Kiraya kuma: Jamanaw ɲɛmɔgɔw bena a fɔ ko “hɛɛrɛ be yen, an latanganin lo!” ani “sogo nin” n’a “gɔɔn tan” bena wuli “kakalamuso” kama k’a halaki. O kɔ, halakili bena cun jamanaw kan.

  A dafali: Jamanaw bena a fɔ ko u sera ka hɛɛrɛ sigi duniɲa kɔnɔ ani ko bɛɛ latanganin lo. O kɔ, jamana minw be Nasiyɔn Zini kɔnɔ, olu bena ngalon diinanw jɛnkuluw halaki. O bena kɛ tɔɔrɔba daminɛ ye. O tɔɔrɔba bena ban tuma min na Yezu bena Sutana ka duniɲa tɔɔ halaki Arimagedɔn kɛlɛ la.

• 

  Vɛrisew: Ezek. 38:11, 14-17; Mat. 24:31

  Kiraya kuma: Gɔgi bena wuli Ala sagokɛlaw kama. O kɔ, Ala ye “mɔgɔ minw woloma,” mɛlɛkɛw bena olu lajɛn.

  A dafali: Saheli yanfan fɛ masacɛ ani jamana tɔɔw bena wuli Ala sagokɛlaw kama k’u kɛlɛ. O kɛlɛ daminɛnin kɔ, mɛlɛkɛw bena mɔlen tɔɔw lajɛn sankolo la.

• 

  Vɛrisew: Ezek. 38:18-23; Dan. 2:34, 35, 44, 45; Yir. 6:2; 16:14, 16; 17:14; 19:20, Biblu Ala ta Kuma

  Kiraya kuma: “Mɔgɔ min tun siginin” be “soo gwɛman” kan, ale “bena see sɔrɔ” a kɛtɔ ka Gɔgi n’a ka kɛlɛbolo halaki. A bena “sogo nin” “firi dingaba tasumaman ni kiribi cɛ ra.”

  A dafali: Yezu lo ye Masacɛ ye Ala ka Masaya kun na. A bena Ala sagokɛlaw kisi. Jamana minw bena wuli Ala sagokɛlaw kama, Yezu n’a marakɛɲɔgɔn mɔgɔ 144 000 ani mɛlɛkɛw bena olu bɛɛ halaki. O lo bena daan sigi Sutana ka duniɲa na.