Kalan sɔrɔ Bibulu ka kiraya kumaw na

1. Mun lo be se k’a to Bibulu ka kiraya kumaw sɛgɛsɛgɛri be diya i ye?

BALIMA kanbele dɔ tɔgɔ ko Ben ani a ko: “A ka di ne ye ka Bibulu ka kiraya kumaw sɛgɛsɛgɛ.” O ka di ele fana ye wa? Wala i b’a jati ko kiraya kumaw faamu ka gwɛlɛ kojugu wa? N’a sɔrɔ i yɛrɛ b’a miiri ko ninsɔndiyako tɛ ka kiraya kumaw sɛgɛsɛgɛ. Nka, n’i y’a faamu fɛɛn min kama Jehova y’a to u ye kiraya kumaw sɛbɛ a ka Kuma kɔnɔ, n’a sɔrɔ i ka miiriya bena yɛlɛma u koo la.

2. An bena mun lo lajɛ barokun nin na?

² Barokun nin na, an bena a ye fɛɛn min kama an ka ɲi ka Bibulu ka kiraya kumaw sɛgɛsɛgɛ. Nka o dɔrɔn tɛ, an bena a ye fana an be se k’o kɛ cogo min na. O kɔ, an bena kiraya kuma fila lajɛ minw be sɔrɔ Daniyɛli ka kitabu kɔnɔ ani an bena a ye u faamuyali be se k’an nafa cogo min na bi.

MUN NA AN KA ƝI KA BIBULU KA KIRAYA KUMAW SƐGƐSƐGƐ?

3. N’an b’a fɛ ka Bibulu ka kiraya kumaw faamu, an ka ɲi ka mun lo kɛ?

³ An ka ɲi ka dɛmɛ ɲini n’an b’a fɛ ka Bibulu ka kiraya kumaw faamu. An ka misali dɔ lajɛ. Miiri k’a filɛ ko i be yɔrɔ dɔ lajɛra i tɛ min lɔ. Nka i teri dɔ ye i bila sira, min b’o yɔrɔ lɔn koɲuman. A b’a lɔn aw be yɔrɔ min na tigitigi ani sira kelen kelen bɛɛ be taga yɔrɔ min na. Siga t’a la, i dusu bena diya k’a ye ko i teri sɔnna k’i bila sira! O cogo kelen na, Jehova b’a lɔn an be wagati min na ani an ka siniɲasigi bena kɛ min ye. O la, walisa ka Bibulu ka kiraya kumaw faamu, an ka ɲi k’an majigi ka dɛmɛ ɲini Jehova fɛ.—Dan. 2:28; 2 Piyɛri 1:19, 20.

4. Mun na Jehova y’a to u ye kiraya kumaw sɛbɛ a ka kuma kɔnɔ? (Zeremi 29:11; jaa lajɛ fana).

⁴ I ko bangebaga ɲuman, Jehova b’a fɛ a deenw ka hɛɛrɛ sɔrɔ sini ma (Zeremi 29:11 kalan). Nka bangebagaw tɛ se ka min kɛ, Jehova be se k’o kɛ. O ye ko a be se k’a fɔ tigitigi min bena kɛ sini ma. A y’a to u ye kiraya kumaw sɛbɛ a ka Kuma kɔnɔ walisa an k’a lɔn koo kɔrɔtanin minw bena kɛ sini ma (Ezayi 46:10). Bibulu ka kiraya kumaw ye an sankolola Faa ka nilifɛnw lo ye minw b’a yira ko a b’an kanu. Nka, i be se ka la a la cogo di k’o kiraya kumaw bena dafa?

5. Kanbelew ni sunguruw be kalan juman lo sɔrɔ Max ka koo la?

⁵ Balima kanbelew ni sunguruw ka lakɔli filankuruw fanba tɛ bonyaba la Bibulu kan wala u yɛrɛ tɛ bonya la a kan fewu. Olu ka kumaw n’u ka kɛwalew be se ka sigasigali miiriya don an balima kanbelew ni sunguruw kuun na. An ka Max ka koo lajɛ. A ko: “N’ kanbele tuma, n’ y’a daminɛ ka sigasiga. N’ tun be n’ yɛrɛ ɲiningara ni n’ bangebagaw be n’ kalanna tiɲɛn diinan lo la ani ni Bibulu ye Ala ka Kuma lo ye tiɲɛn na.” A bangebagaw ye mun lo kɛ do? A ko: “U ye koow kɛ ni dususuman ye hali k’a sɔrɔ n’ tun b’a lɔn k’u be jɔrɔla n’ koo la.” Max bangebagaw basigira Bibulu kan k’a ka ɲiningaliw jaabi. Max fana ye koo dɔ kɛ. A ko: “N’ ye Bibulu ka kiraya kumaw sɛgɛsɛgɛ n’ yɛrɛ ma ani n’ ye min faamu, n’ y’o lakali n’ filankuruw ye.” Mun lo sɔrɔla o la? Max ko: “O kɔ, n’ lara a la ko Bibulu ye Ala ka Kuma lo ye!”

6. N’i be sigasigara Bibulu kɔnɔkumaw na, i ka ɲi ka mun lo kɛ ani mun na?

⁶ I ko Max, n’i y’a daminɛ ka sigasiga Bibulu kɔnɔkumaw koo la, kana i yɛrɛ jalaki o kosɔn. Nka, a kɔrɔtanin lo i ka dɔ kɛ dɔ ye joona joona. Sigasigali be i ko soon min be nigɛ minɛ. N’a daminɛna ani i ma dɔ kɛ dɔ ye, dɔɔni dɔɔni a be se k’i ka fɛɛn nafaman dɔ tiɲɛ. Walisa i kana sigasiga tugun, i ka ɲi k’i yɛrɛ ɲininga ko: “Bibulu be min fɔ siniɲasigi koo la, n’ lanin b’o la wa?” N’i lanin t’o la, Bibulu ka kiraya kuma minw dafara ka ban, i ka ɲi k’olu sɛgɛsɛgɛ. An k’a filɛ i be se k’o kɛ cogo min na.

KIRAYA KUMAW SƐGƐSƐGƐ COGO

7. Daniyɛli ye ɲɛyirali juman lo to an ye kiraya kumaw sɛgɛsɛgɛ cogo koo la? (Daniyɛli 12:10; jaa lajɛ fana).

⁷ Daniyɛli ye ɲɛyirali ɲuman to an ye kiraya kumaw sɛgɛsɛgɛ cogo koo la. A tun be kiraya kumaw sɛgɛsɛgɛ ni ŋaniya ɲuman ye. A tun b’a fɛ ka tiɲɛn lo lɔn. Daniyɛli tun majiginin lo fana. A tun b’a lɔn ko n’ale magwɛrɛnin tora Jehova la ani n’a be mɛnni kɛ a fɛ, a bena ale dɛmɛ ka kiraya kumaw faamu (Dan. 2:27, 28; Daniyɛli 12:10 kalan). Daniyɛli y’a yira ko ale majiginin lo a kɛtɔ k’a jigi la Jehova kan walisa a k’ale dɛmɛ (Dan. 2:18). A tun be sɛgɛsɛgɛri kɛ koɲuman fana. Bibulu yɔrɔ minw tun be sɔrɔ a ka wagati la, a tun be sɛgɛsɛgɛri kɛ olu kɔnɔ (Zer. 25:11, 12; Dan. 9:2). I be se k’a ladegi cogo di?

8. Mun na dɔw lanin t’a la ko Bibulu ka kiraya kumaw be dafa? Nka anw ka ɲi ka mun lo kɛ?

⁸ I ka ŋaniya lajɛ. Yala i be Bibulu ka kiraya kumaw sɛgɛsɛgɛ sabu i b’a fɛ n’i dusu bɛɛ ye ka tiɲɛn lɔn wa? N’o lo, Jehova bena i dɛmɛ (Zan 4:23, 24; 14:16, 17). Dɔw be kiraya kumaw sɛgɛsɛgɛ kuun wɛrɛ juman lo kama? Dɔw b’o kɛ sabu u jigi b’a la ko u bena dalilu dɔw sɔrɔ minw b’a yira ko Bibulu ma bɔ Ala yɔrɔ. Olu fɛ, ni Bibulu ma bɔ Ala yɔrɔ, u be se k’a latigɛ u yɛrɛ ma min ka ɲi ani min man ɲi. Nka, anw ka ɲi ka kɛ ni ŋaniya ɲuman ye. An ka ɲi ka kɛ ni jogo kɔrɔtanin dɔ ye fana n’an b’a fɛ ka Bibulu ka kiraya kumaw faamu.

9. Walisa ka Bibulu ka kiraya kumaw faamu, an mako be jogo juman lo la? A ɲɛfɔ.

⁹ Kɛ ni majigilenya ye. Jehova ye layidu ta ko a bena mɔgɔ majigininw dɛmɛ (Zaki 4:6). O la, an ka ɲi ka dɛmɛ ɲini a fɛ delili la walisa ka Bibulu ka kiraya kumaw faamu. N’an majiginin lo, an bena sɔn jɔncɛ kantigiman hakiliman ka dɛmɛ na fana. Jehova be tɛmɛ ale lo fɛ k’an balo Alako ta fan wagati bɛnnin na (Luka 12:42). Jehova tɛ koo ferekenin Ala ye. O kama, a bɛnnin lo a ka tɛmɛ o jɔncɛ dɔrɔn lo fɛ walisa k’an dɛmɛ ka Bibulu ka tiɲɛnkalanw faamu.—1 Kor. 14:33; Efɛz. 4:4-6.

10. I be kalan juman lo sɔrɔ Esther ka koo la?

¹⁰ Sɛgɛsɛgɛri kɛ koɲuman. Kiraya kuma min ka di i ye, a daminɛ k’o sɛgɛsɛgɛ. Balimamuso Esther y’o lo kɛ. Kiraya kuma minw ɲɛsinna Masiya nali koo ma, a tun b’a fɛ k’olu lo sɛgɛsɛgɛ. A ko: “Tuma min na n’ tun be ni saan 15 ye, n’ y’a daminɛ ka daliluw ɲini minw b’a yira k’o kiraya kumaw sɛbɛra tiɲɛn na ka kɔn Yezu nali ɲɛ.” A lara o la, tuma min na a ye koo dɔw kalan sɛbɛ melekeninw koo la minw yera Kɔgɔji Sanin yɔrɔ la. A ko: “U dɔw tun sɛbɛra ka kɔn Krista ka wagati ɲɛ. O la kiraya kuma minw b’u kɔnɔ, u bɔra Ala yɔrɔ le.” Esther ko: “N’ y’o kunnafoniw kalan siɲɛ caaman ka sɔrɔ k’u faamu.” Nka a ye jijali minw kɛ, o y’a ninsɔn diya. A ye kiraya kuma caaman sɛgɛsɛgɛ koɲuman. O kɔ, a ko: “N’ y’a faamu ka gwɛ n’ yɛrɛ ma ko Bibulu kɔnɔkumaw ye tiɲɛn ye!”

11. Nafa juman lo b’a la an k’a ɲini ka la a la ko Bibulu kɔnɔkumaw ye tiɲɛn ye?

¹¹ An mana a ye Bibulu ka kiraya kuma dɔw dafara cogo min na, o b’a to an b’an jigi la Jehova kan kosɔbɛ. Ani an be la a la ko a ka ɲɛminɛli ɲɔgɔn tɛ yen. Bibulu ka kiraya kumaw fana b’an dɛmɛ ka to ni jigiya ɲuman ye siniɲasigi koo la, an ka gwɛlɛyaw mana kɛ min o min ye. An ka Daniyɛli ka kiraya kuma fila lajɛ dɔɔni, o minw be dafara sisan. N’an y’o kiraya kumaw faamu, o be se k’an dɛmɛ ka desizɔn ɲumanw ta.

SENTIGƐ MIN YE NIGƐ NI BƆGƆ YE, O ƝƐSINNA ELE MA COGO DI?

12. Sentigɛ min ye “nigɛ ni bɔgɔ ɲagaminin” ye, o ye mun lo tagamasiɲɛ ye? (Daniyɛli 2:41-43).

¹² Daniyɛli 2:41-43 kalan. Masacɛ Nabukodonozɔri tun ye siko dɔ kɛ ani Daniyɛli y’a kɔrɔ fɔ a ye. O siko la, masacɛ tun ye jaa dɔ ye min sentigɛ ye “nigɛ ni bɔgɔ ɲagaminin” ye. N’an y’o kiraya kuma suma ni kiraya kuma wɛrɛw ye Daniyɛli ani Yirali ka kitabuw kɔnɔ, an b’a faamu ko o jaa ye Angletɛri ni Ameriki ka jɛnɲɔgɔnya lo tagamasiɲɛ ye. Olu lo ye duniɲa ka fangatigiya ye bi. Daniyɛli ko “fangayɔrɔ ni dɛsɛyɔrɔ” b’o fangatigiya la. Mun na dɛsɛyɔrɔ b’a la? Sabu setigiya min b’a ye ka koow kɛ ni fanga ye i ko nigɛ, jamanaden minw ye bɔgɔ tagamasiɲɛ ye, olu b’a bali k’o kɛ.b

13. O kiraya kuma b’an dɛmɛ ka tiɲɛnkalan jɔnjɔn jumanw lo faamu?

¹³ Jaa min yera siko la, Daniyɛli ye min fɔ o koo la, o b’an dɛmɛ ka tiɲɛnkalan jɔnjɔn dɔw faamu. O jaa sentigɛ yɛrɛ lo b’an dɛmɛ ka koo caaman faamu. A fɔlɔ, Angletɛri ni Ameriki ka fangatigiya y’a ka setigiya yira cogo dɔw la. Misali la, ale lo kɛra a jɛnɲɔgɔnw ka see sɔrɔli sababu ye kɛlɛba fɔlɔ ni filanan na. Nka, bɛnbaliyako minw b’o fangatigiya ka jamanadenw cɛ, o b’a barika dɔgɔya ani o bena to k’a barika dɔgɔya ka taga le. A filanan, tuma min na Ala ka Masaya bena adamadenw ka gofɛrɛnɛman tɔɔw bɛɛ halaki, Angletɛri ni Ameriki ka fangatigiya lo bena kɛ yen sabu ale lo ye duniɲa ka fangatigiya laban ye. Hali ni jamana dɔw be wuli o fangatigiya kama, u tɛna sigi a nɔɔ na. An lanin b’o la sabu “kabakuru” min ye Ala ka Masaya tagamasiɲɛ ye, ale bena na jaa sentigɛ lo gosi, o min ye Angletɛri ni Ameriki ka fangatigiya ye.—Dan. 2:34, 35, 44, 45.

14. Jaa sentigɛ min ye nigɛ ni bɔgɔ ye, kiraya kuma min ɲɛsinna o ma, o faamuyali be se k’an dɛmɛ cogo di ka desizɔn ɲumanw ta?

¹⁴ Jaa sentigɛ min ye nigɛ ni bɔgɔ ye, Daniyɛli ka kiraya kuma min ɲɛsinna o ma, i lanin b’a la k’o ye tiɲɛn ye wa? N’o lo, o bena nɔɔ to i ka ɲɛnamaya kɛcogo kan. I tɛna a ɲini ka nafolo wala bololafɛn caaman lajɛn i yɛrɛ ye sabu i b’a lɔn ko duniɲa nin bena halaki yanni dɔɔni (Luka 12:16-21; 1 Zan 2:15-17). O kiraya kuma faamuyali bena i dɛmɛ fana k’a ye ko a kɔrɔtanin lo ka waajuli kɛ ani ka mɔgɔw kalan (Mat. 6:33; 28:18-20). N’i y’o kiraya kuma sɛgɛsɛgɛ ka ban, i yɛrɛ ɲininga ko: “Yala n’ ka desizɔnw b’a yira ko n’ lanin b’a la ko Ala ka Masaya bena adamadenw ka gofɛrɛnɛmanw bɛɛ halaki yanni dɔɔni wa?”

SAHELI ANI WORODUGU YANFAN FƐ MASACƐW KA KOO ƝƐSINNA ELE MA COGO DI?

15. Bi, jɔn lo ye saheli yanfan fɛ masacɛ ye ani jɔn lo ye “worodugu yanfan fɛ masacɛ” ye? (Daniyɛli 11:40).

¹⁵ Daniyɛli 11:40 kalan. Daniyɛli sapitiri 11nan be kuma masacɛ wala gofɛrɛnɛman fila koo la minw be ɲɔgɔn kɛlɛ duniɲa ka kuntigiya koo la. N’an y’o kiraya kuma suma ni Bibulu ka kiraya kuma wɛrɛw ye, an b’a faamu ko saheli yanfan fɛ masacɛ ye Irisi n’a jɛnɲɔgɔnw lo ye ani “worodugu yanfan fɛ masacɛ” ye Angletɛri ni Ameriki ka fangatigiya lo ye.c

16. Jehova sagokɛla minw be saheli yanfan fɛ masacɛ ka mara kɔnɔ, olu be gwɛlɛya jumanw lo sɔrɔ?

¹⁶ Saheli yanfan fɛ masacɛ be Ala sagokɛlaw kɛlɛla a ka mara kɔnɔ. U ye Jehova Seere dɔw bugɔ ani k’u don kaso la u ka limaniya kosɔn. Nka saheli yanfan fɛ masacɛ ka kɛwalew b’an balimaw ka limaniya sabatira le, sanni ka siranya bila u la. Mun na do? Sabu u b’a lɔn ko saheli yanfan fɛ masacɛ be u kɛlɛ minkɛ, o be Daniyɛli ka kiraya kuma lo dafad (Dan. 11:41). N’an b’o lɔn, o be se ka an dɛmɛ ka to ni jigiya barikaman ye ani ka to kantigiya la Jehova ye.

17. Ala sagokɛlaw be gwɛlɛya jumanw lo sɔrɔ “worodugu yanfan fɛ masacɛ” ka kuntigiya kɔrɔ?

¹⁷ Saan tɛmɛninw na, “worodugu yanfan fɛ masacɛ” fana tun wulila Jehova sagokɛlaw kama. Misali la, saan kɛmɛkulu 20nan tilanyɔrɔ fɔlɔ wagati la, u y’an balima caaman don kaso la sabu u banna k’u niin don jamana ka koow la. U ye u ka deen dɔw gwɛn lakɔliso la fana o koo kelen kosɔn. Nka a saan damanin ye nin ye, Jehova sagokɛla minw be o masacɛ ka mara la, olu ka kantigiya be kɔrɔbɔra cogo wɛrɛw la. Misali la, politiki kanpaɲiw tuma na, kerecɛn dɔ be se k’a miiri ko parti dɔ ka fisa ni dɔ wɛrɛ ye. Hali n’a tɛna taga vote kɛ, a be se k’a laɲini a dusu la ko parti politiki dɔ ka see sɔrɔ tɔɔ kelen kan. A kɔrɔtanin lo kosɔbɛ an kana an seen don politikikow la. O la, an ka ɲi k’an ka kɛwalew n’an dusukunnakow kɔrɔsi!—Zan 15:18, 19; 18:36.

18. Kɛlɛ min be saheli yanfan fɛ ani worodugu yanfan fɛ masacɛw cɛ, an b’o koo ta cogo di? (Jaa lajɛ fana.)

¹⁸ Minw lanin tɛ Bibulu ka kiraya kumaw na, olu hakili be se ka ɲagami kosɔbɛ n’u y’a ye ko “worodugu yanfan fɛ masacɛ” ye “kɛlɛ daminɛ” ni saheli yanfan fɛ ye (Dan. 11:40). O masacɛ fila bɛɛ be ni bɔnbu nikilɛri caaman ye minw be se ka ninmanfɛnw bɛɛ halaki dugukolo kan. Nka an b’a lɔn ko Jehova tɛna sɔn o ka kɛ abada! (Ezayi 45:18). O la, saheli yanfan fɛ ani “worodugu yanfan fɛ masacɛ” ka bɛnbaliyakow ka ɲi k’an ka limaniya sabati le sanni ka siranya bila an na. O b’a yira ko duniɲa nin laban surunyana.

TO K’I JANTO KIRAYA KUMAW NA

19. An ka ɲi ka mun lo faamu Bibulu ka kiraya kumaw koo la?

¹⁹ An t’a lɔn Bibulu ka kiraya kuma dɔw bena dafa cogo min na. Hali kira Daniyɛli ye fɛɛn minw sɛbɛ, a tun tɛ u bɛɛ faamu (Dan. 12:8, 9). N’an t’a lɔn kiraya kuma dɔ bena dafa cogo min na tigitigi, o kɔrɔ tɛ ko a tɛna dafa. An mako b’a la ka min lɔn, an be se ka la a la ko Jehova bena o yira an na wagati bɛnnin na, i ko a y’a kɛ cogo min na galen.—Amɔsi 3:7.

20. Yanni dɔɔni, Bibulu ka kiraya kuma kabakoman jumanw lo bena dafa an ɲɛɛ na? An ka ɲi ka to ka mun lo kɛ?

²⁰ Jamana ɲɛmɔgɔw bena a fɔ ko “hɛɛrɛ be yen, an latanganin lo!” (1 Tes. 5:3, NW). O kɔ, u bena wuli ngalon diinanw kama k’u halaki pewu! (Yir. 17:16, 17). N’u tilara o la, u bena wuli Ala sagokɛlaw kama (Ezek. 38:18, 19). O bena laban ni Arimagedɔn kɛlɛ ye (Yir. 16:14, 16). An ka la a la ko o koow bena kɛ yanni dɔɔni. Yanni o cɛ, an ka to k’an ka waleɲumanlɔn yira an sankolola Faa kanutigi la an kɛtɔ k’an janto Bibulu ka kiraya kumaw na ani ka mɔgɔ wɛrɛw dɛmɛ u k’o kɛ.