BAROKUN KALANTA KAFO KƆNƆ 28
Ala ka Masaya be sen kan!
“Diɲɛ ka masaya kɛra an Matigi n’a ka Mɔgɔ wolomanin ta ye.”—YIR. 11:15.
DƆNKILI 22 Masaya be sen kan: A ka na!
BAROKUN KƆNƆNAKOWa
1. An be se ka la mun lo la ani mun na do?
KOO minw bɛɛ be kɛra duniɲa kɔnɔ, n’i miirila o la, yala a ka gwɛlɛ i ma ka koow filɛ ni ɲɛɛ ɲuman ye wa? Denbayamɔgɔw ka jɛnɲɔgɔnya b’a la ka nagasi, mɔgɔw be fariyara ka taga ani u b’u yɛrɛ nafa dɔrɔn lo ɲini. Ka fara o kan, a ka gwɛlɛ mɔgɔ caaman ma ka la faamanw na. Nka koo minw be kɛra, o b’a to an lanin b’a la ko koow bena fisaya. Mun na do? Sabu mɔgɔw be koow kɛra jaatika i ko Bibulu ka kiraya kuma dɔ ye min fɔ “laban tuma” koo la (2 Tim. 3:1-5). O kiraya kuma be dafara ani mɔgɔ kɔnɔgwɛ si tɛ se k’o sɔsɔ. O kiraya kuma dafali b’a yira ko Yezu Krista be masaya kɛra Ala ka Masaya kun na. O ye kiraya kuma kelen dɔrɔn lo ye min ɲɛsinna Ala ka Masaya koo ma, nka caaman wɛrɛw be yen. Kiraya kuma minw dafara kɔsa la, n’an segira k’u lajɛ, o bena an ka limaniya barika bonya.
Foto faran farannin mana nɔrɔ nɔrɔ ɲɔgɔn na, a be kɛ foto kelen ye. O cogo kelen na, kiraya kuma minw be sɔrɔ Daniyɛli ani Yirali ka kitabuw kɔnɔ, u be taga ɲɔgɔn fɛ. O kiraya kumaw b’a yira ka gwɛ an be wagati min na ka ɲɛsin Jehova sagonata koo ma. (Dakun 2nan lajɛ.)
2. An bena mun lo lajɛ barokun nin na ani mun na? (Jaa min be ɲɛɛ fɔlɔ kan, o lakali.)
2 Barokun nin na, an bena kiraya kuma dɔw lajɛ: 1) kiraya kuma dɔ, min bena an dɛmɛ k’a faamu tuma min na Ala ka Masaya sigira sen kan, 2) kiraya kuma dɔw, minw b’a yira ka gwɛ ko Yezu be masaya kɛra sankolo la Ala ka Masaya kun na ani 3) kiraya kuma dɔw, minw b’a yira Ala ka Masaya kɛlɛbagaw bena halaki cogo min na. Foto faran farannin mana nɔrɔ nɔrɔ ɲɔgɔn na, a be kɛ foto kelen ye. O cogo kelen na, an bena a ye k’o kiraya kumaw be taga ɲɔgɔn fɛ. U b’a yira ka gwɛ an be wagati min na ka ɲɛsin Jehova sagonata koo ma.
AN BE SE K’A LƆN COGO DI TUMA MIN NA ALA KA MASAYA SIGIRA SEN KAN?
3. Daniyɛli 7:13, 14 ka kiraya kuma b’an hakili sigi mun lo la Yezu koo la, ale min sigira Ala ka Masaya kun na?
3 Kiraya kuma min be sɔrɔ Daniyɛli 7:13, 14 kɔnɔ, o b’an hakili sigi ko Yezu Krista bena kɛ Masacɛ ɲuman ye Ala ka Masaya kun na. Siyaw bɛɛ mɔgɔw ninsɔndiyanin bena baara kɛ a ye ani masacɛ si tɛna sigi a nɔɔ na. Kiraya kuma wɛrɛ be sɔrɔ Daniyɛli ka kitabu kɔnɔ, min b’a yira ko saan wolonfila dɔ bannin kɔ le Yezu tun bena sigi masaya la. Yala an be se k’a lɔn wagati min na a sigira masaya la wa?
4. A ɲɛfɔ cogo min na Daniyɛli 4:7-14 b’an dɛmɛ k’a lɔn Yezu tun bena sigi masaya la saan min na (Jukɔrɔla kunnafoni fana lajɛ.)
4 Vɛrise nunu kalan: Daniyɛli 4:7-14. “Saan wolonwula” minw kofɔra, tagamasiɲɛ lo sabu u be bɛn saan 2520 lo ma. O daminɛna saan 607 ka kɔn Krista tile ɲɛ, tuma min na Babilɔnikaw ye Israɛldenw ka masacɛ laban bɔ masaya la Zeruzalɛmu. Israɛl ka masacɛw tun ye Ala ka Masaya ka lasigidenw lo ye. O saan 2520 labanna saan 1914 Krista tile la, tuma min na Jehova ye Yezu sigi a ka Masaya kun na. Jehova ka sariya be joo di Yezu lo ma ka o masaya kɛ.b—Ezek. 21:30-32.
5. Kiraya kuma min ɲɛsinna “saan wolonwula” nunu ma, o be se k’an nafa cogo minw na, u la dɔ ye juman ye?
5 O kiraya kuma be se k’an nafa cogo di? Kiraya kuma min ɲɛsinna “saan wolonwula” nunu ma, n’an b’o faamu ka ɲɛ, o b’an hakili sigi ko Jehova b’a ka layiduw dafa wagati latigɛnin na. A ye wagati tigitigi dɔ latigɛ o min na a y’a ka Masaya sigi sen kan. O cogo kelen na, a bena a janto kiraya kuma tɔɔw bɛɛ ka dafa ka kɛɲɛ n’a ka wagati latigɛnin ye. Siga t’a la, Jehova ka loon “bena na se” a wagati la tigitigi.—Abak. 2:3.
AN B’A LƆN COGO DI KO KRISTA BE MASAYA KƐRA ALA KA MASAYA KUN NA?
6. a) An ɲɛɛ be mun lo la dugukolo kan min b’a yira ko Krista be masaya kɛra sankolo la? b) Kiraya kuma min be sɔrɔ Yirali 6:2-8 kɔnɔ, o b’o yira ka gwɛ cogo di?
6 Yezu ka cidenya baara laban fan fɛ dugukolo kan, a y’a fɔ a ka kalandenw ye koo minw tun bena kɛ duniɲa kɔnɔ. O koow tun bena u dɛmɛ k’a faamu ko a y’a daminɛ ka masaya kɛ sankolo la. O koo dɔw ye kɛlɛw, kɔngɔbaw ani dugukolo yɛrɛyɛrɛ ye. Yezu y’a fɔ fana ko fɔɲɔbanaw wala banaw bena kɛ “yɔrɔ dɔw la.” COVID-19 bana ye u la dɔ ye. O koow ye “taamasiɲɛ” damanin ye minw b’a yira ko Krista be masaya la (Mat. 24:3, 7; Luka 21:7, 10, 11). Saan 60 ni kɔ Yezu saya ani a seginin kɔ sankolo la, a ye yelifɛn dɔ yira ciden Zan na min b’a yira ko o koow bena kɛ tiɲɛn na (Yirali 6:2-8 kalan). O koow bɛɛ be kɛra kabi tuma min na Yezu sigira masaya la saan 1914.
7. Mun na koo jugu caaman be kɛra dugukolo kan kabi tuma min na Yezu sigira masaya la?
7 Mun na duniɲa ka koow juguyara kabi tuma min na Yezu sigira masaya la? Yirali 6:2 be kunnafoni jɔnjɔn dɔ di an ma o koo la. Yezu siginin masaya la kura ye, a ye koo fɔlɔ min kɛ, o ye ka Sutana n’a ka jinaw kɛlɛ. Ka kɛɲɛ ni Yirali sapitiri 12nan ye, Sutana ma see sɔrɔ o kɛlɛ la ani Yezu ye ale n’a ka jinaw gwɛn ka jigi dugukolo kan. Sutana dimininba wulila adamadenw kama ani o kɛra “bɔnɛ ye” duniɲa mɔgɔw fɛ.—Yir. 12:7-12.
Tiɲɛn lo ko ni koo juguw be kɛra, o man di an ye. Nka an mana a ye ko Bibulu ka kiraya kumaw be dafara, o b’a yira ko Ala ka Masaya be sen kan (Dakun 8nan lajɛ)
8. I mana a ye ko kiraya kuma minw ɲɛsinna Ala ka Masaya koo ma u be dafara, o be mun lo kɛ i la do?
8 Kiraya kuma minw ɲɛsinna Ala ka Masaya koo ma, u be se k’an nafa cogo di? Koo minw be kɛra duniɲa kɔnɔ, u bena an dɛmɛ k’a faamu ko Yezu sigira masaya la. Ka fara o kan, mɔgɔw sɔɔn bena yɛlɛma pewu. Bi, mɔgɔw be miiri u yɛrɛ nafa dɔrɔn lo la ani u ka fari. An t’a to u ka kɛwalew k’an dusu tiɲɛ, nka an b’a to an hakili la ko Bibulu ka kiraya kumaw lo be dafara. O b’a yira ko Ala ka Masaya be sen kan! (Zab. 37:1). An k’a lɔn ko ni Arimagedɔn kɛlɛ be surunyana kosɔbɛ, duniɲa ka koow bena to ka juguya ka taga (Mariki 13:8; 2 Tim. 3:13). An be an sankolola Faa kanutigi waleɲuman lɔn kosɔbɛ sabu a b’an dɛmɛ k’a faamu fɛɛn min kama duniɲa ɲagaminin lo ten.
ALA KA MASAYA KƐLƐBAGAW BENA HALAKI COGO MIN NA
9. Daniyɛli 2:28, 31-35 be duniɲa ka fangatigiya laban cogoya lakali cogo di? A ye kuntigiya daminɛ tuma juman?
9 Daniyɛli 2:28, 31-35 kalan. O kiraya kuma be dafara an ɲɛɛ na bi. Nabukodonozɔri ka siko b’a yira min tun bena kɛ laban loonw na, Yezu siginin kɔ masaya la. Yezu jugu minw be dugukolo kan, u dɔ ye duniɲa ka fangatigiya laban ye, Bibulu tun kɔnna k’o min kofɔ. Jaa “sentigɛw . . . min ye nigɛ ni bɔgɔ ye,” o ye o fangatigiya lo tagamasiɲɛ ye. O fangatigiya be mara kɛra ka ban. A y’a daminɛ ka mara kɛ duniɲa ka kɛlɛba fɔlɔ wagati la tuma min na Angletɛri ni Ameriki ye jɛnɲɔgɔnya kɛrɛnkɛrɛnnin dɔ sigi u ni ɲɔgɔn cɛ. O be weele Angletɛri ni Ameriki ka fangatigiya. Nabukodonozɔri ye jaa min ye a ka siko la, koo fila be Angletɛri ni Ameriki ka fangatigiya faranfasi ka bɔ masaya tɔɔw la minw kɔnna a ɲɛ.
10. a) Kira Daniyɛli tun kɔnna ka mun lo fɔ an be min kɔrɔsira Angletɛri ni Ameriki ka fangatigiya koo la? b) An ka ɲi k’an yɛrɛ kɔrɔsi farati juman lo ma? (Koorilen nin lajɛ: “I yɛrɛ kɔrɔsi bɔgɔ ma!”)
10 Gofɛrɛnɛman minw kɔnna Angletɛri ni Ameriki ka fangatigiya ɲɛ, olu barika tun ka bon i ko sanu ni warigwɛ. Nka koo fɔlɔ min be Angletɛri ni Ameriki ka fangatigiya faranfasi ka bɔ u la, o ye ko ale tagamasiɲɛ ye nigɛ ni bɔgɔ lo ye o minw ɲagaminin lo ɲɔgɔn na. Bɔgɔ ye “hadamaden tɔw” lo tagamasiɲɛ ye (Dan. 2:43, Bible senuma). Bi, an b’a ye ka gwɛ ko jamanadenw lɔyɔrɔ ka bon. Misali la, u be vote ni wulikajɔ kɛ u ka joow n’a ɲɔgɔnnaw kama ani baarakɛla dɔw be fara ɲɔgɔn kan walisa k’u ka joow lafasa. O koow bɛɛ be Angletɛri ni Ameriki ka fangatigiya bali a k’a sago kɛ.
11. Angletɛri ni Ameriki ka fangatigiya be kuntigiya la minkɛ, mun na o b’a to an lanin b’a la ko an be laban wagati lo la?
11 A filanan, Angletɛri ni Ameriki ka fangatigiya lo ye duniɲa ka fangatigiya laban ye, Bibulu tun kɔnna ka min kofɔ. O fangatigiya lo ye jaa belebeleba sentigɛw ye. Adamadenw ka gofɛrɛnɛman si tɛna sigi ale kɔ. Ala ka Masaya bena Angletɛri ni Ameriki ka fangatigiya ani adamadenw ka gofɛrɛnɛman tɔɔw bɛɛ halaki Arimagedɔn kɛlɛ la.c—Yir. 16:13, 14, 16; 19:19, 20.
12. Dalilu wɛrɛ juman lo be sɔrɔ Daniyɛli ka kiraya kuma kɔnɔ min b’an dusu saalo ani ka jigiya di an ma?
12 O kiraya kuma be se k’an nafa cogo di? Dalilu wɛrɛ be sɔrɔ Daniyɛli ka kiraya kuma kɔnɔ min b’a yira ko an be laban wagati lo la. A saan 2500 ni kɔ ye nin ye, Daniyɛli tun kɔnna k’a fɔ ko Babilɔni ka masaya kɔ, duniɲa ka masaya naani dɔw bena nɔɔba to Ala sagokɛlaw kan. Daniyɛli y’a yira fana ko Angletɛri ni Ameriki ka fangatigiya lo bena kɛ o masayaw laban ye. O ye Angletɛri ni Ameriki ka fangatigiya lo ye. O b’an dusu saalo ani ka jigiya di an ma ko yanni dɔɔni, Ala ka Masaya bena adamadenw ka gofɛrɛnɛmanw bɛɛ halaki ani ko a bena dugukolo kuru bɛɛ mara.—Dan. 2:44.
13. “Masa nunu seeginan” ani “masakɛ tan” minw kofɔra Yirali 17: 9-12 kɔnɔ, u ye mun lo tagamasiɲɛ ye? O kiraya kuma dafara cogo di?
13 Yirali 17:9-12 kalan.d Tiɲɛninba kɛra kɛlɛba fɔlɔ tuma na. Koo dɔ kɛra o sen fɛ min ye Bibulu ka kiraya kuma wɛrɛ dafa laban loonw koo la. Duniɲa kuntigiw tun b’a fɛ ka hɛɛrɛ sigi duniɲa kɔnɔ. O kama, saan 1920 zanwiyekalo la, u ye Société des Nations sigi sen kan. O lo nana kɛ Nasiyɔn Zini ye saan 1945, ɔkutɔburukalo la. O ɔriganisasiyɔn be weele ko “masa nunu seeginan,” nka duniɲa ka masaya dɔ tɛ. Gofɛrɛnɛman minw be dɛmɛ don a ka koo la, a ka fanga be bɔ olu lo fɛ. Bibulu b’o gofɛrɛnɛmanw weele ko “masakɛ tan.”
14-15. a) Yirali 17:3-5 be mun lo fɔ Babilonɛba koo la? b) Mɔgɔ minw be dɛmɛ don ngalon diinan ka koow la, mun lo be olu sɔrɔla?
14 Yirali 17:3-5 kalan. Ala ye yelifɛn dɔ yira ciden Zan na, o min na a ye kakalamuso dɔ ye. O kakalamuso be weele ko Babilonɛba ani duniɲa kuru bɛɛ ka ngalon diinanw jɛnkulu lo. O yelifɛn be mun lo yira an na? Kabi wagatijan, ngalon diinanw be jɛn ka baara kɛ ni duniɲa ka gofɛrɛnɛmanw ye ani u be dɛmɛ lasera o gofɛrɛnɛmanw ma. Nka yanni dɔɔni, Jehova bena “ŋaniya kelen” di duniɲa ka gofɛrɛnɛmanw ma walisa u k’ale sago kɛ. Mun lo bena sɔrɔ o la? O gofɛrɛnɛmanw bena wuli ngalon diinanw kama ani k’u halaki. O gofɛrɛnɛmanw lo be weele ko “masakɛ tan.”—Yir. 17:1, 2, 16, 17.
15 An b’a lɔn cogo di ko Babilonɛba halakituma surunyana? Walisa k’o ɲiningali jaabili sɔrɔ, an ka ɲi k’a to an hakili la ko galen, Efarati bajiba tun be Babilɔni dugu latanga. Bi, mɔgɔ miliyɔn caaman minw be dɛmɛ don Babilonɛba ka koow la, Yirali ka kitabu b’u suma ni “jii” ye. U be Babilonɛba latanga (Yir. 17:15). Nka, Yirali ka kitabu b’a yira fana ko o jii bena ‘ja.’ O b’a yira ko duniɲa kuru bɛɛ ka ngalon diinanw jɛnkulu bena bɔnɛ a dɛmɛbaga caaman na (Yir. 16:12). O kiraya kuma be dafara bi sabu mɔgɔ caamanba bɔra ngalon diinanw na ani u y’a daminɛ k’u ka ɲiningaliw jaabiliw ɲini yɔrɔ wɛrɛ la.
16. N’an b’a lɔn Nasiyɔn Zini sigira sen kan tuma min na ani Babilonɛba bena halaki tuma min na, o b’an nafa cogo di?
16 O kiraya kumaw be se k’an nafa cogo di? Nasiyɔn Zini sigira sen kan ani mɔgɔ caaman be bɔra ngalon diinan na. O b’a yira ko an be laban loonw lo la. Hali ni mɔgɔ caaman tɛ dɛmɛ donna Babilonɛba ka koow la tugun, o lo tɛna kɛ sababu ye ngalon diinanw be halaki. I ko an kɔnna k’a ye cogo min na, Jehova bena “ɲaniya kelen” di “masa tan” nunu ma walisa u k’ale sago kɛ. O “masa tan” nunu ye duniɲa ka gofɛrɛnɛmanw lo ye minw be Nasiyɔn Zini dɛmɛna. O gofɛrɛnɛmanw bena Babilonɛba halaki yɔrɔnin kelen ani o bena bari duniɲa mɔgɔw lae (Yir. 18:8-10). Babilonɛba halakili bena nɔɔba to duniɲa kuru bɛɛ kan ani n’a sɔrɔ o bena kɛ gwɛlɛya dɔw sababu ye. Nka, Ala sagokɛlaw bena ninsɔndiya kuun fila ɲɔgɔn kosɔn. Ngalon diinanw tɛna kɛ yen tugun sabu u ye Jehova Ala juguw ye. Ani yanni dɔɔni, an bena kisi ka bɔ duniɲa juguman nin ma.—Luka 21:28.
LA A LA KO JEHOVA BENA A KA MƆGƆW LATANGA SINI MA
17-18. a) An be se ka to k’an ka limaniya barika bonya cogo di? b) An bena mun lo lajɛ barokun nata la?
17 Kira Daniyɛli tun kɔnna k’a fɔ ko “lɔnniya” sɔbɛ bena “caya.” O lo kɛra jaatika! Kiraya kuma minw ɲɛsinna an ka wagati ma, an ye faamuyali sɔrɔ u koo la (Dan. 12:4, 9, 10, Biblu Ala ta Kuma). O kiraya kumaw be dafara cogo min na, o b’an kabakoya Jehova n’a ka Kuma koo la (Ezayi 46:10; 55:11). O la, to ka Bibulu sɛgɛsɛgɛ koɲuman walisa k’i ka limaniya barika bonya. To ka tɔɔw dɛmɛ fana u ka jɛnɲɔgɔnya ɲuman kɛ ni Jehova ye. Minw bɛɛ b’u jigi la a kan bɛrɛbɛrɛ, a bena u latanga ani ka “hɛrɛ kɛ o ye kosɔbɛ.”—Ezayi 26:3.
18 Kiraya kuma minw ɲɛsinna kerecɛn kafo ma laban wagati la, an bena sinsin olu lo kan barokun nata la. I ko an bena a ye cogo min na, o kiraya kumaw fana b’a yira ko an be laban loonw lo la. An bena dalilu wɛrɛw lajɛ minw b’a yira ko Masacɛ Yezu be a ka kalanden kantigiw ɲɛminɛna.
DƆNKILI 61 Témoins, en avant ! (Seerew, a’ ye taga ɲɛ)
a An be wagati min na o ɲɔgɔn ma deli ka kɛ! Ala ka Masaya be sen kan i ko a tun fɔra Bibulu ka kiraya kuma caaman kɔnɔ cogo min na. Barokun nin na, an bena o kiraya kuma dɔw lajɛ walisa k’an ka limaniya barika bonya Jehova koo la. O bena an dɛmɛ fana an hakili siginin ka to ani an k’an jigi la Jehova kan kabini sisan ani loon nataw la.
b Gafe Ɲɛnamaya kɛ hɛɛrɛ la fɔɔ abada! kalansen 32nan yɔrɔ 4nan lajɛ. Videwo nin fana lajɛ jw.org kan: Ala ka Masaya sigira sen kan saan 1914.
c Kunnafoni wɛrɛw lajɛ Daniyɛli ka kiraya kuma koo la, saan 2012, zuwɛnkalo tile 15nan ka Kɔrɔsili Sangaso kɔnɔ faransɛkan na, a ɲɛɛ 14-19.
d Yirali 17:12 (Bible senuma): “I ye biɲɛkolo tan minnu ye, olu ye masakɛ tan ye, u ma masaya sɔrɔ fɔlɔ, nka u ni wara na masaya fanga sɔrɔ ɲɔgɔn fɛ ka waati kelen kɛ.”
e Koo minw bena kɛ yanni dɔɔni, n’i be kunnafoni wɛrɛw fɛ o koo la, gafe nin sapitiri 21nan lajɛ: Le Royaume de Dieu en action !