I Hakili B’a La Wa?

Kɔrɔsili Sangaso minw bɔra ɲina, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

N’an be wagati ta ka kuma ni Jehova ye, k’a lamɛn ani ka miiri a koo la, an bena nafa jumanw lo sɔrɔ o la?

An bena desizɔn ɲumanw ta, an bena kɛ kalanfa ɲumanw ye, an ka limaniya bena sabati ani an ka kanuya barika bena bonya fana Jehova koo la.—w22.01, ɲɛɛ 30-31.

N’an b’a yira ko an lanin be Jehova n’a ka lasigidenw na, o bena an dɛmɛ cogo di?

Sisan yɛrɛ lo an ka ɲi k’a yira ko an lanin be Jehova ka kokɛcogow la. An b’o yira n’an tɛ sigasiga diinan mɔgɔkɔrɔw ka cikanw na. N’an b’o kɛ, tɔɔrɔba wagati la an bena se ka mɛnni kɛ u fɛ hali n’a b’an ɲɛɛ na ko u ka cikanw bɛnnin tɛ wala u faamu man nɔgɔ.—w22.02, ɲɛɛ 4-6.

Mɛlɛkɛ tun b’a fɛ ka mun lo fɔ tuma min na a kumana “bonlɔjuru” koo la, o min tun be gofɛrɛnɛrɛ “Zorobabɛli boro”? (Zak. 4:8-10, Biblu Ala ta Kuma).

A tun be Yahutu dɔw ɲɛɛ na ko Alabatosoba kura ni fɔlɔ ta cɛ ka jan. O la, mɛlɛkɛ tun be Ala ka jama hakili sigira le ko o Alabatosoba bena lɔ ka ban ani a bena lɔ ka kɛɲɛ ni Ala ka sariyaw ye.—w22.03, ɲɛɛ 16-17.

Cogo jumanw na an be se ka ‘siraɲuman yira . . . an ka kumacogo’ fɛ? (1 Tim. 4:12).

An ka kuma ni ɲumanya ani bonya ye waajuli la, an ka dɔnkili la n’an dusu bɛɛ ye ani ka lakalitaw kɛ tuma o tuma lajɛnw na, ani an ka to ka tiɲɛn fɔ, ka tɔɔw jija an ka kumaw fɛ ani k’an yɛrɛ tanga kuma jugu fɔli ma.—w22.04, ɲɛɛ 6-9.

Sogo (wala masaya) naani minw kofɔra Daniyɛli sapitiri 7nan kɔnɔ, mun na u cogoyaw be sɔrɔ sogo kelen lo la Yirali 13:1, 2 kɔnɔ?

Sogo min kofɔra Yirali sapitiri 13nan kɔnɔ, o tɛ masaya kelen dɔrɔn lo tagamasiɲɛ ye i n’a fɔ Ɔrɔmu. Nka, o sogo ye gofɛrɛnɛmanw bɛɛ lajɛnnin lo ye minw ye adamadenw mara.—w22.05, ɲɛɛ 9.

Cogo jɔnjɔn juman lo la an b’a yira ko an lanin b’a la ko Jehova bena kiti tigɛ cogo tilennin na?

Ni dɔ y’an nɛni, ni dɔ donna an gasi la wala k’an hakɛ ta cogo wɛrɛ la, an b’an jija walisa an kana dimi mara an kɔnɔ ani an be koow to Jehova bolo. Jurumu ye bɔnɛ o bɔnɛ lase an ma, Jehova bena o lalaga.—w22.06, ɲɛɛ 10-11.

Ni balimacɛ dɔ be delili kɛra waajuli baara lajɛn wala kafo ka lajɛn dɔ la, a ka ɲi ka mun lo to a hakili la?

Mɔgɔ man ɲi ka tɛmɛ delili fɛ ka kafodenw ladi wala ka kunnafoniw di u ma. A man ɲi ka “kuma caaman” fana sanko n’a be lajɛn dadonna (Mat. 6:7).—w22.07, ɲɛɛ 24-25.

Kɔrɔ juman na “kojugukɛlaw” bena “kunun kiti kama”? (Zan 5:29).

Kiti tɛna tigɛ u kan ka kɛɲɛ n’u ka kɛwale tɛmɛninw ye. U bena kɛwale minw kɛ u suu kununin kɔ, Yezu bena o lo sɛgɛsɛgɛ.—w22.09, ɲɛɛ 18.

Lajɛnba min kɛra saan 1922 sɛtanburukalo la, J. F. Rutherford ye balimaw jija mun lo la?

Lajɛnba dɔ la Cedar Point, Ohio mara la Etazini, a ko: “Masacɛ be mara kɛra! Aw ye a ka lasigidenw ye. O kama, a’ ye Masacɛ n’a ka Masaya koo weleweleda, a’ y’o weleweleda, k’o weleweleda!”—w22.10, ɲɛɛ 3-5.

Ezayi sapitiri 30nan be fɛɛrɛ saba jumanw lo bɔ kɛnɛ kan, Ala be tɛmɛ minw fɛ k’an dɛmɛ ka muɲuli kɛ?

O sapitiri b’a yira ko Ala 1) b’an ka deliliw lamɛn ani k’u jaabi, 2) a b’an ɲɛminɛ ani 3) a b’an duga kabi sisan ani a bena an duga sini ma fana.—w22.11, ɲɛɛ 9.

Mun na an be se k’a fɔ ko Zaburuw 37:10, 11, 29 kɔnɔnakumaw dafara galen ani u bena dafa sini ma?

Dawuda ka kumaw b’a yira Jehova tun ye duga minw lase Israɛldenw ma galen, Solomani ka mara tuma na. Yezu kumana alijɛnɛ nata dɔ koo la ani a ye vɛrise 11nan kɔnɔnakumaw fɔ (Mat. 5:5; Luka 23:43).—w22.12, ɲɛɛ 8-10, 14.